नेकपा स्थायी कमिटीको बैठक बुधबार ११ बजे बोलाइयो
काठमाडौँ — सत्तारुढ नेकपाले भोलि (बुधबार) बिहान ११ बजे पार्टी कार्यालय धुम्बाराहीमा स्थायी कमिटीको बैठक बोलाएको छ । सरकारले जारी गरेका दुई अध्यादेश प्रकरणपछि आन्तरिक विवाद बढेकाले यो बैठक स्थगित गरिएको थियो । वैशाख २५ का लागि बोलाइएको बैठक अघिल्लो दिन स्थगित भएको थियो ।
'भोलि ११ बजे बैठक भनेर एसएमएस प्राप्त भएको छ,' स्थायी कमिटी सदस्य रघुजी पन्तले कान्तिपुरलाई बताए ।
स्थायी कमिटी बैठकका एजेन्डा तय गर्न बसेको सचिवालय बैठकमा सहमति नजुटेपछि बैठक स्थगित गरिएको थियो । पार्टीका दुई अध्यक्ष प्रधानमन्त्री केपी शर्मा ओलीले र पुष्पकमल दाहालबीच बैठकका एजेन्डाबारे सहमति जुटेको थिएन ।
अध्यादेश प्रकरणपछि प्रधानमन्त्री ओलीको दाहाल तथा बरिष्ठ नेता माधव नेपाल समूहले चर्को आलोचना गरेको थियो । ओलीको राजीनामा मागिएपछि उनले कोरोनापछि उपाध्यक्ष बामदेव गौतमलाई प्रधानमन्त्री बनाउने बताएका थिए ।
दाहाल-नेपाल समूहका २० स्थायी कमिटी सदस्यले बैठक बोलाउन लिखित माग गरेका थिए ।
प्रकाशित : वैशाख ३०, २०७७ १४:१८