एमसीसी परिमार्जनसहित पारित हुन्छ : दाहाल
नवलपरासी — नेकपा अध्यक्ष पुष्पकमल दाहालले अमेरिकी नियोग मिलेनियम च्यालेन्ज कर्पोरेसन(एमसीसी) परिमार्जनसहित पारित हुने बताएका छन् ।शनिबार नवलपरासीमा पत्रकारहरुसँग कुरा गर्दै राष्ट्रिय हितमा हुने गरी परिमार्जन गरेर एमसीसी पारित गरिने उनले बताए ।
एमसीसीबाट तर्सिन पर्ने वा ठाडै अस्वीकार गर्नपर्ने अवस्था नरहेको दाहालले बताए । ‘दीर्घकालीन रुपमा नेपाललाई हानी नहुने गरी एमसीसी पारित गर्न नेकपाले अध्ययन कार्यदल बनाएको थियो । कार्यदलले आफ्नो प्रतिवेदन बुझाएको छ । कार्यदलको सुझाव अनुसार परिमार्जन गरेर एमसीसी पारित हुन्छ,’ दाहालले भने ।
पूर्वी नवलपरासीको रजहरमा रहेको प्राकृतिक चिकित्सालय भवन उद्घाटन गर्न आएका दाहालले एमसीसी नेपालमा आउने सहमति भएपछि सबै दल र नागरिक समाजका प्रतिनिधि उत्साहित भएको बताए ।
दीर्घकालीन राष्ट्रिय हितमा असर नदेखियोस भनेर पार्टीले अध्ययन कार्यदल बनाएको भन्दै उनले अव कार्यदलको सुझाव अनुसार सहमति जुटाउने प्रयास हुने बताए । एमसीसी लागू गर्दा पुरै नेपालको हितमा छ कि छैन भन्नेमा आफूहरु चनाखो रहेको दाहालको भनाइ छ ।
कार्यदलको प्रतिवेदन अर्का अध्यक्ष प्रधानमन्त्री समेत रहेका केपी शर्मा ओली अध्ययन गरेर चाँडो राष्ट्रहितमा हुनेगरी सहमति गर्ने प्रक्रिया अगाडि बढाइने बताए ।
फरक सन्दर्भमा दाहालले नेत्रविक्रम चन्द समूहले अर्काको सिको गरेर आन्दोलन गर्न नहुने बरु यसै संविधानलाई मानेर आफना एजेण्डा जनतामाझ लैजानु पर्ने बताए ।
प्रकाशित : फाल्गुन १०, २०७६ १२:३८