राष्ट्रिय सभाका दुई वर्ष ‘कभी खुसी कभी गम’ : सांसद ओली 

कैलाली स्थायी घर भएकी ओलीले यी दुई वर्षमा आफ्‍ना बुबाको निधन भएको, तत्कालीन मन्त्री रवीन्द्र अधिकारीको निधन भएकोलाई दुःखका रूपमा व्याख्या गरिन् भने कैलाली क्षेत्र नम्बर १ को संसदीय क्षेत्र विकास कोषको रकम विनियोजन, छोरीको विवाहलगायतका घटनालाई खुसीका रूपमा अर्थ्याइन् ।

राष्ट्रिय सभा सदस्यका रूपमा सधैं स्थानीय तह र प्रदेश सरकारलाई बलियो बनाउने विषयमा काम गरिएको ओलीको भनाइ थियो । उनले संसदबाट बाहिरिन लागेकोबारे भनिन्, 'हाम्रो जीवन अस्थायी छ, त्यस्तै पद र समय पनि स्थायी छैन ।'

जिम्मेवारी पाउँदा पारदर्शी रूपमा काम गर्नुपर्ने उनको भनाइ थियो । 'यो ठाउँ स्थायी हो, पात्र बदलिइरहन्छन् । जब ठाउँ पाउँछौँ त्यो बेला कति के गर्‍यौं भन्ने आम जनताले बुझ्ने कुरा हो,' उनले भनिन् ।

कैलाली क्षेत्र नम्बर १ बाट निर्वाचित सांसद रेशम चौधरी जेलमा रहेकाले उक्त क्षेत्रका जनता अभिभावकविहीन भएको ओलीको भनाइ थियो । उनले सरकारलाई आग्रह गरिन्, 'थारु समुदायले आन्दोलन गर्न लागेका छन् । थारु र पहाडी भनेर अलग गर्नु हुँदैन । सरकारले रेशम चौधरीबारे सत्यतथ्य पत्ता लगाउनुपर्छ ।'

अर्थमन्त्री युवराज खतिवडालाई बजेट विनियोजनमा सांसदहरूबीच विभेद नगर्न पनि उनले आग्रह गरिन् । उनले भनिन्, 'अर्थमन्त्रीलाई अनुरोध गर्छु, सांसदहरूबीच बजेट विनियोजनमा नगर्नुहोला । सबै सांसदले आफ्नो क्षेत्रमा केही गर्ने सोचेर आएका हुन्छन् । अब आउने बजेटमा विभेद हुनु हुँदैन ।'

दुई वर्षे कार्यकाल कामका हिसाबले राम्रो रहेको ओलीको समीक्षा थियो । आजबाट १९ जना राष्ट्रिय सभा सदस्यको कार्यकाल सकिँदैछ ।