लकडाउन अभियान प्रभावकारी बनाउन बागलुङमा सेना परिचालन- समाचार - कान्तिपुर समाचार

लकडाउन अभियान प्रभावकारी बनाउन बागलुङमा सेना परिचालन

प्रकाश बराल

बागलुङ — जिल्ला प्रशासन कार्यालय बागलुङले कोरोना भाइरसविरुद्ध लकडाउन अभियानलाई प्रभावकारी बनाउन सेना परिचालन गर्ने भएको छ ।

प्रमुख जिल्ला अधिकारी गौलोचन सैंजुले स्थानीय प्रशासन ऐन २०२८ को दफा ६ को उपदफा ३ बमोजिमको निषेधाज्ञा जारी गर्दै उक्त ऐनको दफा २ बमोजिम जिल्लास्थित अर्जुनवाण गणलाई परिचालित हुन अनुरोध गरेको बताए । सोमबार सुरक्षा समितिको बैठक पनि बसेको थियो । बैठकले संक्रामक रोग ऐनविपरीत कसैले काम गरेमा कानुनबमोजिम कारबाही गर्ने निर्णय पनि गरेको हो ।


आदेश पालना नगर्नेलाई कारबाही गर्ने अधिकार प्रजिअलाई दिइएको छ । ‘निषेधाज्ञा जारी गरेपछि सेना परिचालनको अवस्था बन्छ, बैठकले त्यो तयारी गरेको हो’ प्रहरी उपरीक्षक नवराज भट्टले भने, ‘लकडाउन देशैभर उल्लंघन भएकोले कर्फ्यू समेतमा पुग्ने तयारी भएको हो ।’


संक्रमणको आशंका बढ्दै गएकोले सबैलाई घरभित्रै रहन पनि उनले आग्रह गरे । अहिलेसम्म कर्फ्यू भने जारी भएको छैन । बुधबार बिहानदेखि कर्फ्यू जारी हुन सक्ने अधिकारीहरुले बताए ।


प्रकाशित : चैत्र ११, २०७६ १८:०४
प्रतिक्रिया
पठाउनुहोस्

राजविराजमा सेना खटाइयो

मातृका दाहाल, अवधेशकुमार झा

काठमाडौँ — भारतबाट नेपाल प्रवेश गर्ने राजविराजलगायत आसपासका नाकामा नेपाल प्रहरीलाई हुलहुज्जत भएको भन्दै सेना र सशस्त्र प्रहरीको टोली परिचालन गरिएको छ ।

नेपाली सेनाका प्रवक्ता सहायक रथी विज्ञानदेव पाण्डेले सप्तरीको राजविराजबाट नाकातर्फ नेपाली सेना र सशस्त्र प्रहरीको टोली खटाइएको पुष्टि गरे। उनका अनुसार नाकाबाट नेपाल प्रवेश गर्न पाउनुपर्ने माग गर्दै हुलहुज्जत हुन थालेपछि स्थानीय प्रशासनले सेना र सशस्त्र प्रहरीको टोलीलाई खटाएको हो ।

आधा घन्टाअघि मात्रै सेनाको टोली त्यसतर्फ परिचालन गरिएको छ। अन्य जिल्लामा भने स्थिति सामान्य रहेको र प्रहरी नै अग्र भागमा खटिएको उनले बताए ।

राजविराजस्थित भीम दल गणका गणपति गुप्तबहादुर कुँवरले नेपाल प्रहरी र सशस्त्र प्रहरीको संख्या कम रहेकाले सहयोगका लागि सेना खटाइएको बताए । उनले भने, 'हामीलाई माथिल्लो निकायको आदेश अनुसार लकडाउनमा सहयोगका लागि खटाइएको हो ।'

सप्तरीको राजविराज, रुपनी, कल्याणपुर र हनुमान नगरमा सेना खटाइको गणपति कुँवरले कान्तिपुरलाई बताए ।

प्रकाशित : चैत्र ११, २०७६ १७:४६
पूरा पढ्नुहोस्
प्रतिक्रिया
पठाउनुहोस्
×