काठमाडौं महानगरपालिकाका ३१ जना कर्मचारीको आरडीटी पोजिटिभ

घर जान नमानेपछि कार्यालयमा बस्ने व्यवस्था मिलाइँदै
गोविन्द पोखरेल, सीमा तामाङ

काठमाडौँ — काठमाडौं महानगरपालिकाभित्र फोहोर मैला व्यपस्थापनमा खटिने ३१ जना सफाइ कर्मचारीमा र्‍यापिड डायग्नोस्टिक टेस्ट (आरडीटी) पोजेटिभ देखिएको छ । महानगरको वातावरण व्यवस्था विभागले शुक्रबार महानगरका सफाई कर्मचारीको आरडीटी परीक्षण गरेको थियो ।

महानरभित्र फोहोरमैला व्यवस्थापनमा खटिने ९ सय ३२ जनाको आरडीटी परिक्षण गरिएको महानगको जनस्वास्थ्य शाखाका प्रमुख नरेन्द्रविलास बज्राचार्यले बताए । ‘३१ जनाको आरडीटी पोजिटिभ देखिएको छ,’ उनले भने, ‘उनीहरुको स्वाब पीसीआर विधिबाट परिक्षण गर्न पठाएका छौं ।’

बज्राचार्यका अनुसार काठमाडौं महानगरपालिकाले स्वास्थ्य सेवा विभागको समन्वयमा इपिडियोमोलोजी तथा रोग नियन्त्रण महाशाखा र राष्ट्रिय जनस्वास्थ्य प्रयोगशालाका प्राविधिक स्वास्थ्यकर्मीहरुले कोरोना परीक्षण गरेको थियो ।

आरडीटी पोजिटिभ देखिएसँगै सरसफाईकर्मी घर जान नमानेपछि उनीहरुलाई टेकुस्थित वातावरण विभागकै कार्यालयमा बस्ने व्यवस्था मिलाइरहेको विभागका प्रमुख हरिकुमार श्रेष्ठले बताए ।

आरटीडी परीक्षणमा पोजिटिभ देखिएका केही कर्मचारी खाद्यान्‍न र राहत वितरण कार्यहरुमा खटिएको श्रेष्ठले कान्तिपुरलाई बताए । महानगरको टेकुमा रहेको वातवरण शाखा बाहेक अन्य वडाहरुमा कार्यरत सरसफाइ कर्मचारीहरुको आरटीडी परीक्षणमा पोजिटिभ देखिएको श्रेष्ठले बताए ।

काठमाडौं महानगरपालिकाका प्रवक्ता इश्वरमान डंगोलले केही कर्मचारीहरुमा देखिएको बताए । 'मैले ठ्याक्कै रिपोर्ट हेरेको छैन । केही कर्मचारीहरुको आरडीटी पोजिटिभ देखिएको सत्य हो,' उनले भने ।

यो पनि पढ्नुहोस् :

आरडीटी किटबारे विवाद किन ?

'आरडीटी' किट खासमा कति ठीक ?



प्रकाशित : जेष्ठ २, २०७७ १८:५९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

लिपुलेक, लिम्पियाधुरा र कालापानी राखेर नेपालको नक्सा जारी गर्ने सरकारको घोषणा 

‘लिम्पियाधुरा, लिपुलेक र कालापानी क्षेत्र नेपालको भूमि हो, त्यसलाई प्राप्त गर्न ठोस कूटनीतिक पहल गरिनेछ, तदनुरूप नै छुटेको भूमिसमेत समावेश गरी नेपालको नक्सा जारी गरिनेछ ।’
कान्तिपुर संवाददाता

काठमाडौँ — सरकारले भारतीय अतिक्रमणमा परेको नेपाली भूमि लिम्पियाधुरा, लिपुलेक र कालापानीसहितको नयाँ नक्सा जारी गर्ने र कूटनीतिक पहलमार्फत उक्त भूमि फिर्ता ल्याउने प्रतिबद्धता जनाएको छ । राष्ट्रपति विद्यादेवी भण्डारीले शुक्रबार संघीय सदनमा पेस गरेको वार्षिक नीति तथा कार्यक्रममै नक्सा जारी गर्ने र भूमि फिर्ता ल्याउने उल्लेख गरिएको हो ।

भारतले लिपुलेक क्षेत्रमा सडक निर्माण गरेपछि भूमि फिर्ता ल्याउन दबाब बढिरहेका बेला सरकारले यस्तो प्रतिबद्धता जनाएको हो । ‘लिम्पियाधुरा, लिपुलेक र कालापानी क्षेत्र नेपालको भूमि हो, त्यसलाई प्राप्त गर्न ठोस कूटनीतिक पहल गरिनेछ । तदनुरूप नै छुटेको भूमिसमेत समावेश गरी नेपालको नक्सा जारी गरिनेछ,’ नीति तथा कार्यक्रमको २६९ औं बुँदामा छ, ‘सरकार नेपालको अन्तर्राष्ट्रिय सीमाको सुरक्षा र संरक्षण गर्न प्रतिबद्ध छ ।’

अन्तर्राष्ट्रिय सीमा निरीक्षणको कार्यलाई निरन्तरता दिने र ऐतिहासिक सन्धि, नक्सा, तथ्य तथा प्रमाणका आधारमा कूटनीतिक माध्यमबाट भारतसँगको सीमा सम्बन्धमा लामो समयदेखि बाँकी रहेका र समय–समयमा उठिरहेका विषयहरूको समाधान गर्ने नीति तथा कार्यक्रममा उल्लेख छ ।

नक्सा जारी गर्ने र भूमि फिर्ता ल्याउने विषयमा नीति तथा कार्यक्रम पेस गर्नुअघि शुक्रबार बिहान बसेको नेकपा सचिवालय बैठकमा नेताहरूबीच बहस भएको थियो । त्यहाँ नेकपाका नेताहरूले तत्काल लिम्पियाधुरासहितको नक्सा जारी गर्न सुझाव दिएका थिए । भारतले नेपाली भूमिमा मनपरी गरिाख्ने तर नेपालचाहिँ चुप लागेर बसिराख्ने ? भन्दै नेताहरूले आपत्ति जनाएपछि प्रधानमन्त्री ओलीले नीति तथा कार्यक्रममै यो विषय आउने जानकारी नेताहरूलाई दिएका थिए ।

बालुवाटारको बैठकमा नेकपा नेताहरू पहिला नक्सा जारी गर्ने, त्यसपछि वार्ता र कुराकानी पछि हुँदै गर्छ भन्ने निष्कर्षमा पुगेका थिए । त्यसपछि नेकपा सचिवालयले नक्सा जारी गर्ने औपचारिक सुझाव दिएको थियो । प्रधानमन्त्री ओलीले यो विषयमा राष्ट्रिय सहमति जुटाउन केही समयअघि सर्वदलीय बैठक पनि आयोजना गरेका थिए । उक्त बैठकले पनि सरकारलाई नक्सा जारी गर्न र भारतसँग गम्भीर कुरा गर्न सुझाव दिएको थियो ।

सरकारको नीति तथा कार्यक्रममा नेपालको परराष्ट्र नीति राष्ट्रिय हित, पारस्परिक लाभ र सम्मान, अन्तर्राष्ट्रिय प्रतिबद्धता तथा दायित्व र न्यायमा आधारित हुने उल्लेख छ । नेपालको स्वतन्त्रता, सार्वभौमसत्ता, भौगोलिक अखण्डता र स्वाधीनताको संरक्षण, सीमाको सुरक्षा र नेपालीको हकहितको संरक्षण गर्दै नेपालको अन्तर्राष्ट्रिय सम्बन्धलाई थप सुदृढ बनाउने पनि त्यसमा उल्लेख छ ।

प्रकाशित : जेष्ठ २, २०७७ १८:५६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×