संक्रमित तेस्रो व्यक्ति चढेको विमानका यात्री खोज्न सास्ती
काठमाडौँ — यूएईबाट चैत ६ गते नेपाल आएका एक व्यक्तिमा कोभिड–१९ को संक्रमण पुष्टि भए पनि उनीसँगै यात्रा गरेका अन्य १ सय ६९ यात्रुको पहिचान भइसकेको छैन । कमजोर अन्तरसरकारी समन्वयका कारण संक्रमण पुष्टि भईवरी पत्रकार सम्मेलन गरेको करिब २४ घण्टापछि मात्रै प्रहरी प्रधान कार्यालयले संक्रमित यात्रु सवार विमानका यात्रुको विवरण बिहीबार अबेर पाएको हो । उक्त विमानमा आएका व्यक्तिको पहिचान नहुँदा संक्रमण फैलिने जोखिम छ ।
संक्रमण पुष्टि भएकी फ्रान्सबाट कतारको दोहा हुँदै काठमाडौं आएकी युवती सवार विमानका सबै यात्रुको खोजखबर पत्ता लागिनसक्दै प्रहरीले अर्को विमानका यात्रुको विवरण केलाउन थालेको छ । प्रहरी प्रधान कार्यालयमा रहेर यस काममा खटिएको टोलीका एक सदस्यले भने, ‘केही बेरअघि मात्रै यात्रुको राहदानी नम्बरसहितको विवरण पायौं । अहिले तिनीहरूको पहिचान धमाधम सुरु गरेका छौं ।’ यूएईबाट आएका यात्रु कति जिल्लाका छन् भनेर तथ्यांक प्रशोधन भइनसकेको उनले बताए ।
संक्रमणको जानकारी १४ घण्टा ‘लुकाइयो’
संक्रमित यात्रु सवार विमानका यात्रीको खोजी गर्न प्रहरीलाई गाह्रो परेको छ । जसको मुख्य कारण अधिकांश वैदेशिक रोजगारीबाट फर्केका कामदार हुनु हो । उनीहरूले नयाँ मोबाइल नम्बर लिएको हुने र कतिपय राहदानी लिएको जिल्लाबाट अन्यत्र बसाइँ सरिसकेको देखिएको प्रधान कार्यालयको भनाइ छ । ‘व्यक्तिको तथ्यांक राख्ने कमजोर परिपाटीका कारण पनि अहिले सास्ती भइरहेको छ,’ स्रोतले भन्यो ।
संक्रमित पुष्टि भएको तेस्रो व्यक्ति यूएईबाट काठमाडौं आएको दिन सुन्धाराको एक लजमा साथीहरूसँग बसेको देखिन्छ । तर बिहीबारसम्म पनि प्रहरी परिसर काठमाडौंले ती यात्रु सुन्धाराको कुन लजमा बसे, उनीसँग को–को बसेका थिए र कसकसको सम्पर्कमा थिए भनेर पत्तो पाइसकेको छैन । परिसर काठमाडौंका एक प्रहरी अधिकारीका अनुसार संक्रमित तेस्रो व्यक्तिबारेको कुनै सूचना आधिकारिक रूपमा कार्यालयमा आएको छैन ।
‘कतारबाट आएको उक्त विमानका काठमाडौं बस्ने यात्रुकै पहिचान सकिएको छैन,’ एक अधिकारीले भने ।
प्रहरी परिसर काठमाडौंका प्रवक्ता डीएसपी होबिन्द्र बोगटीले कतारबाट आएको विमानका यात्रुमध्ये आठ जना काठमाडौंमा रहेको सूचना पाइएको बताए । उनले भने, ‘तीमध्ये पाँच जनाको घरमै प्रहरी पुगेर उनीहरूलाई आइसोलेसनमा राखिसकिएको छ । अन्य तीनको खोजी जारी छ ।’
भद्रगोल तयारी
गत ९ गते बिहान ७ बजेर ४० मिनेटमा दुबईबाट भारतको दिल्ली हुँदै एयर इन्डिया विमानमार्फत यात्रुहरू काठमाडौं आएका थिए । वैदेशिक रोजगारीबाट फर्केका उनीहरूलाई क्वारेन्टाइनमा राख्ने कि के गर्ने भन्नेबारे सरकारको आधिकारिक निर्णय समयमै नआउँदा उनीहरू अन्य बेलाझैं विमानस्थलबाट बाहिरिए ।
यात्रु बाहिरिएको केही घन्टापछि मात्रै गृह मन्त्रालयबाट विमानस्थल प्रहरीलाई निर्देशन गयो— ती सबै यात्रु कहाँ छन्, खोजेर ल्याउने र क्वारेन्टाइनमा राख्ने । निर्देशनलगत्तै प्रहरीले खोजी सुरु गर्यो । विमानस्थल प्रहरी प्रमुख एसएसपी रामकृपाल शाहका अनुसार निर्देशन आएको ४/५ घण्टाभित्रै १६ यात्रुलाई खोजेर ल्याइएको थियो । उनीहरूलाई भक्तपुरको खरिपाटीस्थित क्वारेन्टाइनमा राखिएको छ ।
उक्त विमानमा आएका अन्य यात्री भने आआफ्नो घर पुगिसकेकाले प्रहरीले सम्पर्कमा ल्याउन सकेन । एसएसपी शाहका अनुसार घर गएकालाई पनि स्थानीय प्रहरीमा समन्वय गरेर घरघरमै क्वारेन्टाइनमा राख्ने व्यवस्था मिलाइएको छ ।
सम्बन्धित समाचार