पीपीइ र स्वास्थ्य कीट शनिबार आउने, आइतबार वितरण हुने 

सामाग्री लिन नेपाली विमान जाने
बिनु सुवेदी

काठमाडौँ — कोभिड–१९ परिक्षणका लागि आवश्यक पर्ने स्वास्थ्य उपकरण शनिबार साँझ काठमाडौं आइपुग्ने भएको छ । उच्च सरकारी स्रोतले कान्तिपुरलाई दिएको जानकारी अनुसार कोरोनाको संक्रमण जाँच्ने किट र स्वास्थ्यकर्मीहरुका लागि आवश्यक व्यक्ति सुरक्षा सामग्री (पीपीई) आउन लागेको हो । 

‘चीनको गोन्जाओबाट स्वास्थ्य उपकरण ल्याउने हो, शनिबार साँझ सामान काठमाडौं आइपुग्छ,’कोभिड रोग संक्रमण रोकथाम तथा नियन्त्रण उच्चस्तरीय समिति स्रोतले कान्तिपुरसँग भन्यो, ‘आइतबार बिहानै नेपाली सेनाको हेलिकप्टरमार्फत् प्रदेश प्रदेशमा स्वास्थ्य उपकरणहरु पठाइन्छ ।’ व्यवसायीहरुले किनेर ल्याउने यी सामाग्री नेपाल आएपछि सरकारले किनेर वितरण गर्नेछ ।


यसअघि उच्चस्तरीय समितिका संयोजक एवम् रक्षामन्त्री ईश्वर पोखरेलले अत्यावश्यकीय स्वास्थ्य उपकरण शनिबारसम्ममा जसरी पनि ल्याउने बताएका थिए । ‘हामीले जहाँबाट जसरी भए पनि शनिबारसम्ममा अत्यावश्यक स्वास्थ्य उपकरण ल्याउँछौं,’पोखरेलले भनेका थिए । त्यहीअनुरुप पहिलो चरणमा चीनको गोन्जाओबाट स्वास्थ्य उपकरण ल्याउन लागिएको हो ।


यसैबीच,सरकारले निजी क्षेत्रलाई समेत स्वास्थ्य अन्तर्राष्ट्रिय बजारबाट स्वास्थ्य उपकरण खरिदका लागि आह्वान गरेसँगै उनीहरु पनि सामान ल्याउन तयार देखिएका छन् । संस्कृति पर्यटन तथा नागरिक उड्ययन मन्त्रालय स्रोतले कान्तिपुरलाई दिएको जानकारी अनुसार केही निजी क्षेत्रका ब्यापारीले सामान ल्याउनका लागि हवाईजहाजको व्यवस्था गरिदिन नेपाल एअरलायन्सलाई निवेदन दिएका छन् ।


उनीहरुको निवदेनबारे आज दिनभरीमा छलफल गरेर निर्णय गरिने मन्त्रालय स्रोतको भनाइ छ । सरकारले निजी क्षेत्रलाई पनि औषधिजन्य सामाग्री ल्याउन आह्वान गर्दा हवाई यातायातको चाँजोपाँजो मिलाइदिने घोषणा गरेको थियो ।


सामाग्री लिन नेपाली विमान जाने (अपडेट)

स्वास्थ्यमन्त्री भानुभक्त ढकालका अनुसार पहिले चीनले नै कार्गो पठाउने भनिए पनि अब नेपालबाटै सामाग्री लिन विमान चीन जानेछ । 'उताको कार्गो बढी व्यस्त भएकाले अब हामीले नै जहाज पठाउने कुरा भएको छ,' ढकालले भने ।

प्रकाशित : चैत्र १३, २०७६ १५:०८
ADVERTISEMENT
प्रतिक्रिया
पठाउनुहोस्

दोलखामा ५९ आइसोलेसन, २१० क्‍वारेन्टाइन

राजेन्द्र मानन्धर

दोलखा — जिल्लाभरी हालसम्म ५९ वटा आइसोलेसन र २१० वटा क्‍वारेन्टाइनका शय्या निर्माण भएका छन् । कोभिड—१९ को संक्रमणको खतरालाई ध्यान दिँदै बिहीबारसम्म उक्त संख्यामा आइसोलेसन र क्‍वारेन्टाइन निर्माण भइसकेको प्रमुख जिल्ला अधिकारी भीमकान्त शर्माले बताए । 

जिल्ला प्रशासन कार्यालयले संकलन गरेको तथ्याङ्कअनुसार जिल्लाभरी ४८ थान पीपीई (स्वास्थ्यकर्मीले सुरक्षाका लागि लगाउने सामग्री) भित्रिएका छन् । नन कन्ट्याक्ट थर्मल गन २० वटा भित्रिएका छन् । उक्त सामग्रीमध्ये जिल्लाभरीका बिरामी थुप्रने सदरमुकाम चरिकोटस्थित चरिकोट अस्पतालमा भने आठ वटा आइसोलेसन शय्या छ भने क्‍वारेन्टाइन बनाइएको छैन । पीपीई २ वटा र थर्मल गन २ वटामात्रै छ ।

उक्त अस्पतालमा लकडाउनका बेला पनि आकस्मिक सेवाका लागि दैनिक ४५ जनाका दरले बिरामी आइरहेको डा. विनोद दंगालले बताए । स्थानीय सामाग्रीहरुबाट सुरक्षित रहने उपाय निकालेर कार्य गरिरहेको उनले बताए ।

गाउँपालिकाहरुमा भने पीपीई र थर्मल गन किन्ने तथा कक्षहरु निर्माण भइरहेको तथ्याङ्क जिल्ला प्रशासन कार्यालयमा छ । स्वास्थ्यकर्मी र कोरोनाको कुनै पनि उपचार गर्ने दक्ष जनशक्ति नभएका स्थानहरुमा रातारात सामग्री खरिदको आडवाजी गाउँपालिकामा देखिएको छ । किनिएका सामग्रीहरु कतिपयले प्रयोग गर्न नजानेको पाइएको छ ।

बुधबार भएको जिल्ला सुरक्षा समितिको बैठकमा कतिपय गाउँपालिकाहरुले किनेका पीपीई लगाउन नै नजानेको जानकारी आएकोबारे छलफल भयो । कतिपय स्थानमा पीपीई लगाउने, थर्मल गन तेर्साएर फोटो फेसबुकमा हालेर मजाक गरिरहेको पनि देखिएको छ । उक्त पालिकाहरुमा स्वास्थ्यकर्मीहरुको उपस्थिति र नियमित जनस्वास्थ्यसम्बन्धी कार्यक्रम सञ्चालन भएको सूचना भने प्रशासन कार्यालयमा छैन । अति नै सम्वेदनशील र विश्वमा महामारीको रुप लिइरहेको कोरोना भाइरसविरुद्धको अभियानमा सामग्री, सहकार्य र जनशक्तिमा दोलखा कमजोर रहेको पनि छलफल भएको छ ।

केही निजी अस्पतालहरुले आइसोलेसन कक्षको व्यवस्था गरेका जानकारी दिँदै कोरोनाविरुद्धको अभियानमा सरकारलाई सहयोग गरिरहेको दाबी गरेका छन् ।

प्रकाशित : चैत्र १३, २०७६ १४:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×