वुहानका नेपाली ढुक्क

‘चीन सरकारले सेवा–सुरक्षासहित हेरचाह गरिरहेको छ, चाहिएको सामान पाइन्छ’
लक्ष्मी लम्साल

बेइजिङ — चीनको हुबेई प्रान्तका विभिन्न स्थानबाट नेपाल फर्कन नपाएका र फर्कन नचाहेका नेपालीले आफूहरू कोभिड–१९ बाट सुरक्षित रहेको जानकारी दिएका छन् । हुबेईको वुहान कोभिड–१९ को उद्‍गमस्थल मानिएको छ ।

हुबेईमा रहेका नेपालीमध्ये १ सय ७५ जनालाई सरकारले गत फागुन ३ मा नेपाल लगेको थियो । फर्कन चाहेकामध्ये चार जनामा ज्वरो देखिएपछि वुहानको थ्येनह विमानस्थलमा रोकिएका थिए । दुई जना उनीहरूका परिवारका सदस्य थिए । तर त्यतिबेला घर फर्कन नपाउँदा खिन्न भएका उनीहरूले चीन सरकारले आवश्यक सेवा–सुरक्षासहित हेरचाह गरेकाले कुनै भय नरहेको बताउँछन् ।


‘मेरा कारणले बच्चा र श्रीमती फर्किन नपाउने वा अस्पतालको निगरानीमा बस्नुपर्ने चिन्ताबाहेक बढ्दो तापक्रमकै कारण म भने चिन्तित थिइनँ,’ वुहान विश्वविद्यालयमा विद्यावारिधि गरिरहेका बिगेशमान शाक्यले भने । उनी हाल परिवारसहित विश्वविद्यालयको छात्रावास बाहिर बसिरहेका छन् । आफूहरूलाई स्थानीय सरकारले आवश्यक उपभोग्य सामान उपलब्ध गराउने उनले बताए । उनले भने, ‘केही महँगो पर्ला वा केही दिन ढिलो हुन सक्ला तर चाहिएका सामान आपूर्तिमा खासै समस्या आएको छैन ।’ कतिपय सामान अनलाइनमार्फत अर्डर गर्ने गरेको उनले बताए ।


वुहानस्थित सेन्ट्रल चाइना नर्मल विश्वविद्यालयमा अन्तर्राष्ट्रिय सम्बन्ध अध्ययन गरिरहेका झमकुमार विश्वकर्माले ‘आफूले चाहेरै नेपाल नफर्किएको’ बताए । त्यहाँ अध्ययनरत ६ जना नेपालीमध्ये तीन जना कोभिड–१९ को त्रास फैलिनुअघि नै घर फर्किएका थिए भने दुई जनालाई सरकारले ल्याएको हो । उनले आफू चीनमै सुरक्षित ठानेर घर फर्कन नचाहेको बताए । ‘महामारीका बेला सुरक्षा महत्त्वपूर्ण कुरा थियो,’ उनले भने, ‘चीन सरकारले पनि राम्रो सुरक्षा तथा रेखदेख गरिरहेका बेला हतासिएर फर्किनुपर्ला जस्तो लागेन ।’


हुबेईमा रहेका नेपालीहरूको अपेक्षा गर्मीयामको सुरुवातसँगै स्थिति सुधार होला भन्ने छ । पछिल्ला दिनमा चीनमा संक्रमितको आँकडा घट्दै गइरहेकाले पनि स्थानीय आशावादी छन् । विश्वकर्माले बाहिर प्रचार गरिएजस्तो कुनै असुरक्षा वा खानपानको अभाव भोग्न नपरेको बताए । उनका अनुसार हुबेईमा बस्दै आएका झन्डै दुई दर्जन नेपाली अहिलेसम्म सुरक्षित छन् ।


छिङ्चौ याङ्त्से विश्वविद्यालयमा डर्माटोलोजी (छालासम्बन्धी रोग) अध्ययन गरेका काठमाडौंका कुनाल साह ग्र्याजुएसन सकेलगत्तै घर फर्किने तर्खरमा थिए तर त्यस दिनको धपेडीले ज्वरो आएपछि उनी फर्कन पाएनन् । सुरुमा उनले पनि नरमाइलो मानेका थिए । ‘तर क्वारेन्टाइनमा बसेर संक्रमणमुक्त भइसकेको अवस्थामा थप चिन्ता लिनुपरेन,’ उनले सुनाए । उनको अबको चिन्ता भनेको पढाइ सकिएपछि पनि यत्तिका समय चीनमै रहनुपर्दाको खर्च धान्नेबारे मात्रै केन्द्रित छ ।


भाइरसको संक्रमण फैलिएसँगै हुबेई प्रान्त ‘लक डाउन’ गरिएपछि अन्य देशका घर फर्के पनि पाकिस्तानी विद्यार्थी फर्कन चाहेनन् । वुहानमा भारतीयले चलाएको इन्डियन मार्का होटलमा काम गर्ने ११ नेपालीमध्ये एक जनामात्रै चार्टर्ड फ्लाइटमै फर्किएका थिए । त्यहाँ कार्यरत सेफ पुष्कर खड्काको शव अझै पनि अस्पतालमै छ भने अन्य नौ जना नेपाली कामदारको स्थिति सहज भएर काममा फर्कने प्रतीक्षामा छन् । खड्काको भने कोभिड–१९ बाट नभई अन्य कारणले मृत्यु भएको हो । प्रकाशित : फाल्गुन २८, २०७६ ०७:३३

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सक्रिय हुँदै चिनियाँ औद्योगिक क्षेत्र

लक्ष्मी लम्साल

(बेइजिङ) — आकस्मिक रूपमा देखापरेको कोरोना भाइरसका कारण शिथिल बनेको चिनियाँ औद्योगिक एवं व्यापारिक क्षेत्र होसियारीपूर्वक पुनः सक्रिय हुन थालेको छ । आन्तरिक एवं बाह्य व्यापारिक गतिविधि प्रभावित हुन थालेपछि एक महिना नपुग्दै चीनले पुनः निरन्तरता दिन थालेको हो । यसका लागि चिनियाँ उद्योगलाई स्वास्थ्य सुरक्षा प्राथमिकतामा राखी कार्यस्थललाई पूर्णतया भाइरसमुक्त बनाउनुपर्ने सर्त राखिएको छ ।

चीनले सक्रिय रूपमा विभिन्न स्वदेशी, विदेशी उद्यम तथा संस्थाको उत्पादन पुनः सुरु गरिरहेको चीनको परराष्ट्र मन्त्रालयका प्रवक्ता कङ स्वाङले बताए । ‘चीनले विदेशी उद्यमहरूको लगानी, उत्पादन र सञ्चालनमा भोगेका व्यावहारिक समस्या पनि समाधान गरिरहेको छ,’ उनले भने । चिनियाँ अर्थव्यवस्थामा महामारीको प्रभाव अस्थायी प्रकृतिको भएको र विश्व आपूर्ति शृंखलामा असर पर्ने सोचेर चीनबाट विस्थापित हुन खोजेका विदेशी कम्पनी चीनमै यथावत् रहने उनले बताए । यसअघि मंगलबार चीनको राज्य परिषद्को महामारी रोकथाम तथा नियन्त्रणसम्बन्धी पत्रकार सम्मेलनमा राष्ट्रिय स्वामित्वको सम्पत्ति अनुगमन तथा व्यवस्थापन आयोगले केन्द्रीय उद्योग व्यवसायहरूको मातहतका २० हजार वटा मुख्य उत्पादनमूलक उद्योग व्यवसायले काम सुरु गर्ने जानकारी दिएको छ । योसँगै चीनमा उत्पादन उद्योगको पुनः सुरु दर ८० प्रतिशतभन्दा बढी भएको छ । आयोगले रोकथाम तथा नियन्त्रणका पूर्वसर्तसहित उत्पादन पुनः सुरु गर्न निर्देशन दिएको पनि जनाएको छ । कोरोना संक्रमणसँगै चीनले आफ्नो अर्थतन्त्रलाई धरमर हुन नदिन महामारी नियन्त्रण र उद्योगहरूको पुनः सञ्चालनबीच सन्तुलन राख्ने बताएको छ ।

चीनको राष्ट्रिय विकास तथा सुधार आयोगले हुबेईबाहेक देशका ३० प्रान्तस्तरीय क्षेत्रले उद्योगका काम तथा उत्पादन क्षमतालाई पुनः सुरु गरेका छन् । आयोग अधिकारी छन ताले भनिन्, ‘उत्पादन तथा कार्यालय पुनः सुरु गर्नुपूर्व नै
भाइरस रोकथाम तथा नियन्त्रण संयन्त्रलाई चुस्त दुरुस्त राख्न अगाडि नै सूचित गरिएको छ ।’

कोरोनाको कहरकै बीच चीन–युरोप मालबाहक रेल गत सोमबार नानछानबाट रसिया तथा बेलारुसका लागि छुट्यो । रेलमा लादिएका सामग्रीमा अटो पार्ट्स, मेकानिकल सामग्री, लत्ता कपडालगायत गरी पाँच मिलियन डलर बराबरका छन् । निर्यातका लागि हिँडेको चिनियाँ रेलवेका स्टाफको पहिला स्वास्थ्य परीक्षण गरिएको थियो । उनीहरू स्वस्थ रहेको पुष्टि भएपछि काममा खटाइएको थियो भने रेललाई पूर्णतया भाइरसमुक्त बनाएपछि मात्रै विदेशका लागि पठाइएको हो ।

गत मंगलबार राति रेल चीनको सान्तोङ प्रान्तस्थित छिङ्ताउ तटवर्ती सहरबाट केन्द्र एसियाका लागि प्रस्थान गरेको छ । कोरोना महामारीपछि यसले एसियातिरको व्यापारिक गतिविधिलाई पुनः सुरु भएको संकेत गरेको छ । जापान, दक्षिण कोरिया र केन्द्रीय एसियाली मुलुक कजाकस्तान पुगेर रेलले सामग्री निर्यात गर्नेछ । चीनका प्रायः अटो कम्पनी यतिखेर मास्क उत्पादनमा सक्रिय छन् । कोरोना संक्रमणसँगै बजारको माग बुझेर उनीहरूले आफ्नो उत्पादन क्षमतालाई त्यसतर्फ मोडेका हुन् । चिनियाँ उद्योग तथा सूचनाप्रविधि मन्त्रालयका अनुसार दैनिक २० मिलियन मास्क उत्पादन भइरहेको छ । त्यसमध्ये २.२ मिलियन मास्क सर्जिकल प्रयोग तथा ६ लाख मास्क एन–९५ छन् । चिनियाँ वसन्त पर्वको बिदा अवधिमा मास्कको उत्पादन तथा सप्लाई रोकिएकाले अझै पनि चीनमा मास्कको अभाव छ । अटो मोबाइलमा प्रयोग हुने ध्वनि प्रतिरोधी उपकरण नै मास्क बनाउन प्रयोग हुने पोलिप्रोपिलेन फाइबरका लागि मिल्ने भएकाले कार उत्पादक कम्पनीलाई मास्क उत्पादक कम्पनीमा रूपान्तरण हुन समस्या छैन । चीनमा गत फेब्रुअरी २ देखि नै मास्क उत्पादनको क्षमता बढ्दै गएको छ । तर पनि अझै यसको माग बढ्दो छ ।

चीनका मुख्य २२ प्रान्तको गत साताको तथ्यांकअनुसार बिजुली, ग्यास र पेट्रोलको आपूर्तिका साथै नागरिक उड्डयन, रेल तथा जलपरिवहन पुनः सुरु भइसकेका छन् । कोरोना भाइरस रोकथाम तथा नियन्त्रण गर्ने पोसाक उत्पादन पुनः सुरु दर ७७, खाद्यान्न उत्पादनको दर ९४.६ तथा कोइला खानी उद्योगको उत्पादन दर ५० प्रतिशत पुगेको छ । कोरोना भाइरसविरुद्ध सम्बन्धित उद्योग व्यवसायबाट सेवासुविधा प्राथमिकतासाथ उपलब्ध गराउने, भाइरस संक्रमणका कारण पृथकीकरणको नीतिबाट प्रभावित परिवहन व्यवसायलाई पुनः उकास्ने मध्यम र साना उद्योग व्यवसायका साथै निजी व्यवसायलाई वित्तीय समर्थन दिने कुरा चीनले प्राथमिकतामा राखेको जनाएको छ । वित्तीय प्रणालीको डिजिटल प्रवर्द्धन र वित्तीय अनलाइन सेवा तथा सञ्चालन क्षमता बलियो बनाउनुपर्नेमा चीनले जोड दिएको छ ।

प्रकाशित : फाल्गुन १३, २०७६ ०७:४२
पूरा पढ्नुहोस्
प्रतिक्रिया
पठाउनुहोस्
×