भारतको पिथौरागढमा रहेका करिब ९ सय नेपालीलाई बैतडी ल्याइँदै

भारतीय बजार झुलाघाट र पिथौरागढ जिल्लाका विभीन्न क्वारेन्टाइमा बसेका ६ सय जना र अन्य भारतीय बजारमा रहेका करिब २ सय जना गरि ९ सय जतिलाई ल्याउन लागिएको बैतडीका सहायक प्रमुख जिल्ला अधिकारी लोकेन्द्रसिंह नेगीले बताए । उनका अनुसार बिहान साढे ७ बजेबाट उनीहरुलाई ल्याउन लागिएको छ ।

धेरै जना भएको र दूरी कायम गरि ल्याउनु पर्ने भएकोले साँझसम्म लाग्ने उनले बताए । जिल्ला प्रशासन कार्यालय बैतडी र पिथौरागढ जिल्ला प्रमुखको समन्यवमा उनीहरुलाई ल्याउन लागिएको हो । जिल्लाले व्यवस्थापन गर्ने जनाएपछि गृह मन्त्रालयले जिल्लालाई ल्याउन भनेर मौखिक रुपमा भनेको थियो । त्यसै अनुरुप उनीहरुलाई ल्याउन लागिएको हो । ल्याएर सम्बन्धित पालिकाको क्वारेन्टाइनमा राखिने छ ।

सबैभन्दा बढी पुरचौर्डी नगरपालिकाका नागरिकहरु रहेका छन् । ३ सय बढी यो पालिकाका रहेका छन् । उनीहरुमध्ये कोही बझाङ, कैलाली लगायतका जिल्लाका पनि छन् ।