राष्ट्रपतिद्वारा वैशाख २६ गतेका लागि संसद् अधिवेशन आह्वान
काठमाडौँ — राष्ट्रपति विद्यादेवी भण्डारीले संघीय संसद्को बजेट अधिवेशन(बर्खे अधिवेशन) यही वैशाख २६ गतेका लागि आह्वान गरेकी छन् । राष्ट्रपति भण्डारीले दुवै सदनको अधिवेशन वैशाख २६ गते शुक्रबार दिउँसो ४ बजेका लागि संसद् अधिवेशनको आह्वान गरेकी हुन् ।
आइतबार बसेको मन्त्रिपरिषद् बैठकले वैशाख २६ गते बजेट अधिवेशन बोलाउन राष्ट्रपतिसमक्ष सिफारिस गरेको थियो ।राष्ट्रपति भण्डारीले दुवै सदनको अधिवेशन आह्वानसम्बन्धी पत्र आइतबार नै संसद् सचिवालयमा पठाएकी छन् ।
संघीय संसद्को संयुक्त सदनमा जेठ १५ मा बजेट प्रस्तुत गर्नुपर्ने संवैधानिक व्यवस्था भएकाले सरकारले बजेट अधिवेशनको तयारी थालेको हो । त्यसपहिले नै प्रि-बजेट छलफल गर्ने परम्परा छ । त्यसका लागि पछिल्ला वर्षहरूमा वैशाख १५ लगत्तै बजेट अधिवेशन बोलाइने गरिन्थ्यो ।
तर कोरोना भाइरसको महामारीका कारण यस पटक विगतका वर्षहरुमा जति प्रिबजेट र नीति तथा कार्यक्रमका बारेमा छलफल नहुने भएको छ ।
यस पटक प्रिबजेट र सरकारको नीति तथा कार्यक्रमबारेको छलफल अवधि घटाएर बजेट ल्याउने तयारी सरकारले थालेको छ ।
प्रकाशित : वैशाख २१, २०७७ १५:४०
