कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: १६१

लकडाउन अवज्ञा गरी मेला सञ्‍चालन गरेको आरोपमा चार वडाध्यक्षसहित ९ जना प्रहरीको नियन्त्रणमा

वसन्तप्रताप सिंह

बझाङ — लकडाउनको उल्लंघन गर्दै ‘बान्नीकी चैतली’ मेला सञ्‍चालन गरेको आरोपमा प्रहरीले छविसपाथीभेरा गाउँपालिकाका चार जना वडाध्यक्षसहित नौ जनालाई पक्राउ गरेको छ । बुधबार साँझ पक्राउ परेका सबैलाई जिल्ला प्रहरी कार्यालयको हिरासतमा राखिएको छ ।

लकडाउन अवज्ञा गरी मेला सञ्‍चालन गरेको आरोपमा चार वडाध्यक्षसहित ९ जना प्रहरीको नियन्त्रणमा

पक्राउ पर्नेमा छविसपाथीभेरा २ का वडाध्यक्ष विकास अयडी, ३ का वडाध्यक्ष केशवराज जोशी, वडा नं ४ का अध्यक्ष अमर थापा र ५ का वडाध्यक्ष लोकेन्द्र ठगुन्ना रहेका जिल्ला प्रहरी कार्यालयका सूचना अधिकारी नेत्र बोहराले बताए । पक्राउ परेका अन्यमा बान्नीकी चैतली मेला व्यवस्थापन गरिरहेका बान्नी मष्टा मन्दिर संरक्षण समिति कोषाध्यक्ष राजेन्द्रबहादुर सिंह, बान्नी मष्टाका पुजारी नृपराज जोशी र जयकृष्ण जोशी छन् । यस्तै बान्नी मष्टा मन्दिरका फूलपाती सेवक डम्मर धामी, मन्दिरका रजवार इन्द्रबहादुर सिंहलाई पनि लकडाउन उल्लंघनको अभियोगमा पक्राउ गरिएको बोहराले बताए ।


पक्राउ परेका वडाध्यक्षहरुले बान्नी मेलामा मानिसहरुको उपस्थिति रोक्न गाउँपालिकाले प्रयास गर्दागर्दै पनि स्थानीयहरु स्वत:स्फूर्त भेला भएको बताएका छन् । मेलामा स्थानीयहरुको भीड रोक्नका लागि प्रशासनले समेत सहयोग नगरेको उनीहरुको आरोप छ । ‘मेलामा उपस्थित नहुनका लागि हामीले जिल्लाका सबै रेडियोबाट सूचना प्रसारण गरेका थियौं । गाउँगाउँमा सूचना टाँसेका थियौं’ वडा नं २ का अध्यक्ष विकास अयडीले भने ‘त्यति गर्दा गर्दै पनि स्थानीयहरु उर्लेर आए । प्रहरी प्रशासनको पनि उपस्थिति नभएपछि हामीले कसरी रोक्ने ?’ उनले आफूहरुलाई बिनाकारण पक्राउ गरिएको र यसमा जनप्रतिनिधिहरुको दोष नरहेको बताए ।


यता लकडाउन उल्लंघनको अभियोगमा छविसपाथीभेरा गाउँपालिकाका अध्यक्ष अक्कलबहादुर धामी र उपाध्यक्ष राधिका रताला लगायत केही व्यक्तिको पनि खोजी भइरहेको प्रमुख जिल्ला अधिकारी उमेश पाण्डेले बताए ।


पक्राउ परेकाहरुको अनुसन्धान भइरहेको र लकडाउन उल्लंघनमा दोषी पाइएमा संक्रामक रोग ऐन २०२० अनुसार कारबाही गरिने प्रजिअ पाण्डेले बताए ।

प्रकाशित : चैत्र २६, २०७६ १८:४६
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?