यात्रुको विवरण राज्यलाई तुरुन्त बुझाउन देशभरका ट्राभल एजेन्टलाई परिपत्र 

सुरज कुँवर

काठमाडौँ — लकडाउन हुनुअघि विदेशबाट जहाज चढेर आएका चार जना कोरोना संक्रमित यात्रुसँगै आएका अन्य यात्रुहरुको विवरण उपलब्ध गराउन ट्राभल एजेन्टहरुको छाता संगठन नेपाल एशोसिएसन अफ टूर एण्ड ट्राभल एजेन्ट्स (नाट्टा) ले आफ्ना सबै सदस्यलाई परिपत्र गरेको छ । 

संक्रमण पुष्टि भएका यात्रुसँगै आएका अन्यसँग सम्पर्क जुटाउन राज्यलाई अप्ठ्यारो भएपछि नाट्टाले उक्त कदम चालेको हो । ‘संक्रमित यात्रुहरुसँग यात्रा गर्ने अरु यात्रुहरुमा पनि उक्त भाइरस सर्न सक्ने सम्भावनालाई मध्यनजर राख्दै उहाँहरु कुनै पनि ट्राभल एजेन्टसहरुमार्फत टिकट काटेर नेपाल आउनुभएको हो भने उहाँहरुलाई सम्पर्कमा आउन र यात्रुहरुको विस्तृत विवरण नाट्टामा पठाई सम्बन्धित ठाउँमा पुर्‍याउनका निम्ति सहयोग गर्न सम्पूर्ण सदस्यहरुलाई परिपत्र जारी गरिएको छ,’ नाट्टाका अध्यक्ष अचुत गुरागाईंद्‍वारा जारी विज्ञप्तिमा भनिएको छ ।


गत १७ मार्चमा कतार एयरवेजको क्यूआर ६५० उडान नम्बरबाट नेपाल आएका २ जना र यूएईको सारजाहबाट एयर अरबियामा दिल्ली हुँदै २० मार्चमा भिस्तारा एयरलाइन्सबाट नेपाल आएका एक जनामा कोरोना भाइरस (कोभिड १९) संक्रमण पुष्टि भइसकेको छ । विश्वव्यापी रुपमा फैलँदै गएको कोभिड १९ का कारण विश्व अर्थतन्त्रमै देखा पर्न थालेको नकारात्मक असरबाट नेपाल र नेपालको पर्यटन क्षेत्र पनि नराम्रोसँग प्रभावित हुन थालेको अवस्थाप्रति नाट्टाले दु:ख प्रकट गरेको छ । नाट्टाका महासचिव सुधीरकुमार उपाध्यायका अनुसार मुलुकभर छरिएका करिब १२ सय सदस्यलाई अनुरोध गरिएको छ । ‘यदि नेपालबाटै टिकट काटिएका यात्रुहरु ती मितिमा रहेछन् भने विस्तृत विवरण राज्यलाई उपलब्ध गराउन सकिन्छ’, महासचिव उपाध्ययले कान्तिपुरसँग भने, ‘यदि विदेशबाटै टिकट काटिएको रहेछ भने सम्बन्धित एयरलाइन्सका नेपालमा रहेका कार्यालयबाट विस्तृत विवरण सजिलै पाइन्छ ।’


नाट्टाले यस विषम परिस्थितिमा राज्यद्वारा जारी निर्देशन पालना गर्नु तथा राज्यलाई सहायता गर्नु नागरिकको दायित्व रहने जनाउँदै लकडाउनको पालनाका निम्ति पनि अनुरोध गरेको छ । सरकारले लकडाउनको अवधि थप गरेसँगै आगामी २०७७ वैशाख ३ गतेसम्म विदेशी, स्वदेशी एयरलाइन्सका व्यावसायिक उडान रोकिसकेको छ ।


नाट्टाले कोभिड १९ को संक्रमण फैलिन नदिनका विदेशबाट आएका र आफूलाई शंका लागेकालाई सेल्फ क्‍वारेन्टाइनमा बस्न पनि अनुरोध गरेको छ ।

प्रकाशित : चैत्र १७, २०७६ १९:५२
प्रतिक्रिया
पठाउनुहोस्

डा. केसी भन्छन्– ‘मैले बोल्ने समय भएको छैन’

‘अहिलेको परिस्थितिमा मसंँग बोल्नका लागि केही पनि छैन र म बोल्न पनि चाहँदैन । जे भइरहेको छ त्यसको मौन दर्शक म पनि हुँ ।’
डीआर पन्त

डडेलधुरा — कुनै रोगको महामारी होस् या प्राकृतिक विपद् । देशको जुनसुकै भू–भागमा भएपनि काँधमा झोला र औषधि बोकेर पुग्छन् डा. गोविन्द केसी । नेपालको चिकित्सा शिक्षा र स्वास्थ्य क्षेत्रको सुधारको माग गर्दै उनी १७ पटकसम्म आमरण अनसन बसेका थिए । उनले अनसनका क्रममा उठाएका कतिपय मागहरु अझै पनि सम्बोधन भएका छैनन् ।

तर, कोरोना भाइरस (कोभीड–१९) को महामारीविरुद्ध देश नै जुटिरहेका बेला हाम्रो स्वास्थ्य प्रणाली र उपचारको अवस्थाबारेको अवस्था उदांगो भएको छ । यतिबेला सरकार सामान्य स्वास्थ्य सामग्री जुटाउन तथा संक्रमणविरुद्ध आफ्नो संयन्त्र परिचालन गर्न असफल भएको भन्दै टिप्पणी भइरहेको छ ।राजनीतिक आग्रह/पूर्वाग्रह छाडेर समयमै स्वास्थ्य क्षेत्रको विकासमा ध्यान दिएको भए यस्तो अवस्था आउने थिएन भन्दै सामाजिक सञ्जालमा पोस्टहरु देखिन थालेका छन् । र धेरैले सम्झिरहेका छन् उनै डा. केसीलाई । तर, केसी भने डडेलधुरा अस्पतालमा गुमनामजस्तै भएर मौन बसिरहेका छन् ।

आइतबार सांँझ र सोमबार बिहान केसीसँग सम्पर्क गर्न खोज्दा सम्भव भएन । सोमबार दिउँसो सम्पर्क भए पनि शल्यक्रियाका कारण लामो कुराकानी सम्भव भएन । ‘म अप्रेससनको तयारीमाछु, धेरै कुरा गर्न सक्दैन,’ उनले छोटो प्रतिक्रिया दिए । तीन घण्टापछि अस्पतालको इमरजेन्सी कक्षबाट बाहिर आएर उनले यति मात्र भने, ‘अहिलेको परिस्थितिमा मसंँग बोल्नका लागि केही पनि छैन र म बोल्न पनि चाहँदैन ।जे भइरहेको छ त्यसको मौन दर्शक म पनि हुँ ।’
कोरोना महामारीको सम्भावित जोखिम नियन्त्रणमा सरकारको तयारी, जनमानसमा फैलिएको त्रासलगायतका विषयमा उनी केन्द्रित हुन चाहेनन् । मात्र भने,‘हरेक कुरा बोल्ने समय हुन्छ, अहिले समय भएको छैन ।’

आफू निकै व्यस्त भएकोले मंगलबार मात्र कुराकानी गर्नेभन्दै उनी पुन: सेवामा खटिए । केसीका विषयमा अस्पतालका मेडिकल सुपेरिटेन्डेन्ट डा. जगदीशचन्द्र विष्टले भने, ‘एउटा चिकित्सकले आफ्नो पेशागत मर्यादाभित्र रहेर जसरी सेवा गर्छ, डा केसीले पनि त्यसरी नै सेवा गरिरहनु भएको छ, त्यो बाहेक अरु डा केसीसंँग नै कुरा गरे राम्रो हुन्छ ।’

बिहान उठेपछि बेलुका सुत्ने बेलासम्मको अधिकांश समय उनी अस्पताललाई दिन्छन् । एक छाक मात्रै खाने गरेका उनीदिनभर बिरामीको उपचारमा व्यस्त रहन्छन् । भेट्न आएका शुभचिन्तक र स्थानीय अगुवाहरुसंँग पनि कुरा गर्दैनन् । सरकारले लकडाउन गर्ने निर्णय गरेपछि अस्पतालमा बिरामी सँगसँगै उनलाई भेट्न आउने–जानेको संख्या पनि निकै कम भएको छ । स्वास्थ्यसम्बन्धी समस्या लिएर आएकाबाहेक अस्पतालकै स्वास्थ्यकर्मीसँग पनि उनको पातलो मात्रै भेटघाट हुने गरेको एक चिकित्सकले बताए ।

केसी तीन साताअघि मात्रै स्वास्थ्य सेवा दिन यहाँ आएका हुन् । उनी आएपछि भने यहाँको वातावरणमा केही फरकपन आएको चिकित्सक, बिरामी र उनीहरुका आफन्तहरुले बताउन थालेका छन् । अस्पतालमा कार्यरत ति चिकित्सक भन्छन्,‘डाक्टर कस्तो हुनुपर्छ भन्ने धेरै कुरा डा. केसीबाट सिक्ने मौका मिलेको छ । जागिरबाहेक डाक्टरको मानवीय धर्म कस्तो हुनुपर्छ, स्वभाव कस्तो हुनुपर्छ, बिरामीसंँग गर्ने व्यवहार कस्तो हुनुपर्छ भनेर जान्न पाएका छौं । डा. केसी असाधारण मानवीय भावना भएका सच्चा सेवक हुन् ।’

डडेलधुरा अस्पतालमा केसीले नि:शुल्क सेवा प्रदान गर्न सुरु गरेपछि अहिलेसम्म सयौंले उनीबाट सेवा लिएका छन् । डडेलधुरा, बैतडी, बझाङ, दार्चुला र डोटीका हाडजोर्नीसम्बन्धी समस्या भएका धेरैले विशेषज्ञ चिकित्सा सेवा पाएका छन् । लकडाउन अघिसम्म उनीसँग उपचार गराउन धेरैको भिड लाग्ने गरेको अस्पतालका मेसु विष्टले बताए । हाल बिरामीको संख्या घटे पनि आउने क्रम भने रोकिएको छैन ।

पछिल्लो अनसन उनले डडेलधुरा अस्पतालमै सुरु गरे पनि स्वास्थ्यमा आएको खराबी र सरकारको अनुरोधपछि बीचमै स्थगित भएको थियो । यसपटक डडेलधुरा आएपछि केसीले भनेका थिए,‘मेरो लडाइँसकिएको छैन, स्थगित मात्र भएको हो । अहिले सेवा दिन आएको हुँ, फेरि अनसन बस्ने–नबस्ने निर्णय डडेलधुरामै हुन्छ ।’

प्रकाशित : चैत्र १७, २०७६ १९:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×