नेपाल भ्रमण वर्षको विदेशमा हुने प्रवर्द्धनात्मक कार्यक्रम स्थगित : मन्त्री भट्टराई

आनन्द गौतम

ताप्लेजुङ — संस्कृति पर्यटन तथा नागरिक उड्डयन मन्त्री योगेशकुमार भट्टराईले विदेशमा गरिने प्रवर्द्धनात्मक कार्यक्रम केही समय स्थगित गर्ने बताएका छन् । 

ताप्लेजुङमा आयोजित कार्यक्रममा मन्त्री भट्टराईले समय अनुकुल नहुँदासम्म विदेशमा हुने कार्यक्रम स्थगित गर्ने निर्णय भएको बताएका हुन्। ‘हामीले मन्त्रालयको तर्फबाट भनेका छौं, विदेशमा हुने नेपाल भ्रमण वर्षको कार्यक्रम केही समयका लागि स्थगित हुन्छन्,’ भट्टराईले भने, ‘जुन दिन समय अनुकूल हुन्छ, यो सन्त्रासबाट दुनियाँले मुक्ति पाउँछन्, त्यसपछि फेरि उच्च तयारीका साथ विदेशी बजारमा नेपालको प्रवर्द्धनात्मक कार्यक्रमलाई जोड्नेछौं, अगाडि बढाउने छौं।’

अमेरिका, चीन जस्ता विश्वका ठूला बजार प्रभावित भएको अवस्थामा आफूहरु पनि गम्भीर बन्ने भट्टराईले बताए। नेपालीहरु पनि ठूलो संख्यामा भ्रमणमा निस्कने गरेकाले अब आफ्नै देश घुम्न जान प्रेरित गर्ने उनले बताए।

कोरोना संक्रमित देशबाट निर्बाध नेपाल प्रवेश

भट्टराईले आन्तरिक पर्यटकको कार्ययोजना प्रस्तुत गर्ने पनि बताए। नेपालको पर्यटकीय क्षेत्र र होटल व्यवसाय चलायमान बनाउन आन्तरिक पर्यटकमा जोड दिने नीति लिने मन्त्रालयको तयारी रहेको मन्त्री भट्टराईले बताए।

बर्लिनमा हुने अन्तर्राष्ट्रिय पर्यटन महोत्सव (आईटीबी-२०२०) कार्यक्रम पनि बन्द भएको छ। कोरोना भाइरसका कारण विश्‍व अर्थतन्त्र डामाडोल भइरहेको अवस्थामा नेपाली अर्थतन्त्र पनि प्रभावित भएको छ।

विश्‍व स्वास्थ्य स‌ंगठनको चेतावनी : कुनै देशले कोरोना भित्रिन्‍न भनेर बसे गम्भीर गल्ती हुनेछ

गएको फागुन ६ गते पर्यटन मन्त्री योगेश भट्टराईले नेपालको पर्यटन क्षेत्रमा नकारात्मक असर पर्न नदिन नेपाल कोरोना भाइरसमुक्त क्षेत्र रहेको सन्देश अन्तर्राष्ट्रय बजारमा प्रवर्द्धन गर्न सम्बन्धित पदाधिकारीलाई निर्देशन दिएका थिए। मन्त्री भट्टराईले नेपाल कोरोना भाइरसमुक्त क्षेत्र रहेको सन्देशमूलक श्रव्यदृश्य प्रचार सामग्री अंग्रेजी, चिनियाँ र हिन्दी भाषामा सम्प्रेषित गर्ने बताएका थिए।

साथै मन्त्री भट्टराईले चिनियाँ पर्यटकलाई स्वागत गर्न नेपाल तयार रहेको बताउँदै सन्देशमूलक सामग्री चिनियाँ सञ्चारमाध्यममा सम्प्रेषण गर्ने बताएका थिए। विश्‍वका ५० भन्दा बढी मुलुकमा कोरोना भाइरस संक्रमण फैलिइसकेको छ। विश्‍व स्वास्थ्य संगठनले कुनै पनि देशले कोरोना भित्रिन्‍न भनेर बसे गम्भीर गल्ती हुने चेतावनी दिएको छ। यस्तो अवस्थामा कोरोनामुक्त भनेर प्रचार गर्नु गलत भएको भन्दै पर्यटनमन्त्री भट्टराईको व्यापक आलोचना भएको थियो।
प्रकाशित : फाल्गुन १७, २०७६ १४:४३

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

१०० दिनमा २०० किलोमिटर सडक कालोपत्रे गरेको मन्त्री नेम्वाङको दाबी

कान्तिपुर संवाददाता

काठमाडौँ — बसन्तकुमार नेम्वाङले भौतिक पूर्वाधार तथा यातायात व्यवस्थामन्त्रीको जिम्मेवारी सम्हालेपछिका १०० दिनमा गरेका कामको विवरण सार्वजनिक गरेका छन् । 

शनिबार मन्त्रालयमा पत्रकार सम्मेलन गरी नेम्वाङले १०० दिनमा उपत्यकाभित्र रहेका सडकका ९ हजार ५ सय खल्डाखुल्डी पुर्ने कार्य भएको बताए। सडकहरू खाल्डाखुल्डी र धुलोरहित बनाउने योजना अन्तर्गत यी काम गरिएकाे नेम्वाङले बताए। १०० दिनको अवधिमा मर्मतसमेत गरी उपत्यकामा २७ किलोमिटर सडक कालोपत्रे भएको उनले बताए। आर्थिक वर्षको अन्त्यसम्म थप ८५ किलोमिटर सडक कालोपत्रे गर्ने लक्ष्य मन्त्रालयले लिएको नेम्वाङले बताए।
नेम्वाङले कोटेश्वरको ट्राफिक जाम व्यवस्थापनका लागि अल्पकालीन र दिर्घकालीन समाधानका लागि मन्त्रालयले काम गरिरहेको बताए। अल्पकालीन अवस्थाका लागि चार लेनको सडक निर्माण कार्य अगाडि बढाइएको उनले बताए। सडक चौडा बनाउन दक्षिणतर्फ जग्गा प्राप्ति भइसकेको र उत्तरतर्फ जग्गा अधिग्रहणको प्रकृया सुरु भएको उनले बताए।
मनोहरा कोरिडोरको सडकलाई समेत प्रयोगमा ल्याएर सवारी डाइभर्ट गर्ने वैकल्पिक मार्गको प्रयोग गर्ने योजना रहेको नेम्वाङले बताए। चक्रपथ अन्तर्गत पर्ने ग्वार्को चोक, सातदोबाटो चोक र नख्खु चोकमा फ्लाईओभर निर्माणका लागि डीपीआर तयारीका लागि परामर्शदाता छनोटको काम भइरहेको तथा सूर्यविनायक—धुलिखेल सडकलाई विस्तार गर्दै कोटेश्वर र जडिबुटी चोकको ट्राफिक जामलाई दीर्घकालीन रूपमा समाधान गर्न फ्लाईओभर र अन्डरपास निर्माणका लागि जापान सरकारसँग समन्वय भइरहेको उनले जानकारी दिए।
मन्त्रालयले उपत्यकाका १७ वटा चोकहरूमा ट्राफिक बत्ति जडान गरी सञ्चालनमा ल्याएको छ। बाँकी ६ वटा चोकहरूमा असारभित्र मर्मतगरी सचालनमा ल्याउने योजना मान्त्रालयले अघि सारेको छ। त्यसैगरी पैदलयात्रुलाई सुरक्षित रूपमा बाटो काट्नका लागि रिङरोडको बालकुमारी, सातदोबाटो र एकान्तकुनामा आकासे पुल निर्माण गरिएको मन्त्रालयले जनाएको छ।
बल्खु, सानेपा, महालक्ष्मीस्थान र बानेश्वरमा थप आकासे पुल निर्माण डिजाइन सम्पन्न भइ ठेक्का व्यवस्थापनको प्रकृयामा रहेको,चक्रपथ विस्तारको दोश्रो खण्डअन्तर्गत कलंकी—महाराजगञ्जखण्ड विस्तार कार्यको प्रारम्भिक कामहरू अन्तिम चरणमा पुगेको मन्त्री नेम्वाङले बताए। चक्रपथको तिनकुने—एयरपोर्ट—तिलगंगा सडक खण्डलाई ८ लेनमा स्तरोन्नती गर्न डीपीआर तयार भएको उनले जानकारी दिए।
मन्त्रालयले मदन भण्डारी राजमार्ग अन्तर्गत यो अवधिमा २६ किलोमिटर सडक कालोपत्रे भएको जनाएको छ। त्यसमा ११ वटा पुल निर्माण भएका बताइएको छ। १०० को अवधिमा २०० किलोमिटर सडक कालोपत्रे भएको मन्त्री नेम्वाङले बताए।

प्रकाशित : फाल्गुन १७, २०७६ १४:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×