सरकारले आफूले पाएको जनमतलाई आफूखुसी प्रयोग गर्न खोज्यो : नेता पौडेल

मधुसुधन भट्टराई

काठमाडौँ — नेपाली कांग्रेसका वरिष्ठ नेता रामचन्द्र पौडेलले वर्तमान सरकारले आफूले पाएको जनमतलाई आफूखुसी प्रयोग गर्न खोजेको आरोप लगाएका छन् । सोमबार पत्रकारहरुसँगको कुराकानीमा पौडेलले वर्तमान सरकारले बहुमतको आडमा मनलाग्दी गर्न थालेको आरोप लगाए ।

मुलुकलाई कम्युनिष्टीकरण,भ्रष्टीकरण र संविधान तोडमरोड गर्न वर्तमान सरकार व्यस्त रहेको वरिष्ठ नेता पौडेलको भनाइ छ।


नेता पौडेलले संविधान बंग्याउने कानुन बनाएर सरकार एक तन्त्रीय शासनको अभ्यास गर्न खोजेको बताए। उनले भने, 'वर्तमान सरकार मुलुकलाई कम्युनिष्ट मुलुक बनाउने प्रयास गर्दै छ। त्यसका विरुद्ध कांग्रेस आन्दोलनमा जान्छ।'


अनौपचारिक रुपमा उनले वर्तमान सरकार राष्ट्रपतिलाई कार्यकारी बनाउन खोजिरहेको बताए। प्रहरी प्रतिष्ठानलाई अन्यत्र सारेर राष्ट्रपतिको कार्यालय फराकिलो बनाउने कार्य कार्यकारीको अभ्यासका लागि भएको नेता पौडेलको भनाइ थियो। मुलुकमा राष्ट्रपति शासन लागू गर्ने पूर्व तयारी अनुरुप प्रहरी प्रतिष्ठानलाई अन्यत्र सारेर राष्ट्रपति कार्यालय फराकिलो बनाउन खोजिएको बताए।


यस्तै, उनले निर्वतमान सञ्चारमन्त्री गोकुल बाँस्कोटाको अडियो प्रकरणमा अन्यको पनि मिलोमतो रहेको बताए। उनले भने,' अडियो प्रकरणमा बाँस्कोटा एक्लै दोषी हुनै सक्दैनन् यसमा उनीभन्दा अन्य ठूला मानिसहरुको पनि मिलोमतो छ ।' घूस माग प्रकरण व्यक्तिगत नभएर संस्थागत भएको नेता पौडेलले दाबी गरे।


यस्तै उनले भ्रष्टचार मुद्दा लागेका आफ्ना नेताहरुको पछाडि कांग्रेस पछि नलाग्ने प्रष्ट पारे। 'कांग्रेस व्यक्तिकापछि लाग्दैन जनताको पछि लाग्छ,' पौडेलले भने, 'कांग्रेसले व्यक्तिका विषयमा हैन जनताको विषयमा आवाज उठाउँछ।' प्रकाशित : फाल्गुन १२, २०७६ १६:३६

ADVERTISEMENT
प्रतिक्रिया
पठाउनुहोस्
ADVERTISEMENT

सरोकारवालाहरुका माग सम्बोधन गरी विधेयक अगाडि बढाउन आग्रह

कान्तिपुर संवाददाता

काठमाडौँ — नेपाल पत्रकार महासंघले मिडिया काउन्सिल विधेयक र सूचना प्रविधि विधेयकलाई सरोकारवालाहरुका माग सम्बोधन गरी अगाडि बढाउन सभामुख अग्‍नीप्रसाद सापकोटालाई आग्रह गरेको छ ।


सोमबार सभामुख सापकोटालाई ज्ञापनपत्र बुझाउँदै महासंघले मिडिया काउन्सिल र सूचना प्रविधि लगायतका विधेयकहरुलाई सरोकारवालसँगको छलफल गरेर माग सम्बोधन गर्ने गरी अगाडि बढ्न आग्रह गरेको हो। कानुन निर्माण प्रकृयालाई प्रभावकारी बनाउन अन्तरक्रियात्मक हुनुपर्ने र सरोकारवाला पक्षलाई उत्प्रेरित गर्न आवश्यक रणनीति अख्तियार गर्ने दिशामा अगाडि बढ्न सभामुखको ध्यानाकर्षण गरिएको महासंघका महासविच रमेश विष्टले बताए।

महासंघका कार्यवाहक अध्यक्ष विपुल पोख्रेलले धेरैभन्दा धेरै नागरिकहरुको सहभागितामा रचनात्मक र सिर्जनात्मक ढंगले कानुन निर्माण प्रक्रिया स्थापना गर्नुपर्ने बताए। पछिल्लो समय आएका केही विधेयकका प्रवाधानहरुमा आफ्नो गम्भीर विमती रहेको उल्लेख गर्दै पोख्रेलले मिडियालाई स्वतन्त्र रुपमा अभ्यास गर्न सक्ने परिस्थितीको निर्माण गर्न माग गरे।

ज्ञापनपत्र बुझ्दै सभामुख सापकोटाले छलफल र अन्तरक्रियाबाट अगाडि बढ्ने प्रयत्‍न आफूले गर्ने बताएका छन्। परिवर्तनको गुणात्मकतालाई आत्मसाथ गरेर नियन कानुन बनाउने कुरामा भएका कमजोरी सच्याउन जनस्तरमा गएर ठूलो आधार तयार हुने उनले बताए।

प्रेस तथा अभिव्यक्ति स्वतन्त्रता लोकतन्त्रका प्राणवायु भएको उल्लेख गर्दै महासंघले केही विधेयकहरुमा स्वतन्त्रता सम्बन्धी बन्देज लगाउने प्रावधानहरु रहेकोले ती प्रावधानहरुलाई सच्याउन ध्यानाकर्षण गराएको हो। महासंघले सभामुखको सफल कार्यकालको बधाई तथा शुभकामना दिएको छ।

प्रकाशित : फाल्गुन १२, २०७६ १६:१३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×