कोरोना शंकास्पद बिरामी मृत्यु : स्वाब संकलनमै ‘लापर्बाही’, अझै खुलेन कारण

स्वाब काठमाडौं पठाइसकेका छौं, भोलि (सोमबार) रिपोर्ट आउँछ : मन्त्री बराल
घनश्याम गौतम

रूपन्देही — प्रदेश स्वास्थ्य निर्देशनालयले स्वाब संकलन गरी तुरुन्तै काठमाडौं नपठाएका कारण बुटवलको धागो कारखानामा स्थापित आइसोलेसन अस्पतालमा राखिएका व्यक्तिको मृत्युुको कारण अझै खुल्न सकेको छैन । निर्देशनालयले एक जनाको मात्रै स्वाब (थुक र खकारको नमुना) काठमाडौं पठाउँदा खर्च धेरै लाग्ने भन्दै तुरुन्तै काठमाडौं पठाएको थिएन । बिरामीमा देखिएका लक्षणबारे चिकित्सककै भनाइ बाझिएका छन् ।


सरकारले लकडाउन गरेसँगै विमानस्थल बन्द भएको बहाना बनाएर निर्देशनालयले कोभिड–१९ संक्रमणको आशंका गरिएका बिरामीको स्वाब संकलन रोकेको थियो । एउटा बिरामीको मात्र नमुना पठाउँदा खर्च बढी लाग्ने र स्वाब ओसार्ने सवारीसाधन नभएको दाबी गर्दै निर्देशनालयले बिरामीलाई लामो समयसम्म आइसोलेसनमा राख्ने गरेको खुलेको छ ।


बुटवलबाट एकैपटक ७/८ जनाको स्वाब संकलन गरेर पठाउने गरिएको पाइएको छ । त्यसको परिणाम स्वास्थ्य निर्देशनालय र सामाजिक विकास मन्त्रालयले बिरामीको मृत्युको कारण खुलाउन सकेका छैनन् । आइसोलेसनमा रहेका बिरामीको आइतबार दिउँसो मृत्यु भएपछि त्यसको कारणबारे जानकारी लिन खोज्दा सामाजिक विकासमन्त्री सुदर्शन बराल, स्वास्थ्य निर्देशक डा. विनोद गिरी, बुटवल कोरोना विशेष (अस्थायी) अस्पतालका डा. सुदर्शन थापालगायत जिम्मेवारी व्यक्ति पन्छिएका छन् ।


अस्पतालको आइसोलेसन वार्डमा चार दिनदेखि उपचार गराइरहेका पाल्पाको रिब्दीकोट–५ घर भई रूपन्देहीको सैनामैना नगरपालिका–४ सिसौंडाँडा बस्दै आएका ३४ वर्षीय बाबुराम थापाको मृत्यु भएको थियो । सिसौंडाँडाका स्थानीय एवं थापाका छिमेकी दीपक अधिकारीका अनुसार उनी दुबईमा ट्याक्सी चालक थिए । उनी चैत ६ गते दुबईबाट काठमाडौं आएका थिए । काठमाडौंबाट बस चढेर चैत ७ गते परिवारको सम्पर्कमा आए । चैत १० गतेदेखि उनलाई ज्वरो र खोकी लाग्न थालेपछि स्थानीयकै सल्लाहमा चैत ११ गते स्थानीय मेडिकलमा स्वास्थ्य परीक्षण गराएका थिए । सुरुमा टाइफाइडको औषधि खाए । निको नभएपछि चैत १३ गते लुम्बिनी प्रादेशिक अस्पताल भर्ना भएका थिए ।


लुम्बिनी प्रादेशिक अस्पतालका मेडिकल सुपरिटेन्डेन्ट (मेसु) डा. राजेन्द्र खनालका अनुसार ज्वरो, खोकी र कोरोनासँग मिल्ने धेरै लक्षण देखिएपछि अस्पतालले उनलाई बुटवल कोरोना विशेष अस्पतालको आइसोलेसन वार्डमा पठाएको थियो । मेसु खनालले त्यहाँ पनि अवस्था सामान्य रहेको तर आइतबार बिहान एक्कासि समस्या बढेको बताए । ‘दुई दिन उहाँको अवस्था सामान्य थियो,’ उनले भने, ‘आज बिहान समस्या देखिएपछि टेकु अस्पताल पठाउने तयारी गर्दागर्दै मृत्यु भयो ।’


उनले आइतबारै उनीसहित अन्य ७ जनाको स्वाब परीक्षणका लागि काठमाडौं पठाइएको बताए । हवाई उडान रोकिएपछि सवारीसाधन र लागत बढ्ने भएकाले धेरै जनाको स्वाब संकलन गरेर पठाउने गरेकाले ढिलाइ भएको उनको दाबी छ ।


कोरोना विशेष अस्थायी अस्पतालमा अहिले नौ जनाको उपचार भइरहेको छ । अस्पताल स्रोतका अनुसार त्यहाँ भर्ना भएका बिरामीको उपचारमा ध्यान दिने गरिएको छैन । शंका लागेका बिरामीको नजिक कोही पर्दैनन् । टाढैबाट साँधेर उपचार गरिन्छ । थापालाई पनि शुक्रबारबाट निमोनियाको औषधि चलाइएको थियो । शनिबार दिउँसोदेखि असामान्य भएका थिए । स्वासप्रश्वासमा समस्या भएपछि शनिबारदेखि उनलाई अक्सिजन दिइएको थियो । तर, स्वास्थ्यकर्मी कोही पनि नजिक नजाने, उनको अवस्था नबुझ्ने गरेकाले मृत्यु भएको परिवारको आरोप छ ।


२७ वर्षीया श्रीमती रीताले समेत अन्तिम अवस्थामा मात्र जानकारी पाएको बताइन् । थापाको मृत्युपछि उनी भाडामा बस्दै आएको घरमा रहेका अन्य १० जना पनि तनावमा छन् । स्थानीय जनप्रतिनिधिको पहिलमा अहिले सबैलाई क्वारेन्टाइनमा राख्ने तयारी भइरहेको छ ।


सामाजिक विकासमन्त्री सुदर्शन बरालले प्रत्येक दुई दिनको फरकमा स्वाब परीक्षणका लागि काठमाडौं पठाउने गरिएको बताए । ‘हामीले १३ गते अन्य व्यक्तिको पठाएका थियौं,’ उनले भने, ‘१४ र १५ गतेको संकलन गरेर आजै पठाइएको छ ।’ टेकुमा पनि उस्तै चाप रहेकाले छिटो पठाएर पनि तत्काल परीक्षण सम्भव नहुने उनले बताए । ‘तर यो केसको प्राथमिकतामा राखेर भोलि (सोमबार) २ बजेभित्र नै रिपोर्ट दिन भनेका छौं,’ उनले भने । आर्थिक भारभन्दा पनि स्वाब लैजाने सवारी साधन र टेकुको प्रयोगशालामा बढ्दो चापका कारण समय कुर्नुपरेको उनले दाबी गरे । प्रकाशित : चैत्र १६, २०७६ १९:०७

ADVERTISEMENT
प्रतिक्रिया
पठाउनुहोस्

सहरमा ‘डिस–इन्फेक्टेन्ट’ छर्किंदै, मजदुर हिँडेर गाउँ आउँदै

हरिहरसिंह राठौर, राजेन्द्र मानन्धर, कृष्ण थापा, अनिश तिवारी

(धादिङ, दाेलखा, नुवाकाेट, सिन्धुपाल्चाेक) — कोरोना भाइरस (कोभीड–१९) को संक्रमण फैलन नदिन धादिङ सदरमुकाम धादिङबेंसीमा ‘डिस–इन्फेक्टेन्ट’ छर्किन सुरु गरिएको छ । बजार क्षेत्रलाई जिवाणुमुक्त बनाउन भन्दै नीलकण्ठ नगरपालिकाले यहाँका विभिन्न चोक तथा टोलमा ‘डिस–इन्फेक्टेन्ट’ छर्किएको हो । 


धादिङका विभिन्न बस्तीमा आउजाउ गर्न सदरमुकाम क्षेत्र पुग्नुपर्ने भएकोले शनिबार पुछारबजारदेखि सिरानबजारसम्मै उक्त किटनाशक औषधि छर्किएको छ । आइबतार पनि यो कार्यलाई निरन्तरता दिइएको नगरपालिकाले जनाएको छ ।

यसैबीच कोरोना संक्रमण देखिएकी फ्रान्सबाट आएकी युवतीसँग कतार एयरवेजमा आएका धादिङका चार जनामध्ये दुई जना पनि घरमै क्वारेन्टाइनमा बसेका छन् । गजुरी गाउँपालिका–२ का सुधा पन्त र सीताराम पन्त स्थानीय स्वास्थ्यकर्मीको रेखदेखमा घरमै क्वारेन्टाइनमा बसेका गाउँपालिका अध्यक्ष राजेन्द्रविकक्रम बस्नेतले बताए ।

भारतीय नाका सुनौलीबाट पाँच दिन लगाएर धादिङबेंसी आइपुगेका नीलकण्ठ–१, भदौरेका पाँच जना युवालाई प्रहरीले नियन्त्रणमा लिएर क्वारेन्टाइनमा राखेको छ । योसँगै सदरमुकामस्थित क्वारेन्टाइन कक्षमा बस्नेहरुको संख्या १८ पुगेको छ । विदेश तथा भारतबाट फर्केका उनीहरुलाई सदरमुकामस्थित डिभिजन वन कार्यालयको नवनिर्मित भवनमा बनाइएको क्वारेन्टाइन कक्षमा राखिएको छ ।

स्थानीयद्वारा झोलुङ्गे पुल बन्द

गोरखाको गण्डकी–७, घ्याल्चोकलाई पृथ्वी राजमार्गसँग जोड्न त्रिशूली नदीमा निर्माण गरिएको झोलुङ्गे पुल स्थानीयले बन्द गरिदिएका छन् ।

धादिङको वेनीघाट रोराङ–९ स्थित ज्यामिरेघाट जोड्ने उक्त झोलुङ्गे पुलमा स्थानियबासीले टायर, काँडेतार, जस्ता, बाल्टी, काठजस्ता सामग्री राखेर अवरोध गरेका हुन् । कोरोना भाइरसको संक्रमण फैलने आशंकामा राजमार्गबाट कोही पनि व्यक्ति पुल तरेर पारी नआउन् भन्न पुल बन्द गरिएको एक स्थानीयले बताए ।

गोरखामा उत्पादित तरकारी ज्यामिरेघाटस्थित संकलन केन्द्रमा ल्याउन सहज होस् भनि गत वर्ष मात्रै उक्त पुल निर्माण गरिएको थियो ।

धादिङबेंसीबाट साङ्गकोष उक्लने झोलुङ्गे पुल पनि स्थानीयले बन्द गरेका छन् । मुख्य बजार क्षेत्रका अधिकांश टोलमा पस्ने मुख्य सडकमा अपरिचितलाई पस्नमा अवरोध गर्न तगारो राखेर स्थानीयले निगरानी बढाएका छन् ।

चरिकोटमा पनि ‘डिस–इन्फेक्टेन्ट’ छर्कियो

कोरोना भाइरस संक्रमण फैलन नदिन दोलखाका सबै स्थानीय तहले सक्रियता देखाउन थालेका छन् ।

भीमेश्वर नगरपालिकाले सदरमुकाम चरिकोटमा ‘डिस–इन्फेक्टेन्ट’ छर्किएको छ । शुक्रबार क्लोरिन र पानीको घोललाई दमकलमा राखी चरिकोटको मुख्यबजार क्षेत्रमा छर्किएको नगरप्रमुख भरत केसीले बताए ।

उनका अनुसार उक्त किटनाशक घोल एकपटक छर्किंदा ८५ हजार रुपैयाँ खर्च लाग्छ । आइसोलेसन, क्वारेन्टाइन कक्ष निर्माणमा समेत जुटेको उनको भनाइ छ ।

दोलखाका सात वटा गाउँपालिका र दुई नगरपालिकाले कोरोनाविरुद्ध आवश्यक तयारी गरिरहेका जनाएका छन् ।

हिँडेरै काठमाडौंदेखि विदुर

नुवाकोटको किस्पाङ गाउँपालिका–३, काउलेका कृष्ण तामाङ काठमाडौंबाट पैदल हिँडेर घर फर्किए । उनी ज्यामी काम गर्छन् । ‘काम चलिराथ्यो,’ उनले भने, ‘गाडी बन्द हुन्छ भन्ने जानकारी पाइएन ।’ ठेकेदारले काम गरेको पैसा समयमै नदिएकाले समस्या भोग्नु परेको उनले दुखेसो पोखे । समयमा ज्याला नपाएपछि काठमाडौंमा उधारो सामान नपाइने भएकोले शुक्रबार बिहान ५ बजे घरतर्फ लागेको बताए । उनले प्रश्न गरे, ‘भएको पैसा पनि सकिन लागेको थियो । अनि यत्रो दिन के खाएर बस्ने ?’
फर्किने क्रममा सडकमा गाउँका अन्य व्यक्ति भेटेको उनले सुनाए । तामाङ र उनीसँगै हिँडेका सबैजना सोही दिन राति सदरमुकाम विदुर आइपुगेका थिए । कोरोना भाइरसको संक्रमणबाट बच्न सरकारले देशभर लकडाउन गरेपछि ज्यालामजदुरी गरेर जीवन धान्ने वर्ग बढी समस्यामा परेका छन् । सहरमा खानाको समस्या परेपछि गाउँ फर्किन बाध्य भएकोले विभिन्न नाकाबाट पैदल यात्रा गरेरै धेरै जना घर फर्किइरेहका छन् ।

खाद्यान्न सहयोग

पूर्व सञ्चारमन्त्री एवं नेपाली कांग्रेसका नेता मोहनबहादुर बस्नेतसहित क्षेत्रीय सभापति बालकृष्ण बस्नेत, क्षमादेव ग्रुपका प्रतिनिधिले सडक मजदुर र वृद्धवृद्धा गरी ५३ परिवारलाई घरमै चामल, नुन, तेलजस्ता खाद्यन्न सहयोग गरेका गरेका छन्
लकडाउनका कारण खाद्यान्नको अभाव भोगिरहेका सडक मजदुरलाई घरमै पुगेर खाद्य सामाग्री वितरण गरिएको हो ।

प्रकाशित : चैत्र १६, २०७६ १९:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×