कोरोना प्रभाव : सरकारले सुपथ मूल्यका पसल खोल्ने- समाचार - कान्तिपुर समाचार

कोरोना प्रभाव : सरकारले सुपथ मूल्यका पसल खोल्ने

निगमले शनिबार पनि पेट्रोल डिपो खुला गर्ने
जयसिंह महरा

काठमाडौँ — सरकारले कोरोना भाइरस संक्रमणलाई लक्षित गरी सुपथ मूल्यका पसल सञ्‍चालन गर्ने भएको छ । 

संसद्को उद्योग तथा वाणिज्य र श्रम तथा उपभोक्ता हित समितिमा कोरोना भाइरस संक्रमणको जोखिमबारे मंगलबार भएको छलफलमा उद्योग, वाणिज्य तथा आपूर्तिमन्त्री लेखराज भट्टले

दैनिक उपभोग्य वस्तु सुपथ मूल्यमा सहजरुपमा उपलब्ध गराउन पसल खोल्न लागेको जानकारी गराएका हुन् ।


'खाद्यान्‍नको सस्तो पसल निश्चित ठाउँहरुमा खोल्ने तयारी खाद्य संस्थान र साल्ट ट्रेडिङ कर्पोरेसनले गरिरहेको छ, मोबाइल पसलहरु पनि सञ्चालन गर्ने सरकारको तयारी छ', मन्‍त्री भट्टले भने, 'यसले मूल्यवृद्धि र अभाव सिर्जना गर्नबाट रोक्ने छ ।'


उनले ७७ वटै जिल्लामा गृहमन्त्रालयसँग समन्वय गरेर कालोबजारी गर्नेलाई कानुन दायरामा ल्याउने काम भइरहेको पनि बताए । मन्‍त्री भट्टले चेतावनी दिँदै भने, 'कतै कालोबजारी र मूल्यवृद्धि गरेको भेटिए उदार र लचक हुने भन्ने छैन ।'


मन्त्री भट्टले खाद्यान्न, औषधि, ग्यास, पेट्रोलको कुनै अभाव नरहेको भन्दै नेपाल आयल निगमले शनिबार दिउँसो १ बजेसम्म पेट्रोल डिपो खोल्ने जानकारी पनि दिए । उनले सरकार क्षमता, स्रोत, साधनभन्दा बढी तयारीमा रहेको दाबी गर्दै भने, 'जनताले २ बजे राति बोलाए पनि हामी उपलब्ध हुन्छौं । बिदा पनि नभनी हामी २४ सै घण्टा खटिएका छौं ।'


'बुधबारदेखि बजारमा १ लाख मास्क जान्छ'

समिति बैठकमा उद्योग, वाणिज्य तथा आपूर्ति मन्त्रालयका सचिव वैकुण्ठ अर्यालले बुधबारदेखि बजारमा १ लाख थान मास्क जाने जानकारी दिए ।


त्यसअघि मन्त्री भट्टले सोमबार कब्जामा लिइएका मास्क गुणस्तरीय रहेन छ भन्ने प्रहरीले जानकारी दिएको बताएका थिए ।

प्रकाशित : चैत्र ४, २०७६ १५:५२
प्रतिक्रिया
पठाउनुहोस्

अलमलमा 'प्रेमगीत ३' र 'चपली हाइट ३'को प्रदर्शन 

कान्तिपुर संवाददाता

काठमाडौँ — पोस्ट प्रडक्सनमा रहेको 'प्रेमगीत ३' को निर्माण टिमले फिल्मको प्रदर्शन चैत २८ का लागि तय गरेको थियो । यो फिल्मसँगै अर्जुन कुमार निर्मित 'चपली हाइट ३' पनि प्रदर्शनमा आउने तयारी छ । यी दुई फिल्म प्रदर्शनमा आउन २४ दिन बाँकी छ । तर, दुई फिल्मले अझै प्रचार थालेका छैनन् । 

प्रचार सामाग्रीका रुपमा फिल्मका गीत भने दुवै टिमले सार्वजनिक गर्यो। अरु बेला फिल्मको प्रदर्शन मिति नजिकिँदै जाँदा प्रचार सुरु भइसक्थ्यो । तर, अहिलेसम्म दुई फिल्मका कलाकारले समेत फिल्मको प्रदर्शनलाई लिएर केही बोलेका छैनन् ।

कोरोना भाइरस (कोभिड-१९) को त्रासले गर्दा दर्शक भिडभाडमा जान कम गरेका छन् । हलमा दर्शक संख्या घटेको छ । त्यसैले यी फिल्मको प्रदर्शन मितिलाई पनि कोरोनाको प्रभाव पर्ने देखिन्छ । 'प्रेमगीत ३'का निर्माता सन्तोष सेन फिल्मको प्रदर्शनलाई लिएर अझै अलमलमा छन् । फिल्मको प्रदर्शनलाई लिएर निर्माण टिमबीच छलफल पनि गरे । यो एक हप्ताभित्रमा कोरोनाको प्रभाव उस्तै रहे फिल्मको प्रदर्शन सार्ने तयारीमा छन् निर्माता सेन ।

'कोरोनाले हाम्रो फिल्ममा असर त गरेको छ नि । अब सबै ठाउँ सुनसान छ' सेनले सुनाए । कोरोनाकै कारण अहिलेसम्म फिल्मको ट्रेलर र गीत सार्वजनिक गर्न नसकेको उनले बताए । उता 'चपली हाइट ३'का निर्माता अर्जुनले भने फिल्म हल बन्द भए मात्रै फिल्मको प्रदर्शन सार्ने बताए।

यसअघि सुदर्शन थापा निर्देशित 'म यस्तो गीत गाउँछु २' र पत्रकार फूलमान वलको 'नीरफूल' फिल्मको प्रदर्शन मिति पछि सारिएको छ ।

प्रकाशित : चैत्र ४, २०७६ १५:५१
पूरा पढ्नुहोस्
प्रतिक्रिया
पठाउनुहोस्
×