चिनियाँ राष्ट्रपतिलाई दाहालको पत्र, नेपाललाई सहयोग गर्न अपिल

'कोरोना नियन्त्रण गर्न सफल भएकोमा बधाई'
बबिता शर्मा, जगदीश्वर पाण्डे

काठमाडौँ — सत्तारुढ नेकपाका अध्यक्ष पुष्पकमल दाहालले कोरोना भाइरसको संक्रमणसँग जुधिरहेको नेपाललाई सहयोग गर्न अपिल गर्दै चिनियाँ राष्ट्रपति सी चिनफिङलाई पत्र पठाएका छन् ।

तीन दिनअघि पठाइएको पत्रमा उनले कोरोना महामारी नियन्त्रण गर्न सफल भएकोमा राष्ट्रपति सीलाई बधाईसमेत दिएका छन् ।


'चीनले कोरोना संक्रमणलाई सफलतापूर्वक नियन्त्रण गरेको मैले मिडियाहरुका समाचारबाट थाहा पाएको छु,' उनले पत्रमा भनेका छन्, 'कोरोना भाइरससँगको यो लडाइँमा जित हात पारेकोमा म नेकपाका तर्फबाट बधाइ दिन्छु ।' अध्यक्ष दाहालकी स्वकीय सचिव गंगा दाहालले उनले तीन दिनअघि पत्र पठाएको बताइन् । मार्च २६ को मिति राखिएको पत्र चिनियाँ दूतावासमार्फत् पठाइएको भने होइन ।


पत्रमा उनले नेपाल अहिले यो महामारीसँग जुधिरहेको उल्लेख गर्दै सहयोगका लागि राष्ट्रपति सीलाई अपिल गरेका छन् । नेपाल यो महामारीसँग जुध्‍नका लागि तयार अवस्थामा नरहेको भन्दै उनले खासगरी औषधि र अन्य मेडिकल सामग्री सहयोग गर्न आग्रह गरेका छन् । उनले नेपाली जनता र नेकपाका तर्फबाट जतिसक्दो छिटो सहयोग गर्न पनि अपिल गरेका छन् ।


गत वर्षको डिसेम्बरमा चीनको वुहानमा देखिएको कोभिड १९ अहिले संसारभर महामारीका रुपमा फैलिएको छ । चीनमा कारोना भाइरसबाट अहिलेसम्म करिब ८१ हजार संक्रमित भएका छन् । तीमध्ये तीन हजार तीन सयको मुत्यु भएको छ । संक्रमितमध्ये ७५ हजारभन्दा बढी उपचारपछि निको भएर घर फर्केका छन् । करिब दुई हजार ६ सय जना अहिले विभिन्‍न अस्पतालमा उपचाररत रहेको चीनको राष्ट्रिय स्वास्थ्य विभागले जनाएको छ ।

प्रकाशित : चैत्र १६, २०७६ १६:०५
ADVERTISEMENT
प्रतिक्रिया
पठाउनुहोस्
ADVERTISEMENT

भारतबाट आयात हुने तरकारीको अर्डर नलिइने

कालिमाटीमा थोक बिक्री बिहान २ देखि ७ र खुद्रा बिक्री बेलुकी ५ देखि ७ बजेसम्म खुला गरिने
तरकारी बजारमा दुईपाङ्ग्रे सवारी प्रवेश निषेध

राजु चौधरी

काठमाडौँ — 
कोभिड–१९ को संक्रमण बढ्दै गएपछि भारतबाट आयात हुने तरकारीको अर्डर नलिने निर्णय गरिएको छ ।

कालिमाटी फलफूल तथा तरकारी बजार विकास समिति, सांसद, काठमाडौं महानगरपालिकाका मेयर, वडाध्यक्ष, सेना र प्रहरीका प्रतिनिधि, व्यापारिक संघसंस्था सम्मिलित छलफलले आइतबार यस्तो निर्णय लिएको हो । 

भारतबाट पर्याप्त मात्रामा तरकारी भित्रिइरहेको समितिका सूचना अधिकारी विनय श्रेष्ठले जानकारी दिए । तर तरकारी बजारमा सुरक्षाको प्रबन्ध छैन । लकडाउन भए पनि होलसेलमा व्यापक भीड भढेकाले भाइरस संक्रमण हुने डरले यस्तो निर्णय गरिएको उनको भनाइ छ । 

‘तरकारीसहित मिनी ट्रकका चालक र सहचालक पनि आउँछन् । तर उनीहरूलाई क्वारेन्टाइनको व्यवस्था छैन,’ श्रेष्ठले भने, ‘तरकारी निर्बाध आयात भइरहेकाले अब अर्डर पोस्टपोन्ड गर्ने निर्णय भएको छ । लकडाउन अवधिसम्म भारतबाट आयात गर्दैनौं ।’ सामान प्रशस्त रहेकाले भारतबाट नआए पनि अभाव नहुने उनले दाबी गरे । 


तरकारी खरिद गर्नकै लागि कालिमाटी बजारमा भीड बढेपछि समितिले खरिदबिक्रीका लागि समयावधिसमेत तोकेको छ । श्रेष्ठका अनुसार थोक/होलसेल बिक्रीका लागि बिहानको २ देखि ७ बजे र खुद्रा बिक्रीका लागि बेलुका ५ देखि ७ बजेसम्म समय निर्धारण गरिएको छ । ‘थोक बजार भए पनि सानादेखि ठूलासम्म सबै व्यापारी आए ।
त्यसैले सुरक्षित किसिमले सञ्चालन गर्न समय निर्धारण गरेका छौं,’ श्रेष्ठले भने ।
उनका अनुसार ढुवानीकर्ता र होलसेल व्यवसायीले टुक्र्याएर बेच्न पाउँदैनन् । ‘झोला, क्रेट वा बोरा जसरी ल्याइएको छ, त्यहीअनूसार बिक्री गर्नुपर्छ,’ उनले भने । कालिमाटी तरकारी बजारमा भीड कम गर्न दुईपाङ्ग्रे सवारी प्रवेशमा पनि रोक लगाइएको छ । ‘अब सोमबारदेखि दुईपाङ्ग्रे सवारी छिराउँदैनौं । त्यसका लागि प्रहरी प्रशासनले व्यवस्था मिलाउँछ,’ उनले भने ।

प्रकाशित : चैत्र १६, २०७६ १६:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×