कोरोना संक्रमणबाट फ्रान्समा १६ वर्षीया किशोरीको मृत्यु

ददि सापकोटा

पेरिस — कोरोना भाइरसले जुनसुकै उमेरकालाई आक्रमण गर्न सक्छ भन्ने उदाहरण हो यो । फ्रान्सको एसोन क्षेत्रमा बस्‍ने जुली नाम गरेकी १६ वर्षीया एक किशोरीको कोरोना भाइरसको संक्रमणबाट गत बुधबार बिहान मृत्यु भएको छ । कोरोना संक्रमणबाट सबैभन्दा कम उमेरमा मृत्यु हुने उनी पहिलो फ्रान्सेली नागरिक हुन् ।



'यसले पाका उमेरका मानिसलाई मात्रै आक्रमण गर्छ भन्ने विश्वासलाई झुटो सावित गरिदिएको छ । 'यो म्युटेन्ट भाइरसले जसलाई पनि समात्न सक्छ,' जुलीकी दिदी मानोनले फ्रान्सेली सञ्‍चारमाध्यमसँग भनेकी छिन् ।


मानोनका अनुसार जुलीलाई अघिल्लो हप्ता सामान्य खोकी लागेको थियो । यस हप्ता त्यो खोकी बढेर गएपछि सोमबार चिकित्सककहाँ लगे । श्वासप्रश्वासमा समस्या देखिएको चितित्कसले पत्ता लगाए । त्यसअघि जुलीमा कुनै गम्भीर रोग कहिल्यै देखिएको थिएन ।


चिकित्सकले तत्कालै एसोन क्षेत्रको लँजुमोस्थित अस्पत्तालमा भर्ना गर्न पठाए । राति उनको स्थिति झन बिग्रिएपछि मंगलबार साँझनै पेरिसको नेकेर अस्पताल स्थानान्तरण गरियो । उनलाई कृत्रिम पद्धतिबाट श्वास फेर्न सजिलो बनाइयो । मंगलबार राति नै चिकित्सकहरुले उनको फोक्सोले काम नगरेको जानकारी दिए । उनको स्वास्थ्य एकदमै छिटो झनै बिग्रियो । चिकित्सकहरुले सबै प्रयास गरेपनि उनको शरीरले पचाउन नसकेर मृत्यु भएको जानकारी दिदी मानोनलाई दिए ।


सोमबार उनको अन्तिम संस्कार गरिनेछ । कोरोना भाइरसको प्रकोपपछि सरकारले अन्तिम संस्कारमा पनि १० जनाभन्दा बढी सहभागी हुन नपाउने नियम बनाएको छ । मे ४ मा उनको स्कुल खुलेकै दिन रातो र सेतो रङका लुगासहित एक मिनेट मौन धारणपछि मार्च पास गरिन छ । जुली हँसिली र रसिली स्वभावकी भएकाले त्यसको प्रतिनिधित्वमा सेतो र उनको मनपर्ने रङ रातो भएकाले यसरी सम्झना गर्न लागिएको हो ।

प्रकाशित : चैत्र १५, २०७६ ०७:५७
प्रतिक्रिया
पठाउनुहोस्

स्पेन र फ्रान्समा आठ नेपालीमा कोरोना संक्रमण

ददि सापकोटा

फ्रान्स — स्पेनका सात र फ्रान्सका एकगरी ८ नेपालीमा कोरोना भाईरस संक्रमण भएको छ । स्पेनको बार्सिलोना निवासी सात नेपाली मध्ये एक जना गत सोमबारदेखि आईसीयूमा छन् ।


उनीसहित अन्य दुई जना बार्सिलोनास्थित हस्पिटल दे सान्त खोवान देस्पि अस्पतालमा छन् । सुरुमा रुघा खोकी लागेपछि निमोनिया होला भन्दै बसेको र स्वास्थ्य अलि खराब भएपछि अस्पताल पुग्दा चिकित्सकले कोरोना भाइरसको संक्रमण भएको पुष्टी गरी अस्पतालमै भर्ना गरेको जानकारी एनआरएनए स्पेनका पूर्व अध्यक्ष चिन्तामणी सापकोटाले दिए ।

अन्य चार जना नेपाली मध्ये ३ जनलाई बार्सिलोनाकै हस्पिटल सेन्टपाउ भन्‍ने अस्पतालमा राखिएको छ । ती गत आठ दिनदेखि अस्पतालमा उपचारका क्रममा छन् । बाँकी एक जनामा कोरोना भाइरस पोजिटिभ भएपनि अवस्था सामान्य रहेकाले स्वास्थ्यकर्मीहरुको निगरानीमा बार्सिलोनाकै एक होटेलमा राखिएको बार्सिलोनाका पत्रकार विजय शर्मा दर्पणले टेलिफोनमा कान्तिपुरलाई बताए ।

संक्रमित भएका अन्य केहीमा पोजिटिभ संक्रमण भएतापनि अवस्था सामान्य देखिएपछि चिकित्सकहरुले घरमै आराम गर्ने सल्लाह दिएर अस्पतालले डिस्चार्ज गरेको थियो । त्यसपछि घरमा आराम गरेर बस्दै गर्दा घरका अन्य सदस्यहरुलाइपनि सरेको नेपालीहरुले बताएका छन् ।

अहिले संक्रमित र तिनका परिवार र उनीहरुसँग सम्पर्कमा रहेकाका सबैको अस्पतालले स्वास्थ्य परीक्षण गरिरहेको छ ।

यस्‍तै स्विजरल्याण्डको सीमा नजिक फ्रान्स निवासी एक नेपालीलाई पनि कोरोना भाइरस लागेको छ । मुलुज निवासी उनी अहिले आफ्नै घरमा आइसोलेसनमा बसेका छन् । टाउको दुख्ने, ज्वरो आउने, नाकबाट पानी जम्ने र खोकी लाग्ने भएपछि स्वास्थ्य परीक्षण गराउँदा कोरोनाका लक्षण देखिएपछि चिकित्सकले आइसोलेनमा बस्न सल्लाह दिएका थिए ।

प्रकाशित : चैत्र १४, २०७६ ०८:४२
पूरा पढ्नुहोस्
प्रतिक्रिया
पठाउनुहोस्
×