कोरोना संकटपछि पर्यटन कार्यदल- समाचार - कान्तिपुर समाचार

कोरोना संकटपछि पर्यटन कार्यदल

कान्तिपुर संवाददाता

काठमाडौँ — नेपाल र भारतले कोभिड–१९ को संकट हटेपछि संयुक्त पर्यटन कार्यदल बनाउने भएका छन् ।

नेपाल र भारतका पर्यटन अगुवाहरूबीच शुक्रबार भएको वेभिनार (सामाजिक सञ्जालबाट छलफल) मा दुवै देशले संयुक्त कार्यदल बनाई नयाँ रणनीति बनाउने विषयमा छलफल भएको हो ।

‘नेपाल पर्यटन बोर्डका कार्यकारी प्रमुख धनञ्जय रेग्मीले गरेको प्रस्तावलाई आगामी दिनका छलफलले टुंग्याउने सहमति भएको छ,’ बोर्डले विज्ञप्तिमा भनेको छ, ‘बोर्डले भारतीय समकक्षीहरूसँगको छलफललाई तीव्रता दिने र यस किसिमको गन्तव्य वेभिनार संयुक्त रूपमा आयोजना गर्दै जाने निर्णय पनि भएको छ ।’

छलफलमा बोर्डका कार्यकारी प्रमुख रेग्मीसहित तीन जना सहभागी थिए । भारतीय ट्राभल एजेन्स एसोसिएसनका अध्यक्ष ज्योति मयल, भारतीय आन्तरिक पर्यटन टुर अपरेटर एसोसिएसनका अध्यक्ष पीपी खन्ना, भारतीय एड्भेन्चर टुर अपरेटर एसोसिएसनका क्याप्टेन स्वदेश कुमार, भारतीय ट्राभल एजेन्ट्स फेडेरेसनका अध्यक्ष प्रदीप लुल्ला र भारतीय आउटबाउन्ड टुर अपरेटर्स एसोसिएसनका निवर्तमान अध्यक्ष महेन्द्र भखारिया सहभागी थिए ।

भारतीय ट्राभलका प्रमुख सञ्जित जैनले छलफलको समन्वय गरेका थिए । बोर्डका कार्यकारी प्रमुख रेग्मीले नेपाली पर्यटन उद्योगको क्षतिबारे सर्वेक्षण गरिरहेको जानकारी दिएका थिए ।

प्रकाशित : वैशाख १९, २०७७ १७:५९
प्रतिक्रिया
पठाउनुहोस्

कोभिड-१९ प्रतिकार्यबारे सेनाले गर्‍यो चरिकोटमा प्रदर्शनी

कान्तिपुर संवाददाता

दोलखा — कोभिड-१९ का बिरामी भेटिएदेखि मृत्यु भएको खण्डमा गरिनुपर्ने कामका बारेमा नेपाली सेनाले प्रदर्शनी गरेको छ ।

दोलखाको चरिकोटस्थित तारादल गणमा प्रदर्शनी गरिएको हो । शुक्रबार सेनाको ब्यारेकमा गरिएको प्रदर्शनीमा पीपीई, एन९५ मास्क र ग्लोब लगाउने तरिकादेखि बिरामी भएको थाहा पाएपछिका प्रतिकार्यबारे प्रदर्शनी गरिएको थियो ।

बिरामीको घरमा जाने, बिरामी लिएर आउने, आइसोलेसनमा राख्ने, उपचार गर्ने विधिबारे पनि प्रदर्शन गरियो । उपचारको क्रममा बिरामीको मृत्यु भएमा शव बोक्नेदेखि दाहसंस्कारका बेला अपनाउनुपर्ने कार्यमा सेनाको भूमिका पनि देखाइएको थियो ।

गणपति निकिल कुँवरले कोभिड महामारीमा दोलखामा काम गर्न सेना तयारी अवस्थामा रहेको बताए ।

कोभिडको प्रतिकार्य तयारी र कामबारे प्रदर्शनी गर्दै नेपाली सेना । तस्बिरः राजेन्द्र/कान्तिपुर

प्रकाशित : वैशाख १९, २०७७ १७:४२
पूरा पढ्नुहोस्
प्रतिक्रिया
पठाउनुहोस्
×