पत्रकार साहको हत्याका अभियुक्त थुनामा- समाचार - कान्तिपुर समाचार
कान्तिपुर वेबसाईट
AdvertisementAdvertisement

पत्रकार साहको हत्याका अभियुक्त थुनामा

कान्तिपुर संवाददाता

बारा — बारा जिल्ला अदालतले पत्रकार वीरेन्द्रकुमार साहको हत्याका मुख्य अभियुक्त कुन्दन भनिने नरेन्द्र फौजदारलाई मुद्दाको थप पुष्टिका लागि बिहीबार थुनामा पठाउने आदेश दिएको छ । न्यायाधीश खिलनाथ रेग्मीको इजलासले बिहीबार फौजदारलाई पुर्पक्षका लागि थुनामा राख्ने आदेश दिएको हो ।

प्रहरीले फौजदारलाई घटनाको १२ वर्षपछि गत आइतबार घरबाटै पक्राउ गरेको थियो । बारागढी गाउँपालिका–६ गडहल गाउँका ५१ वर्षीय फौजदार राजनीतिक संरक्षणमा लुकिछिपी बस्दै आएका थिए । तत्कालीन नेकपा माओवादीका जिल्ला नेता र कार्यकर्ताको समूहले रिपोर्टिङमा रहेका एभिन्युज टेलिभिजनका संवाददाता साहलाई २०६४ असोज १८ मा पिपरा बजारबाट मोटरसाइकलमा अपहरण गरी गोली हानेर हत्या गरेको थियो ।


जिल्ला अदालतका स्रेस्तेदार कौशलेश्वर ज्ञवालीका अनुसार विपक्षीको साक्षीको बकपत्र बुझ्‍न बाँकी रहेकाले तत्कालका लागि थुनामा पठाउने आदेश भएको बताए । हत्याका पाँच अभियुक्तमध्ये फौजदार मुख्य हुन् ।


फौजदारमाथि डाँका र लागूऔषधसम्बन्धी मुद्दा पनि छन् । हत्याको योजनाकार लालबहादुर चौधरी र हरेराम पटेल अझै फरार छन् । फौजदार, चौधरी र पटेल तत्कालीन माओवादीका जिल्ला सचिवालय सदस्य थिए । अर्का अभियुक्त मैनेजर गिरी ११ वर्ष जेल जीवन बिताएपछि राष्ट्रपतिबाट सजाय मिनाहामा परी छुटिसकेका छन् । अर्का अभियुक्त रामएकवाल सहनी जेलमै छन् । जिल्ला अदालतले २०६८ जेठ १६ मा गिरी र सहनीलाई सर्वस्वसहित जन्मकैदको फैसला गरेको थियो ।

प्रकाशित : फाल्गुन २९, २०७६ २०:०५
प्रतिक्रिया
पठाउनुहोस्

प्रदेश १ सरकारले श्रीलंका टापु र टाँडीमा क्वारेन्टाइन बनाउने

कान्तिपुर संवाददाता

मोरङ — प्रदेश १ सरकारले कोभिड १९ को संक्रमणको रोकथाम, उपचार र पुनःस्थापनाका लागि योजनाबद्ध तयारी थालेको छ । सरकारले सुनसरीको श्रीलंका टापु र मोरङको टाँडीस्थित सैनिक ब्यारेक क्षेत्रमा क्वारेन्टाइन स्थापना गर्ने निर्णय गरेको छ ।

प्रदेश मन्त्रिपरिषद्को बिहीबारको बैठकले एकीकृत कार्ययोजना पारित गरी कार्यान्वयन गर्न सम्बन्धित निकायलाई निर्देशन दिइसकेको मुख्यमन्त्री शेरधन राईले बताए ।

‘कार्ययोजनामा सही सूचना सम्प्रेषणदेखि संक्रमितहरूको गोपनीयता राख्नेसम्मको योजना छ,’ उनले भने, ‘२३ बुँदे एकीकृत कार्ययोजना तत्काल कार्यान्वयन गर्दै कोभिड–१९ को संक्रमण फैलिन नदिन, फैलिहाले रोकथाम तथा उपचार र पुनःस्थापना गर्ने गरी काम अघि बढाएका छौं ।’

कार्ययोजनामा व्यक्तिगत सरसफाइबारे सचेतना फैलाउने, अन्तर्राष्ट्रिय र प्रदेश नाकाका साथै भद्रपुर, विराटनगर र लुक्ला विमानस्थलमा स्क्रिनिङ डेस्क स्थापना गर्ने, आवश्यक जनशक्ति, व्यक्तिगत सुरक्षात्मकलगायतका उपकरणको प्रबन्ध गर्ने उल्लेख छ । शंकास्पद व्यक्तिलाई उक्त डेस्कबाट क्वारेन्टाइन वा आइसोलेसन वार्डसम्म पु‍र्‍याउन मेडिकल टोलीसहित २० वटा एम्बुलेन्सको व्यवस्था गरिएको कार्ययोजनामा उल्लेख छ ।

प्रत्येक नाकामा ९ र विमानस्थलमा ६ जनाका दरले स्वास्थ्यकर्मी परिचालन गर्ने, पर्याप्त औषधि, औजार र उपकरणको मापदण्ड बमोजिम स्टक, भण्डारण र ढुवानीको व्यवस्था गर्ने तथा नागरिकमा सचेतना अभिवृद्धि गरिने सरकारले जनाएको छ ।

त्यसैगरी, स्वास्थ्य तथा शिक्षण संस्था, सरकारी तथा निजी कार्यालय, उद्योगलगायत क्षेत्रमा ठूलो संख्यामा सर्वसाधारणको जमघटलाई निरुत्साहित गराइने योजनामा उल्लेख छ ।

प्रकाशित : फाल्गुन २९, २०७६ १९:४८
पूरा पढ्नुहोस्
प्रतिक्रिया
पठाउनुहोस्
×