काठमान्डु पोस्टको सम्पादकमा सतगैंया

प्रधानसम्पादक अनुप काफ्लेले पदबाट राजीनामा दिएपछि ४५ वर्षीय सतगैंया सम्पादकमा नियुक्त भएका हुन् । सन् २००२ मा हिमालयन टाइम्सबाट पत्रकारिता थालेका सतगैंया यसअघि पोस्टकै समाचार प्रमुख थिए ।

उनले डेस्क सम्पादक र संवाददाताका रूपमा राजनीतिक, सामाजिक मामिला, मानव अधिकार र मनोरञ्जनसम्बन्धी विषयमा समाचार संकलन र सम्पादन गर्थे । ‘कान्तिपुर मिडिया ग्रुपको व्यवस्थापनले प्रधानसम्पादक काफ्लेको राजीनामा स्वीकृत गर्दै सतगैंयालाई पत्रिकाको सम्पादकमा नियुक्त गरेको छ,’ सिरोहियाले भने, ‘आगामी दिनमा नयाँ नेतृत्वअन्तर्गत रहेर पत्रिकाले असल पत्रकारिताको अभ्यास निरन्तर जारी राख्ने मेरो विश्वास छ ।’