कान्तिपुर वेबसाईट
AdvertisementAdvertisement

चितवनमा एकै दिन मरे दुई गैंडा 

रासस

काठमाडौँ — चितवन राष्ट्रिय निकुञ्जमा मंगलबार एकै दिन दुई गैंडा मरेका छन् । यी सँगै चालू आर्थिक वर्षमा प्राकृतिक कारणले मरेका गैंडाको संख्या १३ पुगेको छ । सोमध्ये दुई राष्ट्रिय वन क्षेत्रमा हुन् भने अन्य निकुञ्ज क्षेत्रमा हुन् । 

निकुञ्जका सूचना अधिकारी गोपाल घिमिरेका अनुसार निकुञ्जको तमासपुर क्षेत्रमा अन्दाजी १८/२० वर्षको पोथी गैंडा मृतावस्थामा फेला परेको हो । अर्को एक गैंडा सुखीभार क्षेत्र नजिक मृतावस्थामा फेला परेको छ । उनका अनुसार सो गैंडा ३० वर्षको पोथी हो ।


निकुञ्जका वरिष्ठ पशु चिकित्सक डा. विजयकुमार श्रेष्ठका अनुसार तमासपुरमा भेटिएको गैंडा विषाक्त खानाका कारणले मरेको प्रारम्भिक अध्ययनमा देखिएको छ । विषाक्त घाँस खाएर गैंडा मरेको हुन सक्ने श्रेष्ठले जानकारी दिए । अर्को गैंडा मर्नाको कारण खुल्न सकेको छैन ।


गत आर्थिक वर्षमा ४३ गैंडा प्राकृतिक कारणले मरेका थिए । आर्थिक वर्ष २०७४/७५ मा २६ र २०७३/७४ मा २५ गैंडा कालगतिले मरेका थिए । गैंडाको मृत्युदर उच्च भएपछि निकुञ्ज विभागले मृत्युको कारण अध्ययन गर्न समिति बनाएर काम गरिरहेको छ ।


विगत केही वर्षयता चोरी सिकारीबाट गैंडा मारिएका छैनन् तर कालगतिले मर्ने क्रम बढेपछि संरक्षणको क्षेत्रमा चिन्ता व्यक्त गरिएको छ । यसैगरी माउले छाडेका दुई बच्चालाई उद्धार गरी राष्ट्रिय प्रकृति संरक्षण कोष सौराहामा राखिएको छ । श्रेष्ठका अनुसार एउटा अन्दाजी तीन हप्ताको पोथी तमासपुर क्षेत्रबाट र अर्को चार महिनाको भाले बच्चा सौराहा नजिकैबाट उद्धार गरी राखिएको छ ।

प्रकाशित : माघ १५, २०७६ २०:२२
प्रतिक्रिया
पठाउनुहोस्

ईपीएलका लागि चितवन टाइगर्समा सेहजाद

कान्तिपुर संवाददाता

काठमाडौँ — चितवन टाइगर्सले एभरेष्ट प्रिमियर लिग (ईपीएल) का लागि अफगानिस्तानको विस्फोटक ओपनिङ ब्याट्सम्यान मोहम्मद सेजहादलाई लिएको छ । चितवनले लिएको सेहजाद पहिलो विदेशी खेलाडी हुन् । अन्य विदेशी खेलाडीको बारेमा केही दिनमै घोषणा गर्ने चितवनले जनाएको छ ।

अफगानिस्तानका विकेटकिपर सेहजादले अवुधावी टी १०, बंगलादेश प्रिमियर लिग, अफगान प्रिमियर लिग खेलिसकेका छन् । नेपालसँगैं एक समय विश्व क्रिकेट लिगको डिभिजन ५ मा रहेको अफगानिस्तानलाई एकदिवसीय अन्तर्राष्ट्रिय मान्यता हुँदै टेस्ट मान्यता दिलाउन सेहजादको ठूलो भुमिका छ । उनले २०१७ मा एकै दिनमा ट्वान्टी २० अन्तर्राष्ट्रियमा दुई अर्धशतक बनाएर अनौठो किर्तिमान बनाएका थिए । ओमानसँग बिहान सेमिफाइनलमा र साँझ आयरल्यान्डसँग फाइनलमा अर्धशतक बनाउँदै उनले अफगानिस्तानलाई दुबईमा डिजर्ट ट्वान्टी २० च्यालेन्जको उपाधि दिलाउन प्रमुख भुमिका खेलेका थिए ।

‘हाम्रो लामो समयको प्रयास र सेहजाद पनि आफैं नेपाल आएर खेल्न इच्छुक भएपछि हामी सहमतिमा पुगेका हौं । सेहजादको आगमनले चितवन टाइगर्सको ब्याटिङमा नयाँ आयाम दिने विश्वास हामीले लिएका छौं । साथै सेहजादको आगमनले हाम्रो टोलीका खेलाडीलाई राम्रो अनुभव पनि दिनेछ,’ चितवन टाइगर्सका मालिक किशोर भट्टराईले फ्रेन्चाइज टोलीको जारी विज्ञप्तीमा जनाएका छन् । अनुबन्ध रकम भने खुलाइएको छैन ।

अफगानिस्तानबाट ३३ वर्षे सेहजादले २ टेस्ट, ८४ एकदिवसीय अन्तर्राष्ट्रिय र ६५ ट्वान्टी २० अन्तर्राष्ट्रिय खेलिसकेका छन् । प्रथम श्रेणीको क्रिकेटमा उनको ब्याटिङ औसत ५० भन्दा माथि छ । सेहजादले सबै संरचनाको क्रिकेट १३ हजारभन्दा बढी रन बनाएका छन् ।

चितवन टाइगर्सले हालै मात्र ट्रेडमार्फत् नेपाली राष्ट्रिय टोलीका अलराउन्डर सोमपाल कामीलाई लिएको थियो । चितवन टाइगर्सको टोलीमा रहेका तीव्र बलर कमलसिंह ऐरी पहिलो पटक राष्ट्रिय टोलीमा परेका छन् । उनलाई क्रिकेट विश्वकप लिग २ का लागि नेपाली टोलीमा राखिएको छ । गत सिजन प्लेअफमा पुगेको चितवन टाइगर्समा दिलिपनाथ, ललितसिंह भण्डारी, सन्दीप सुनार, भिम सार्की, इशान पाण्डे, साहब आलम, सागर ढकाल, आदिल खान लगायतका खेलाडी छन् । टोलीले दोस्रो चरणमा खड्ग बोहरालाई लिएको थियो ।

प्रकाशित : माघ १५, २०७६ १९:४९
पूरा पढ्नुहोस्
प्रतिक्रिया
पठाउनुहोस्
×