लकडाउनको ८ दिनपछि छाउनी अस्पतालमा ‘एक्सन टिम’ स्थापना

लक्ष्मण अर्यालको संयोजकत्वमा ३ सदस्यीय टिम गठन, ४ वटा छुट्टाछुट्टै उपसमिति
मातृका दाहाल

काठमाडौँ — लकडाउन घोषणा भएको ८ दिनपछि सरकारले छाउनीस्थित वीरेन्द्र सैनिक अस्पताल परिसरमा कार्यालय रहने गरी ‘कोभिड–१९ विरुद्ध एक्सन टिम’ स्थापना गरेको छ ।





मुख्यसचिव लोकदर्शन रेग्मीसहित चारवटै सुरक्षा निकायका प्रमुखहरुको उपस्थितिमा बसेको बैठकबाट मंगलबार दिउँसो टिम गठन भएको हो । प्रधानमन्त्री तथा मन्त्रिपरिषद् कार्यालयका सचिव लक्ष्मण अर्यालको संयोजकत्व रहेको टिममा स्वास्थ्य मन्त्रालयका चिकित्सक डा. रोशन पोखरेल र नेपाली सेनाका उपरथी सदस्य छन् ।


टिमअन्तर्गत बन्दोबस्ती, अपरेसन, सूचना तथा सञ्चार र सुरक्षा तथा कानुन गरी ४ वटा उपसमिति पनि गठन भएको छ । उपसमितिमा चारवटै सुरक्षा निकायका अधिकारी, प्रधानमन्त्री कार्यालय, स्वास्थ्य तथा जनसंख्या मन्त्रालय, गृह मन्त्रालय र आवश्यकताअनुसार अन्य मन्त्रालयका प्रतिनिधिलाई उपसमितिमा समावेश गरिने छ । सरकारले आइबार कोभिड–१९ रोग रोकथाम तथा नियन्त्रणसम्बन्धी उच्चस्तरीय कार्यदलका संयोजक उपप्रधान तथा रक्षामन्त्री ईश्वर पोखरेलको संयोजकत्वमा क्राइसिस म्यानेजमेन्ट सेन्टर (सीसीएमसी) स्थापना गरेको थियो ।


त्यस्तै प्रदेश र स्थानीय तहमा पनि सोहीअनुसार मुख्यमन्त्री र स्थानीय तहका प्रमुखको अध्यक्षतामा सेन्टर स्थापना गर्ने निर्णय भएको थियो । सीसीएमसीका निर्णय कार्यान्वयन गर्न एक्सन टिम बनेको हो । कार्यान्वनका लागि ४ वटा उपसमिति गठन गरिएको स्वास्थ्य तथा जनसंख्या मन्त्रालयका सचिव यादवप्रसाद कोइरालाले बताए । एक्सन टिमले जोखिम नियन्त्रणका लागि सरकारी संयन्त्रलाई आवश्यकताअनुसार परिचालन गर्न समन्वय गर्ने छ । ‘एक्सन टिम अन्तर्गत काम हुने गरी ४ वटा छुट्टाछुट्टै उपसमिति गठन गरिएको छ,’ सचिव कोइरालाले भने, ‘स्वास्थ्य सामग्री तथा दैनिक उपभोग्य वस्तुसम्बन्धी समन्वय गर्न बिरामीलाई घरबाट अस्पतालसम्म ल्याउने/पुर्‍याउने, सूचना सम्प्रेषण तथा अन्य कार्यसञ्चालनका लागि यी उपसमितिहरुले काम गर्नेछन् ।’


र्‍यापिड रेस्पोन्स टिम पनि अपरेसन र कानुन तथा सुरक्षा व्यवस्थापन समितिअन्तर्गत परिचालन गरिने उनले बताए । सचिव कोइरालाका अनुसार सीसीएमसीले दिएका निर्देशन मुख्यसचिवको समितिले कार्यान्वयनका लागि सहजीकरण गर्ने छ । त्यसका आधारमा एक्सन टिमले काम गर्ने छ ।

प्रकाशित : चैत्र १८, २०७६ २१:३८
ADVERTISEMENT
प्रतिक्रिया
पठाउनुहोस्
ADVERTISEMENT

मनास्लुमा तय भएको श्याग्या महोत्सव स्थगित 

कान्तिपुर संवाददाता

काठमाडौँ — गोरखाको मनास्लु क्षेत्रस्थित चुमनुब्री गाउँपालिका, छेकम्पारको ऐतिहासिक राजेन गुम्बामा वैशाख पहिलो साता हुने भनिएको श्याग्या शताब्दी महोत्सव स्थगित भएको छ । 



विश्वमै महामारीका रुपमा फैलिएको कोभिड १९ का कारण अर्को सूचना प्रकाशित नभएसम्म महोत्सव स्थगित गरिएको महोत्सव मूल समारोह समितिका अध्यक्ष निमा लामाले कान्तिपुरलाई बताए ।

अहिंसा क्षेत्र घोषणा भएको ९९ वर्ष पूरा भएर १ सय वर्ष सुरु हुने अवसरमा वैशाख ५ देखि ८ गतेसमम राजेन गुम्बा परिसरमा महोत्सव गर्न लागिएको थियो । चीनको स्वशासित तिब्बतसंग जोडिएको चुम उपत्यका चुम नुब्री गाउँपालिकाको ६ र ७ वडामा फैलिएको छ ।

अध्यक्ष लामाका अनुसार १९७७ सालमा उक्त क्षेत्रलाई अहिंसा क्षेत्र घोषणा गरिएको थियो । काटमार नहुने क्षेत्र भएकाले यस क्षेत्रलाई सांस्कृतिक पर्यटकीय केन्द्रका रुपमा परिचित गराउने उद्देश्यले महोत्सव गर्न खोजिएको थियो ।
२०६५ सालमा साविकको छेकम्पार गाविसको गाउँ परिषद्ले अहिंसा क्षेत्रको चार किल्ला घोषणा गरेको थियो । मनास्लु संरक्षण क्षेत्र आयोजना (एमक्याप) भित्र पर्ने चुमक्षेत्रमा कहिल्यै पनि काटमार हुंदैन ।

जसका कारण वर्षौदेखि हिमाली पाखा पखेरामा पाइने वन्यजन्तु र जैविक विविधाको संरक्षणसमेत भएको छ । कुनै पनि पशु वा वन्यजन्तुको काटमार नहुने भएकाले उक्त क्षेत्रको पदयात्रामा जाने पर्यटकलाई यस्तो कुरा नयां लाग्ने गरेको छ ।

सिकार खेल्न, भीर मौरी काट्न, डढेलो लगाउन, मासुजन्य प्रयोजनको व्यापारका लागि उक्त क्षेत्रमा प्रतिबन्ध लगाइएको छ।चुम उपत्यकामा बौद्ध गुरु मिलारेपाले समेत ध्यान गरेकाले अहिलेसम्म उक्त क्षेत्रमा बौद्ध धर्मकोका अनुयायीको चासो रहेको छ ।

करिब ३ हजार ७ सय जनसंख्या र ५ सय ६० घरधुरी रहेको चुम उपत्यकामा पुराना गुम्बा, आंखैअघि देखिने हिम श्रृंखला, परम्परागत संस्कृती मुख्य आकर्षण हुन् ।

प्रकाशित : चैत्र १८, २०७६ २१:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×