इलेक्ट्रिसियनसहित दुई जनाविरुद्ध विशेष अदालतमा मुद्दा दर्ता
काठमाडौँ — अख्तियार दुरुपयोग अनुसन्धान आयोगले बुधबार विशेष अदालतमा दुइटा मुद्दा दर्ता गरेको छ । अख्तियारले एउटा नक्कली प्रमाणपत्रको अनि अर्को रंगेहात घूसको मुद्दा दर्ता गरेको हो ।
अख्तियारले विद्युत् प्राधिकरणका इलेक्ट्रिसियन विश्वनाथ पुडासैनीविरुद्ध नक्कली प्रमाणपत्र पेस गरेर भ्रष्टाचार गरेको आरोपमा मुद्दा दायर गरेको हो । उनले ८ कक्षा पास गरेको प्रमाणपत्र पेस गरेको अख्तियारको आरोप छ ।
अख्तियारले भ्रष्टाचार मुद्दाको साक्षी बस्नुपर्ने शर्त उल्लंघन गरेको आरोपमा बाराको पचरौता नगरपालिकाको कार्यालय सहयोगी ध्रुव महतो नुनियाविरुद्ध १५ हजार रुपैयाँ विगो मागदाबी गरी भ्रष्टाचार मुद्दा दायर गरेको छ । त्यही नगरपालिकाका इञ्जिनियर रामप्रकाश सतराविरुद्धको मुद्दामा साक्षी बस्न स्वीकार गरेपछि नुनियाले घूस लिएको भए पनि उनी विरुद्धको सजाय मागदाबीमा अख्तियारले छुट दिएको थियो । तर अदालतमा फरक बकपत्र गरेको भन्दै नुनियाविरुद्ध पनि मुद्दा चलाएको हो । बकपत्र गरेको घटना लकडाउनअघि माघ १५ गतेको हो ।
