'कन्ट्याक्ट ट्रेसिङ' को काम सकियो : स्वास्थ्य मन्त्रालय
काठमाडौँ — स्वास्थ्य तथा जनसंख्या मन्त्रालयले कोभिड १९ संक्रमितहरुका 'कन्ट्याक्ट ट्रेसिङ' को काम सकिएको जानकारी गराएको छ ।
मन्त्रालयमा बुधबार आयोजित नियमित पत्रकार सम्मेलनमा प्रवक्ता डा. विकास देवकोटाले विश्व स्वास्थ्य संगठनको मापदण्डअनुसार अहिलेसम्मका ८ वटा केसका 'कन्ट्याक्ट ट्रेसिङ' सकिएको जानकारी दिएका हुन् ।
प्रवक्ता देवकोटाका अनुसार संक्रमितहरु काठमाडौं टेकुस्थित शुक्रराज ट्रपिकल तथा सरुवा रोग अस्पतालमा २, बागलुङमा २ र धनगढीमा ४ जना छन् ।
- कोभिड-१९ : ट्रेसिङ, टेस्टिङ, ट्रिटमेन्ट
- पोजिटिभ केस आएकाहरुको 'कन्ट्याक्ट ट्रेसिङ' भइरहेको छ : प्रवक्ता देवकोटा
उनले हालसम्म २ हजार ३६६ नमुना परीक्षण भइसकेको जानकारी दिए । परीक्षण दायर बढाउँदै लगिएको भन्दै प्रवक्ता देवकोटाले उपत्यका बाहिरबाट नमुना संकलन भएर आइरहेको जानकारी दिए ।
बुधबारसम्मकोतथ्यांक अनुसार उपत्यकामा १२ र बाहिर १२२ गरी १३४ जना आइसोलेसनमा छन् ।८ हजार ५८० जना क्वारेन्टाइनमा रहेका प्रवक्ता देवकोटाले जानकारी दिए ।
प्रवक्ता देवकोटाले नेपाली सेनाको छाउनी अस्पताल र बलम्बुस्थित सशस्त्र प्रहरी अस्पतालहरु कोरोना संक्रमित बिरामी राख्नका लागि तयार भएको बताए । उनका अनुसार सरकारले दुबै अस्पतालमा १ सयभन्दा बढी बेड र ६ वटा सघन उपचार कक्ष (आईसीयु बेड) पूर्ण तयारी अवस्थामा छन् ।