नेकपाले सांसदलाई मतपत्र देखाउन भनेपछि विवाद- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेकपाले सांसदलाई मतपत्र देखाउन भनेपछि विवाद

सन्तोष सिंह

जनकपुर — प्रदेशको नामाकरणका लागि राखिएको प्रस्तावमा क्रस भोटिङको डरले नेकपाले आफ्‍ना सांसदलाई मत पत्र खसाल्नुअघि मतपत्र देखाउन भनेपछि विवाद भएको छ ।

सत्ता पक्ष राजपा र समाजावादीले प्रस्ताव गरेको 'मधेस प्रदेश'मा मतादान सुरु भएसँगै नेकपाले आफ्‍ना सांसदले हालेको मतपत्र हेर्न अर्का सांसदलाई लगाएपछि विवाद भएको हो ।


नेकपाका सांसद दिलीप साहले मतदान गरेपछि नेकपाकै अर्का सांसद किशोरी साहलाई मतपत्र देखाउँदै मतपेटिकामा मत खसालेका थिए । नेकपाले सत्तारुढ दलले राखेको प्रस्तावको वि‍पक्षमा मत हालेको निश्चित गरेपछि मात्रै आफ्‍ना सांसदलाई मतपेटिकामा मत खसाल्न लगाएपछि विवाद भएको हो ।


नेकपाले पार्टीको ह्विप नमान्‍न सक्ने सांसदहरुको सूची नै तयार पारेर उनीहरुको पछाडि अर्को सांसद खटाएर मतपत्र देखाएर मतपेटिकामा खसाल्न लगाएको छ ।


प्रदेश २ को नामकरण लागि जारी मतदानमा 'क्रस भोटिङ' भएपछि प्रतिपक्ष कांग्रेसले पनि आफ्‍ना पार्टीका सांसदहरुलाई ह्विप जारी गरेको छ ।


प्रदेशको नामकरणका लागि नेकपा, कांग्रेस र बारा-पर्साका सांसदले राखेको प्रस्ताव बहुमतले अस्वीकृत गरेको छ। नेकपाले प्रदेशको नाम 'जानकी', कांग्रेसले 'मिथिला-भोजपुरा' र बारा-पर्साका सांसदले 'मध्य मधेस' नाम प्रस्ताव गरेका थिए ।


यो पनि पढ्नुहोस्ः

क्रस भोटिङको डरले कांग्रेसले घेरामा राख्‍यो आफ्ना सांसद

प्रकाशित : चैत्र ४, २०७६ १९:४०
प्रतिक्रिया
पठाउनुहोस्

पनौतीको कर्फ्यू ८ बजेदेखि हट्ने

नगेन्द्र अधिकारी

काभ्रे — जिल्लाको पनौती नगरपालिकामा स्थानीय प्रशासनले लगाएको कर्फ्यू मंगलबार राति आठ बजेदेखि हट्ने भएको छ । टिपरको ठक्करबाट आमाछोरीको मृत्युको विषयलाई लिएर भएको प्रदर्शनले उग्र रुप लिनसक्ने आँकलन मंगलबार बिहानदेखि स्थानीय प्रशासनले कर्फ्यू जारी गरेको थियो । 

अर्को सूचना जारी नभएसम्मको लागि बिहानदेखि पनौती बसपार्क आसपास लगाइएको कर्फ्यु राति ८ बजेदेखि खुलाउने निर्णय भएको प्रमुख जिल्ला अधिकारी श्रवणकुमार तिमल्सिनाले जानकारी दिए ।

सोमबार पनौतीमा बा५ख ५४८० नम्बरको टिपरले ठक्कर दिँदा खानीखोला गाउँपालिका–१ की २६ वर्षीय जुनीमाया तामाङ र ३ वर्षीय छोरी स्मारिकाको मृत्यु भएको थियो । आक्रोशित आफन्त र स्थानीयले प्रदर्शन थालेपछि प्रहरीसँग तनावको स्थिति बनेको थियो । स्थिति नियन्त्रणमा लिन प्रहरीले हवाइ फायर र अश्रुग्यास प्रहार गरेको थियो । गोलीको छर्रा लागेर प्रहरी हवल्दारसहित ६ प्रहरी र ३ स्थानीय घाइते भएका थिए । छर्रा कसरी लाग्यो भन्ने विषयमा प्रहरीले अनुसन्धान भइरहेको जनाएको छ ।

खानीखोला–१ स्थित कालिका प्राथमिक विद्यालयको प्रधानाध्यापक रहेकी उनले परीक्षा व्यवस्थापनको जिम्मेवारी अरुलाई दिएर स्वास्थ्य जाँचका लागि बनेपा आउँदै गर्दा टिपरले ठक्कर दिएको थियो । मृतकको शव पोस्टमार्टमको लागि शीर मेमोरियल अस्पतालमा राखिएको छ ।

प्रकाशित : चैत्र ४, २०७६ १९:३८
पूरा पढ्नुहोस्
प्रतिक्रिया
पठाउनुहोस्
×