प्रदेश २ को नाम 'जानकी' राख्ने नेकपाको प्रस्ताव अस्वीकृत
जनकपुर — प्रदेश २ को नाम जानकी राख्ने नेकपाको प्रस्ताव अस्वीकृत भएको छ । प्रदेशको नाम 'जानकी' राख्ने नेकपाको पक्षमा ३७ मत मात्रै खसेको छ । मतदानमा प्रदेशका एक सय ७ जना प्रदेश सांसदहरुले मत खसालेका थिए ।
प्रदेशसभामा नेकपाका ३२ सांसद छन् । नेकपाको प्रस्तावमा ३७ मत खसेपछि कुन दलका सांसदले नेकपाको प्रस्तावमाथि समर्थन गरे भने खुल्न सकेको छैन ।
नेकपाले प्रस्ताव गरेको नाम अस्वीकृत भएसँगै अब कांग्रेसले राखेको प्रस्तावमाथि मतदान हुनेछ । कांग्रेसले प्रदेश २ को नाम 'मिथिला भोजपुरा' प्रस्ताव गरेको छ ।
मतदानको प्रक्रियामा प्रदेशको नाम र राजधानी पारितका लागि दुई तिहाइ मत आवश्यक पर्छ। प्रदेश सभामा सत्तापक्ष समाजवादीको ३०, राजपाको २५ सांसद गरी ५५ जना छन् ।
दुई तिहाइका लागि सत्ता पक्षलाई थप १७ जना सांसद आवश्यक पर्छ। नेकपाको ३२, कांग्रेसको १९ र संघीय समाजवादी पार्टीको एक सांसद छन्।
प्रकाशित : चैत्र ४, २०७६ १५:५२