९० पालिकामा युवा नीति

परिषद्‌मा नगरपालिकाका मेयर अध्यक्ष हुन्छन् । यही महिनाभित्र १३ सदस्यीय परिषद् गठन हुँदै छ । ‘नगर कार्यविधि बनेपछि हामी युवा सरकारको फ्रेमवर्कभित्र अटाएका छौं । अब हामी बलियो गरी मुद्दा उठाउँछौं,’ नमोबुद्ध युवा सञ्जालका अध्यक्ष सञ्जीव न्यौपानेले भने ।

राष्ट्रिय युवा परिषद्का कार्यकारी उपाध्यक्ष माधवप्रसाद ढुंगेलका अनुसार नमोबुद्धमा जस्तै देशभरका ९० पालिकामा युवाअनुकूल नीति ल्याइएको छ । यसबाट स्थानीय सरकारका नीति निर्माण र विकास योजनामा युवाको पहुँच बढेको छ । युवा लक्षित कार्यक्रमले ठाउँ पाउन थालेका छन् । परिषद्ले यसका लागि ‘युवामैत्री स्थानीय तह दिग्दर्शन–०७५’, ‘युथ भिजन–२०२५’ तथा ‘दसवर्षे रणनीतिक योजना’ र ‘राष्ट्रिय युवा नीति–२०७२’ ल्याएको छ । ‘युवा भोलिका कर्णधार मात्र होइनन्, वर्तमानका साझेदार पनि हुन्, यसकारण राज्यको हरेक क्षेत्रमा उनीहरूको सहभागितामा जोड दिएका छौं,’ ढुंगेलले भने ।

देश संघीय संरचनामा गएपछि युवालाई सहभागिता र बजेटमा समेट्नैपर्ने बाध्यकारी नीति नहुँदा स्थानीय सरकारका नीति तथा योजनामा छुट्दै आएका थिए । परिषद्ले २०७५ मा ल्याएको युथ भिजनले स्थानीय सरकारमा युवा परिचालन बढाउने लक्ष्य राखेको छ । सन् २०२५ सम्ममा स्थानीय सरकारको कुल बजेटबाट युवा लक्षित १० प्रतिशत छुट्याउनुपर्ने भनिएको छ ।

युवाले ठाउँठाउँमा नमुना युवा संसद्को अभ्यास गरिरहेका छन् । युवाको नेतृत्व विकास गरी संविधान, कानुन, संसदीय प्रक्रिया, मर्यादा र अभ्याससँग परिचित गराउन ३ वर्षदेखि यस्तो अभ्यास ल्याइएको हो ।

यसले उनीहरूमा प्रतिभा प्रस्फुटन गराउनुका साथै आत्मविश्वास जगाउने गरेको छ । यो अभ्यासका लागि युवाअनुकूल नीति र कार्यक्रम निर्माणमा ९० स्थानीय तहमा गठन भएका १ हजार २ सय १२ युवा सञ्जाललाई परिचालन गरिएको छ । नमुना युवा संसद्मा नेतृत्वदायी भूमिका देखेर वेदकोट नगरपालिकाले युवा उद्यम परिचालन अन्तर्गत १९ वर्षीय केशव खड्कालाई व्यवसाय गर्न ५ लाख रुपैयाँ अनुदान दिएको छ । त्यो रकममा ७ लाख थपेर उनले कृषि व्यवसाय थालेका छन् ।