बेवारिसे शिशुले पाइन् ‘अभिभावक’ 

नगेन्द्र अधिकारी

काभ्रे — बेवारिसे भेटिएकी शिशुले ‘अभिभावक’ पाएकी छिन् । फागुन ४ गते पनौती–४ स्थित टौखालमा रहेको इनारको छेउमा भेटिएको शिशुलाई एसओएस बालग्राम श्रीखण्डपुरले न्वारन गरिदिएर ‘तेजस्वी’ नाम राखिदिएको हो । २३ वर्षको उमेरसम्म उनी अब बालग्रामकै संरक्षणमा हुनेछिन् ।

४ गते मर्निङवाक जाने क्रममा स्थानीयले सालनालसहितको शिशु देखिपछि प्रहरीलाई खबर गरेका थिए । प्रहरीले तत्काल उद्धार गरी बनेपास्थित शिर मेमोरियल अस्पतालमा भर्ना गरेको थियो । ११ दिन सम्मको उपचारपछि कुनै स्वास्थ्य समस्या नभएको यकिन गरेपछि बालग्रामको जिम्मा लगाइएको इलाका प्रहरी कार्यलय बनेपाका प्रहरी निरीक्षक योगेन्द्र तिमल्सिनाले जानकारी दिए । ‘स्थानीयले खबर गर्ना साथ उद्धार गरेर उपचार गरायौं,’ निरीक्षक तिमल्सिनाले भने, ‘कसले बेवारिसे बनायो भन्नेबारे छानबिन गर्दैछौं ।’


नयाँ ‘छोरी’ आएको भन्दै बालग्राममा खुशीयाली छाएको छ । बालग्राम भित्र्याइएकी शिशुको निर्देशक सुरेन्द्र अम्गाई ‘कर्ता’ बनेर उनको नाम तेजस्वी राखियो । ‘नवजात शिशु त्यसरी भेटिएको ४ दिनपछि हामीलाई प्रहरीले खबर गर्‍यो संरक्षण गरिदिनको लागि, ११ दिनमा उपचार सकेर बालग्राम ल्याएर उनको न्वारन पनि गर्‍यौ,’ अम्गाईले भने, ‘२३ वर्षको उमेरसम्म उसको सम्पूर्ण जिम्मेवारी हामी लिन्छौं, जन्मदिने आमाबुबा सम्पर्कमा नआए बिहेवारी पनि हामी नै गरिदिन्छौं ।’ तेजस्वीलाई रेखदेख गर्ने जिम्मा बालग्रामकी ‘आमा’ निर्मला आचार्यले पाएकी छन् ।


आमाबुबा गुमाएका र संरक्षण आवश्यक १ सय ३० बालबालिकालाई एसओएसले श्रीखण्डपुरस्थित बालग्राममा आश्रय दिएको छ । १४ वटा घर छन् । १० जनाका दरले ‘छोराछोरी’ ती घरमा बस्छन् । ‘पारिवारिक वातावरण छ, सबै बालबालिकालाई हामी छोराछोरी सम्बोधन गर्छौं, उनीहरु पनि हामीलाई आमा, बुबा भन्छन्,’ उनले भने, ‘एउटा अभिभावकले आफ्ना छोराछोरीको लागि गर्ने सबै कर्तव्य पूरा गर्छौं ।’


बालबालिकाको लालनपालनका लागि प्रत्येक घरमा एकजना आमा र एक जना ‘अन्टी’ हुन्छन् । यसअघि दुई छोरीको बालग्राममा नै जन्ती भित्र्याएर विवाह गरिएको थियो । विवाह गरेका दम्पती दुल्हन फर्काउन बालग्राममा नै आउने गरेका पनि छन् । प्रकाशित : फाल्गुन १५, २०७६ ११:५९

प्रतिक्रिया
पठाउनुहोस्

लघुवित्तको ६२ लाख हिनामिना, ८ लाख १० हजार फिर्ता

आश गुरुङ

लमजुङ — हिमाली जिल्ला मनाङको सदरमुकाम चामेमा रहेको एनएमबी लघुवित्त वित्तीय संस्था लिमिटेड (साविक एनएमबी माइक्रोफाइनान्स वित्तीय संस्था लिमिटेड) शाखा प्रमुखले ६२ लाख रुपैयाा बढी आर्थिक हिनामिना गरेको पाइएको छ ।

संस्थाको आन्तरिक लेखा परीक्षण र छानबिनका लागि गठित समितिले चामे शाखा कार्यालय प्रमुख कल्पना गुरुङले करिब ६२ लाख १० हजार रुपैयाँ हिनामिना गरेको निष्कर्ष निकालेको छ। मनाङकै नासों गाउापालिका ४, धारापानी घर भएका उनी अहिले मनाङ प्रहरीको हिरासतमा छन्। प्रहरीले फागुन ४ गते पक्राउ गरी ५ गते ७ दिनका लागि म्याथ थप गरेर अनुसन्धान अघि बढाएको थियो। म्याद आइतबार सकिएको र पुनः ७ दिनका म्याद थपेर थप अनुसन्धान गरिएको मनाङका प्रहरी प्रमुख डीएसपी मेखबहादुर कुावले बताए।

चामेमा ५ वर्षअघि स्थापना भएको लघुवित्तमा गुरुङ साढे २ वर्षदेखि कार्यरत थिए। कास्कीको हेम्जा केन्द्रीय कार्यालय रहेको उक्त लघुवित्तले गुरुङलाई सहायक पदमा नियुक्त गरेको हो। उनले गत वर्षको चैत महिनादेखि र गत असार, साउन, भदौ र असोजमा बढी मात्रामा आर्थिक हिनामिना गरेको देखिएपछि केन्द्रीय कार्यालयले अनुसन्धान थालेको थियो।

लघुवित्तका नायब महाप्रबन्धक रामप्रसाद मिश्रको संयोजकत्वमा लघुवित्तका आन्तरिक लेखापरीक्षक अनुप भारी र गण्डकी प्रदेशका अनुगमन अधिकृत प्रकाश रावलसहितको ३ सदस्यीय छानबिन समिति गठन गरिएको थियो।

छानबिन समितिले निकालेको निष्कर्षका आधारमा लघुबित्तका कानुनी सल्लाहकार गोविन्द बाँस्तोलाले जिल्ला प्रहरी कार्यालय मनाङमा गुरुङविद्धरु बैंकिङ कसुरमा हदैसम्मको कारबाही गरिपाउँ भनी उजुरी दिएका थिए। गुरुङले ८ लाख १० हजार नगद आफै लिएको र ४३ जनाको किर्ते तमसुक बनाई करिब ५४ लाख रुपैयाँ हिनामिना गरेको आन्तरिक छानबिनमा देखिएको लघुवित्तका प्रवक्ता समेत रहेका नायब महाप्रवन्धक मिश्रले बताए।

उनका अनुसार छानबिन गरेपछि आफूले निकालेको कर्जा ८ लाख १० हजार रुपैयाँ गुरुङले फिर्ता गरेका छन्। किर्ते गरेर निकालेको रकम भने उनले देखाउन सकेका छैनन्। प्रहरीले अनुसन्धान सकेपछि बैंकिङ कसुरमा मुद्दा चलाउने तयारी गरेको छ।

बैंकिङ कसुर उच्च अदालत पोखराले हेर्छ। उच्च अदालतसँगको समन्वयमा अनुसन्धान अगाडि बढाएको प्रहरीले जनाएको छ। डीएसपी कुँवरका अनुसार बैंकिङ कसुरसम्बन्धी वाणिज्य इजलास हुनुपर्ने र उक्त इजलास जिल्ला अदालतमा नहुने भएकाले उच्च अदालत कास्कीले मुद्दा हेर्नेछ।

प्रकाशित : फाल्गुन १५, २०७६ १०:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×