आवश्यक देखिए चीनबाट विद्यार्थी फिर्ता ल्याउन सकिन्छ : परराष्ट्रमन्त्री ज्ञवाली

'नेपाली विद्यार्थी सुरक्षित छन्'
कान्तिपुर संवाददाता

काठमाडौँ — परराष्ट्र मन्त्री प्रदीप ज्ञवालीले चीनको वुहानमा रहेका नेपाली विद्यार्थीलाई ‘आवश्यक देखिएको अवस्थामा’ घर फिर्ता गराउन सकिने र यसका लागि बेइजिङस्थित दूतावास निरन्तर सम्पर्कमा रहेको जानकारी दिएका छन् ।

ZenTravel

नोवल कोरोना भाइरसको फैलदो संक्रमणकै कारण नेपाली विद्यार्थीले कुनै प्रकारको गम्भीर र असहज स्थिति बेहोर्ने अवस्था नदेखिएको बताउँदै ज्ञवालीले यो संक्रमणभन्दा बढी संक्रमितलाई ‘आइसोलेसन’मा राख्नुपर्ने अवस्था जटील रहेको बताए।

‘स्थिति जटील नदेखिएकै अवस्थामा विद्यार्थीलाई घरफिर्ती गराएर पनि हुन्न,’ उनले भने, ‘चीन सरकारले पनि सक्दो सेवा सुरक्षाको ख्याल गरेर स्थितिलाई नियन्त्रणमा लिँदै गएको स्थिति देखिन्छ।’ मन्त्री ज्ञवालीले ‘कर्‍फ्यूकै बेलामा पनि घरबाहिर निस्केर सेल्फी लिन खोज्ने नेपाली स्वभावका कारण’ अहिले चीनमा देखिएको भाइरस संक्रमणको यो घडीमा संवेदनशील भएर संयमपूर्ण व्यवहार देखाउनु जरुरी रहेको बताए।

बेइजिङस्थित उपनियोग प्रमुख शुशिल लम्सालले पनि बाहिरी सूचनामा आएझैं भारत र श्रीलंकाका विद्यार्थीहरु घरफिर्ती भैनसकेको जनाउ दिँदै यसका लागि चीन सरकारको ‘क्लियरेन्स’ लिने काम भइरहेको बताए। ‘हाम्रा विद्यार्थीहरु सुरक्षाको घेरामा छन्, संक्रमणको संकेत देखिएको छैन,’ लम्सालले कान्तिपुरसँग भने, ‘सेवा–सुरक्षाभन्दा अत्तालिएर घरफिर्तीको हतारो गरिएको अवस्थामा संक्रमण अझ फैलन सक्ने त्रास देखिन्छ, विद्यार्थीहरुसँग हामी निरन्तर सम्पर्कमा छौं।’

चीनले पनि स्थिति नियन्त्रणमा आउने भन्दै आफ्ना नागरिक/विद्यार्थी फिर्ता लैजान अपिल गरिनसकेको लम्सालले बताए।

वुहानबाट कान्तिपुरको सम्पर्कमा आएका नेपाली विद्यार्थीहरुले भने आफूहरुको उद्दार गरिदिन आग्रह गरेका छन् ।

प्रकाशित : माघ १६, २०७६ १४:५१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

आउँदै छन् क्रिस गेल

विनोद पाण्डे

काठमाडौँ — विश्व क्रिकेटका ठूला स्टार हुन्– क्रिस गेल । यी महान् ब्याट्सम्यान कुनै दिन नेपाली क्रिकेट लिग खेल्न नेपाली भूमिमै आउलान् भन्ने सायदै ठानिएको थियो तर यो सम्भव भएको छ । अबको एभरेस्ट प्रिमियर लिग (ईपीएल) मा नेपाली क्रिकेटप्रेमीले गेलका ‘विस्फोटक’ ब्याटिङ प्रत्यक्ष आत्मसात् गर्दै खुसीले चिच्याउनेछन्– ‘छक्का...!’

गेलले सबै संरचनाको क्रिकेटमा गरी ५९ हजारभन्दा बढी रन बनाएका छन् । उनी ईपीएलमा पोखरा राइनोजबाट खेल्ने भएका हुन् । वेस्ट–इन्डिजका पूर्वकप्तान गेललाई ट्वान्टी–२० का महान् ब्याट्सम्यान मानिन्छ । टेस्ट, एकदिवसीय र ट्वान्टी–२० मा गरी उनका नाममा धेरै कीर्तिमान छन् । इन्डियन प्रिमियर लिगमा रोयल च्यालेन्जर्स बेंग्लोरबाट खेल्दै उनले ३० बलमा शतक बनाउनुका साथै पुने वारियर्सविरुद्ध २०१३ मा १ सय ७५ रन बनाएका थिए, जुन ट्वान्टी–२० को व्यक्तिगत उच्च स्कोर पनि हो । एक भिडियो सन्देशमा उनले आफूलाई विश्वका प्रमुख र ट्वान्टी–२० को राजा भन्दै आफू नेपाल आएर ईपीएल खेल्न लागेको जनाएका छन् । ‘गेलको विस्फोटक ब्याटिङका लागि नेपाल तयार भएर बस्नु, यो निकै उत्साहजनक हुनेछ । नेपालमा चाँडै भेटौंला,’ उनले भनेका छन् ।

यसपल्ट ईपीएल खेल्न आउने गेलमात्र ठूला नाम होइनन् । वेस्ट–इन्डिजकै ड्वान स्मिथ भैरहवा ग्लाडियटर्सबाट, श्रीलंकाका उपुल थाराङ्गा ललितपुर प्याट्रियट्सबाट र अफगानिस्तानका मोहम्मद सहजाद चितवन टाइगर्सबाट खेल्ने निश्चित भइसकेको छ । दक्षिण अफ्रिकाका हसिम अमलालगायतका विश्व स्टारको नाम यसपल्टको ईपीएलमा जोडिएको छ ।

‘क्रिस गेल पोखरा राइनोजबाट खेल्न लागेका छन्,’ पोखरा राइनोजकी मालिक दीपा अग्रवालले भनिन्, ‘गेल नेपाल आएर मेरो टोलीबाट खेल्न लागेका छन् भन्नेमा अझै मलाई पत्याउन मुस्किल परिरहेको छ ।’

गेल ईपीएल खेल्न इच्छुक भएलगत्तै आफूहरूले एकदमै चाँडो निर्णय गरेका कारण उनलाई भित्र्याउन सफल भएको अग्रवालले बताइन् । ईपीएलका प्रबन्ध निर्देशक आमिर अख्तरले विदेशी खेलाडीका हकमा आफूहरूले एउटा बास्केट बनाएर टिमलाई दिएको र त्यसमा गेलका लागि पोखरा राइनोजले तुरुन्तै निर्णय गरेको जनाए । अख्तरले गेल ईपीएलभन्दा विशेष भएको जनाउँदै उनलाई ईपीएलमा ल्याउनका लागि ६ महिनासम्म प्रयास गरिएको सुनाए । ६ फ्रेन्चाइज टोली समावेश ईपीएल मार्च १४ बाट २८ सम्म हुनेछ । त्यसमा हरेक टोलीले टेस्ट खेल्ने राष्ट्रका एक स्टार खेलाडी लिनुपर्ने नियम छ । पोखराले बिहीबार ४० वर्षे गेललाई आइकोनिक खेलाडीका रूपमा घोषणा गरेको हो । गत वर्ष दक्षिण अफ्रिकाका रिचर्ड लेभीलाई खेलाए पनि पोखरा पुछारमा रहेको थियो ।

गेलको पारिश्रमिक भने खुलाइएको छैन । तर गेलको भिडियो र फोटो ईपीएलले पछिसम्म प्रवर्द्धन गर्न पाउनेछ । विदेशी खेलाडीका लागि श्रम स्वीकृति अनिवार्य गरिएको र त्यसका लागि कदम चालिसकेको अख्तरले जानकारी गराए ।

एउटा टोलीले लिग चरणमा ५ खेल खेल्नुपर्छ । गेलले २ वा ३ मात्र खेल्न सक्छन् । ‘गेल मार्च १२ मा आउनेछन् र कति समयका लागि हो भन्ने निश्चित छैन । उनी यहाँबाट सिधै आईपीएल खेल्न जानेछन् । आईपीएलको तालिका अझै नआइसकेकाले उनले ईपीएलमा कति खेल्ने टुंगो लागेको छैन,’ अख्तरले भने । आईपीएलमा गेल किंग्स–११, पन्जाबबाट खेल्दै छन् । आईपीएल मार्च २९ बाट मे २४ सम्म आयोजना हुँदै छ ।

प्रकाशित : माघ १६, २०७६ १४:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×