विशेष प्रकाशकीय- समाचार - कान्तिपुर समाचार
कान्तिपुर वेबसाईट
AdvertisementAdvertisement

विशेष प्रकाशकीय

प्रकाशकीय

विश्वव्यापी रूपमा फैलिएको कोरोना भाइरस (कोभिड–१९) को महामारीले हामीलाई पनि छोइसकेको छ । नेपालमा अहिलेसम्म अन्यत्रझैं व्यापक संक्रमण देखा नपरे पनि यसले कुनै पनि बेला ठूलै प्रकोपको रूप लिन सक्ने जोखिमबारे तपाईं–हामी जानकारै छौं । यो अवस्थामा जनउत्तरदायी पत्रकारिता गर्दै आएको कान्तिपुर मिडिया ग्रुप (केएमजी) ले जनताकै हितलाई केन्द्रमा राख्दै लिएका केही महत्त्वपूर्ण निर्णयहरू पाठकसमक्ष राख्न चाहन्छ ।

प्रथमतः, कोरोना भाइरस सिर्जित हालको संकटपूर्ण घडीमा हाम्रा निम्ति आफ्ना पाठक, सहकर्मी कर्मचारी र आम नागरिकको स्वास्थ्य प्राथमिकताको मुख्य विषय हो । अहिलेको असामान्य अवस्थामा हाम्रा वितरक–वाहक र बिक्रेताहरूले ठूलो जोखिम मोलेर सबेरै घर–पसलमा पत्रिका पुर्‍याउँदै आएका छन् । प्रेसका प्राविधिक सहकर्मीले रातभरि खटेर पत्रिका छाप्ने काम गर्दै छन् । हाम्रा संवाददाता र फोटो पत्रकारहरू ज्यान जोखिममा हालेर फिल्डमा खटिने गरेका छन् ।


हामी हरेक बिहान सकेसम्म चाँडै सबैका ढोका–ढोकामा पत्रिका पुर्‍याउन चाहन्छौं, तर यसरी पत्रिका बाँड्दै हिँड्ने वितरक–वाहकहरूको स्वास्थ्य र सुरक्षा अहिले हाम्रा निम्ति सरोकारको गम्भीर विषय बनेको छ । हामीले उनीहरूमा भाइरसको संक्रमण नहोस् भनेर मास्क, पञ्जा र स्यानिटाइजरको व्यवस्था गरेका छौं । अन्य सुरक्षा सावधानी पनि अपनाएका छौं । तापनि सहरका अनेक टोल र ठाउँहरू हिँड्दै गर्नुपर्ने काम भएकाले कुनै पनि बखत संक्रमित हुन सक्ने र त्यसबाट रोग फैलन सक्ने खतरालाई हामी बेवास्ता गर्न सक्दैनौं । सबै तहका सहकर्मीको जीवनरक्षा हाम्रो पहिलो दायित्व हो ।


दोस्रो, हामीले पाठकहरूलाई सही समाचार–विचार दिन सकियोस् भनेर यो कर्तव्य निर्वाह गर्दै आएका हौं । तर थुप्रै पाठक एवम् शुभेच्छुकहरूले नै पत्रिका छापिने खबरकागजमार्फत पनि भाइरस सर्न सक्ने जोखिमतर्फ हामीलाई सजग तुल्याउनुभएको छ । अहिलेसम्म पत्रपत्रिकामार्फत कोरोना भाइरस विस्तार भएको प्रमाणित घटना हामीले फेलापारेका छैनौं । तर यस्तो जोखिम छँदै छैन भनेर ठोकुवा गर्न सक्ने अवस्थामा पनि छैनौं । पाठकहरूको स्वास्थ्य र सुरक्षा सुनिश्चितता हाम्रो सरोकारको अर्को प्रमुख विषय हो ।


तेस्रो, राज्यले अहिले कोरोना संक्रमण फैलन नदिन देशव्यापी ‘लकडाउन’को घोषणा गर्दै औषधि र खाद्यान्नबाहेक ओसारपसार र आवागमन बन्द गरेको छ । मुलुकभित्र कुनै पनि माध्यम वा वस्तुबाट भाइरस प्रवाह हुन नपाओस् भन्ने सरकारको आह्वान र प्रयत्नलाई जनताका घरघरमा अखबार पुर्‍याइरहेका हामीले पनि जिम्मेवारपूर्ण भई मनन गर्नुपर्ने असामान्य अवस्था आएको छ ।


आफ्ना सहकर्मीको संवेदनशील अवस्था, आम नागरिकको मनोभावना र राज्यको आह्वान– यी तीनवटै कुरालाई दृष्टिगत गर्दै हामी एउटा कठोर तर अत्यावश्यक निर्णयमा पुगेका छौं । जसअनुरूप कान्तिपुर, दी काठमान्डु पोस्ट, साप्ताहिक, नेपाल र नारी पत्रिकाको मुद्रण तथा वितरण शुक्रबारपछि केही दिनका निम्ति स्थगन हुनेछन् । त्यसपश्चात् हामी दैनिक रूपमा परिस्थितिको आकलन गर्नेछौं र हालको स्थितिमा अलिकति सुधार आउनासाथ हाम्रा पत्रिकाहरू पूर्ववत् प्रकाशित गरिनेछन् । नियमित ग्राहकहरूले हाल बन्द गरिएको अवधिको पत्रिकाका अतिरिक्त अंक पाउने व्यवस्था मिलाइनेछ ।


पाठकहरूलाई थाहै छ, यसअघि कुनै पनि किसिमका प्रतिकूलताले हामीलाई रोकेन/छेकेन । खासमा पत्रकारिता प्रतिकूलताका बेला पन्छिने पेसा पनि होइन । हामीले एकपछि अर्को अप्ठ्याराका बीचमै सार्थक पत्रकारिता गर्दै आयौं, चाहे त्यो सशस्त्र द्वन्द्व होस् वा शाही अधिनायकत्व अथवा विभिन्न खाले दमन वा अवरोध खडा गरिएको बेला होस्, कान्तिपुर सदैव सत्तीसालझैं ठिङ्ग उभिरह्यो । हामीलाई त्यो ऊर्जा हाम्रा पाठकहरूकै साथबाट प्राप्त भएको थियो । अहिले आम पाठककै आग्रह र सुझावमा हामी विगतभन्दा फरक निर्णय लिन बाध्य भएका हौं । कर्फ्यु वा अन्य निषेधाज्ञाका बेला जुनसुकै अप्ठ्यारा तोडेर पनि हामी आफ्ना पत्रिका पाठकका हात–हातमा पुर्‍याउँथ्यौं । अहिलेको महामारीको प्रकृति नै यस्तो छ, हात–हातबीच नै दूरी राख्नुपर्ने भएको छ । कुनै पनि बाहिरी वस्तुसँग जति धेरै ‘भौतिक दूरी’ राख्न सक्यो, सम्भावित खतराबाट जोगिन उति सहज हुने अवस्था छ । त्यसैले अहिले पत्रिका र पाठकबीच अस्थायी रूपले दूरी कायम राख्नुपर्ने बाध्यता आइपरेको हो ।


जहाँसम्म प्रतिकूल परिस्थितिमा पनि प्रभावकारी पत्रकारिता गरिरहनुपर्ने जिम्मेवारी हो, त्यसमा हामी पूर्ण रूपमा प्रतिबद्ध नै छौं । अहिले केही समय हाम्रा प्रिन्ट माध्यममात्र स्थगित भएका हुन्, हामीसँग सशक्त डिजिटल माध्यमहरू छँदै छन् । ईकान्तिपुर डट कम, काठमान्डुपोस्ट डट कमलगायत केएमजीका डिजिटल प्लाटफर्ममार्फत हामी छिनछिनमा समाचार, विचार, विश्लेषण, अन्तर्वार्ता, फोटो, भिडियो आदि लिएर आइरहने छौं । केएमजीका अन्य दुई महत्त्वपूर्ण अंगहरू– कान्तिपुर टेलिभिजन र रेडियो कान्तिपुर सदाझैं दर्शक एवम् स्रोताको सेवामा प्रस्तुत भइरहने छन् ।


पाठक र कान्तिपुरबीच झन्डै तीन दशकदेखिको सम्बन्ध यति मजबुत र गाढा छ कि यसलाई कुनै पनि क्षणिक भाइरसले तोड्न सक्ने छैन । अहिलेको बाध्यात्मक निर्णयबाट तपाईंहरूलाई पुग्न गएको असुविधाप्रति हामी क्षमाप्रार्थी छौं ।


यो अभूतपूर्व संकटलाई घरमै बसेर, बाहिरी वस्तु एवम् व्यक्तिहरूसँग टाढै रहेर मात्र जित्न सम्भव छ । आशा छ, हाम्रा सम्पूर्ण पाठकले अहिलेको यो विश्वव्यापी विपत्तिलाई पार लगाउन आ–आफ्नो ठाउँबाट भूमिका खेल्नु हुनेछ ।


प्रकाशित : चैत्र १४, २०७६ ०६:४३
प्रतिक्रिया
पठाउनुहोस्

कान्तिपुर प्रकाशकीय : निर्भीक पत्रकारिताको जग हामी कहिल्यै बिर्सने छैनौं 

प्रकाशकीय

काठमाडौँ — कान्तिपुर पब्लिकेसन्सले आज २७ वर्ष पूरा गरेर २८ औं वर्षमा प्रवेश गरेको छ । यो अवसरमा म कान्तिपुर मिडिया ग्रुपका तर्फबाट हाम्रा सम्पूर्ण पाठकवृन्द, बिक्रेता, वितरक, विज्ञापनदाता, विज्ञापन एजेन्सीलगायत सबै सहयोगी एवं शुभेच्छुक महानुभावहरूलाई हार्दिक मंगलमय शुभकामना व्यक्त गर्न चाहन्छु ।

कान्तिपुरले झन्डै तीन दशकअघि व्यावसायिक पत्रकारिताको जग बसाल्दा मुलुकमा भर्खरै प्रजातन्त्रको पुनरागमन भएको थियो । समाज खुलापनतर्फ लम्किँदै जाँदा हामी पनि त्यसको सहयात्री भई सूचना, समाचार, विश्लेषण र ज्ञान प्रवाह गर्ने अगुवा माध्यम बन्न पुग्यौं । हाम्रो त्यो सुरुवाती निष्ठा एवं प्रतिबद्धतामा कहिल्यै कमी आएको छैन, भलै बेलाबखत प्रतिकूलताका काला बादल छाउने गर्छन् । त्यसलाई चिर्दै अगाडि बढ्न हामीलाई समयले अभ्यस्त बनाइसकेको छ ।

मुलुकमा संवैधानिक संक्रमणको अन्त्य र राजनीतिक स्थायित्वको आगमनसँगै पत्रकारिताको दायरा अरू फराकिलो हुने र यो राम्रोसँग फल्ने–फुल्ने–फस्टाउने हाम्रो बुझाइ थियो । तर, पछिल्ला परिदृश्य अलि फरक देखिएका छन् । यसबीच अनुदारवादी कानुन ल्याई संविधानप्रदत्त अभिव्यक्ति स्वतन्त्रतालाई कस्ने कोसिस किन भइरहेको हो, त्यसको कारण हामीलाई थाहा छैन । तर यो प्रतिकूलताको प्रभाव समाजका अन्य क्षेत्रमा झैं पत्रकारितामा पनि परेको छ । त्यसबाट हामी केही अप्ठेरोमा छौं, तर निष्पक्ष पत्रकारिताप्रति हाम्रो निष्ठामा किञ्चित कमी आउने छैन ।

अहिले मुलुकको आर्थिक परिवेश खल्बलिँदा त्यसको असर समाजभरि परेको छ । त्यही भएर हामीले निजी क्षेत्र र सरकारी निकायहरूबीच सार्थक संवाद होस् भनेर कान्तिपुर इकोनमिक समिट आयोजना गर्‍यौं, जसमा विभिन्न विज्ञ, राजनीतिक नेतृत्व, प्रशासक र उद्योगी–व्यवसायीहरूको सक्रिय सहभागिता रह्यो । हालै हामीले कान्तिपुर कन्क्लेभको दोस्रो संस्करण पनि सम्पन्न गर्‍यौं, जहाँ स्वदेश–विदेशबाट आएका ४० भन्दा बढी वक्ताहरूले दुई दिन सारगर्भित छलफल गरे । सामाजिक उत्तरदायित्वका यस्ता कार्यक्रमलाई हामी निरन्तरता दिनेछौं ।

विगत वर्षमा हामीले पब्लिकेसन्सको आन्तरिक प्रणालीलाई चुस्त बनाउनुका साथै विभिन्न प्रकाशनलाई थप पठनीय बनाउने प्रयास गरेका छौं । डिजिटल संस्करणहरूलाई अद्यावधिक एवं आकर्षक बनाउने काम भएको छ । हामी हाम्रा सबै प्रकाशनहरूलाई अझ राम्रो बनाउन सजगताका साथ निरन्तर लागिपर्ने छौं ।

पाठकहरू नै हाम्रो प्रतिबद्धता र प्रेरणाका स्रोत हुन् । निर्भीक पत्रकारिताको यो जग हामी कहिल्यै बिर्सने छैनौं । धन्यवाद !

प्रकाशित : फाल्गुन ७, २०७६ ०७:४७
पूरा पढ्नुहोस्
प्रतिक्रिया
पठाउनुहोस्
x
×