चिकित्सक र स्वास्थ्य प्राविधिकलाई प्रधानमन्त्रीको आग्रह- सरकार तपाईंहरु सँगै छ, चिन्तित नहोऔं

कान्तिपुर संवाददाता

काठमाडौँ — प्रधानमन्त्री केपी शर्मा ओलीले कुनै चिन्ता नलिई उपचारमा खटिन चिकित्सक र स्वास्थ्य प्राविधिकलाई आग्रह गरेका छन् । बिहीबार अपराह्न ट्वीट गर्दै प्रधानमन्त्री ओलीले सरकारसँगै रहेकाले चिन्तित नभई काम गर्न आग्रह गरेका हुन् ।



‘चिकित्सक तथा प्राविधिक साथीहरु : हाल मौज्दात सामग्रीको आधिकारिक प्रयोगबाट परीक्षण र उपचारमा सामेल होऔं, तपाईंहरुको सिफारिसका थप सामग्रीहरु उपलब्ध हुँदैछन्, धैर्य गरौं, कोभिड–१९ मानवीय संकटको एकजुट भएर सामना गरौं, सरकार तपाईंहरु सँगै छ, चिन्तित नहोऔं’ प्रधानमन्त्रीको ट्वीटमा छ ।


सरकारी तथा निजी स्वास्थ्य संस्थामा कार्यरत चिकित्सक र स्वास्थ्यकर्मीलाई कोभिड–१९ बच्ने सामग्री नभएको समाचार आएपछि प्रधानमन्त्री ओलीले ट्वीटमार्फत उनीहरुलाई आश्वस्त पार्न खोजेका हुन् । कोभिड–१९ परीक्षणका लागि आवश्यक पर्ने स्वास्थ्य उपकरण अभाव भएपछि सरकारले कोरोना संक्रमण जाँच्ने कीट र स्वास्थ्यकर्मीहरुका लागि आवश्यक व्यक्ति सुरक्षा सामग्री (पीपीई) चीनबाट मगाएको छ । यी सामग्री शनिबार साँझसम्म काठमाडौं आउने सरकारी दाबी छ ।


बुधबार पनि प्रधानमन्त्री ओलीले ट्वीटमार्फत अर्को निर्णय नभएसम्मका लागि घरमै बस्न सबै नागरिकलाई आग्रह गरेका थिए । सरकारले मंगलबारदेखि मुलुकभर साताव्यापी लकडाउन घोषणा गरेको छ । अहिलेसम्म नेपालमा कोभिड–१९ बाट तीन जना संक्रमित भएका छन् । एक जना निको भएर घर फर्केका छन् भन् दुई जना उपचारमै छन् ।


यो पनि

प्रधानमन्त्रीको आग्रह–‘अर्को घोषणा नहुँदासम्म घरमै बस्‍नुहोस्’


प्रकाशित : चैत्र १३, २०७६ १८:०९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

खेलकुद मैदानमा बन्यो क्‍वारेन्टाइन स्थल

गिरुप्रसाद भण्डारी

प्यूठान — गृह मन्त्रालयबाट आएको टेन्ट प्रयोग गरी प्यूठान नगरपालिका–४ स्थित गणतान्त्रिक खेलकुद मैदानलाई बिहीबार क्‍वारेन्टाइन स्थल निर्माण गरिएको छ । कोभिड १९ का सम्भावित बिरामीलाई लक्षित गरी ५० जना राख्‍न सकिने गरी क्‍वारेन्टाइन निर्माण गरिएको हो । प्यूठान नगरपालिका र ईन्द्रध्वज गण खलंगाले क्‍वारेन्टाइन स्थल निर्माण गरेको हो ।

हेल्थ क्याम्पसहितको क्‍वारेन्टाइनस्थल निर्माण भएको ईन्द्रध्वज गणले जनाएको छ । क्‍वारेन्टाइन स्थलमा खानेपानी, शौचालयलगायत भौतिक पूर्वाधारको व्यवस्थापनको काम धमाधम भइरहेको प्यूठान नगरपालिकाका मेयर अर्जुनकुमार कक्षपतिले बताए ।

यस्तै प्यूठानमा सबै स्थानीय तहहरुले समेत ५ देखि १० बेडसम्मका क्‍वारेन्टाइन स्थल निर्माण गरेका छन् । लकडाउनको समयमा समेत भारतबाट विभिन्न नाका हुँदै भाग्दै जिल्ला आएकाहरुलाई क्‍वारेन्टाइनमा राख्ने योजना रहेको प्रमुख जिल्ला अधिकारी कृष्णप्रसाद पन्थले बताए ।

विदेशबाट आएकाहरुको लगत लिने काम पालिकामार्फत भइरहेकाले उनीहरुलाई सम्झाइबुझाई बिहीबार बेलुकाबाटै क्‍वारेन्टाइनमा बसाल्न थालिएको ऐरावती गाउँपालिकाका अध्यक्ष नविलबिक्रम शाहले जानकारी दिए ।

प्रकाशित : चैत्र १३, २०७६ १७:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×