संसदलाई कसरी जीवन्त बनाउने भन्नेमा केन्द्रित छु : सभामुख
काठमाडौँ — सभामुख अग्निप्रसाद सापकोटाले संसदलाई जीवन्त बनाउने विषयमा ध्यान केन्द्रित गरेको बताएका छन् ।
संसदीय मामिलामा पत्रकार समाजले आयोजना गरेको कार्यक्रममा सभामुख सापकोटाले सदनमा जीवन्त छलफलको वातावरण निर्माण गर्ने प्रतिबद्धता व्यक्त गरेका छन् । उनले भने, ‘संसदलाई कसरी जीवन्त बनाउने, जीवन्त छलफल भयो भने छलफलको राम्रो वातावरण बनाउन सकियो भने सबैलाई राम्रो गर्छ । सांसदहरूको योग्यता,क्षमतामा पनि अभिवृद्धि गर्छ ।’
सभामुख सापकोटाले आफू दोहोरो मापदण्डमा चल्ने व्यक्ति नभएको बताए । उनले भने,‘मलाई कुनै कुरा मन नपर्ने के छ भनेर तपाई हरुले सोध्नुभयो भने म सेकेन्ड पनि ढिलो नगरी के भन्छु भने मलाई मन नपर्ने कुरा डबल स्ट्यान्डर्ड हो ।’
मानिसले हरेक पटक सम्झौता गर्नुपर्ने भएकाले आफूले सम्झौता गरेपनि सम्झौतावादी भने नहुने उनले बताए । ‘सम्झौता त हुन्छ तर सम्झौतावादी चाहिँ हुनु हुँदैन । मलाई लाग्छ कि सम्झौता पाइला पाइलामा हुन्छ, क्षण क्षणमा हुन्छ । तर सम्झौतावादी चाहिँ हुनु हुँदैन ।’