दामन घटनामा ज्यान गुमाएकालाई क्षतिपूर्ति दिन केरलाका मुख्यमन्त्रीको माग

‘नेपाल सरकारलाई पीडित परिवारलाई पर्याप्त क्षतिपूर्ति दिनका लागि समेत आग्रह गर्छौं,’ मुख्यमन्त्री विजयनले विदेशमन्त्री जयशंकरलाई लेखेको चिठी उद्धृत गर्दै भारतीय समाचार एजेन्सी पीटीआईले जनाएको छ । त्यसैगरी उनले घटनाको विस्तृत छानबिनको समेत माग गरेका छन् । ‘उनीहरुको असामयिक निधनले परिवारलाई अत्यन्त ठूलो चोट पुगेको छ । झट्ट हेर्दा यो घटनामा प्रस्ट रुपमा सेवा प्रदायक (रिसोर्ट) लापर्वाही र नियमनकारी निकायको कमजोरी देखिन्छ,’ मुख्यमन्त्री विजयनले भनेका छन् । गत मंगलबार एभरेस्ट पानोरमा रिसोर्टमा बसेका दुई परिवारका चार नाबालकसहित आठ सदस्यले ज्यान गुमाएका थिए । ती सबै जना भारतको दक्षिण राज्य केरलाको थिरुवनान्तथापुरम र कोजिकोडे जिल्लाका थिए ।

_{मकवानपुरको दामन सिमभन्ज्याङमा सोमबार निस्सासिएर मृत्यु भएका प्रवीणकृष्ण नायर (बायाँ) र रञ्जित कुमार टीबीका परिवार । उनीहरू भारतको केरलाबाट नेपाल घुम्न आएका हुन् । तस्बिर : फेसबुक}

यसअघि शुक्रबार नै मुख्यमन्त्री विजयन र केरलाका सांसदहरुको बैठकले घटनाको नेपाल सरकारले घटनाको विस्तृत छानबिन गर्नुपर्ने र त्यसका लागि भारत सरकारलाई पहल गर्नका लागि आग्रह निर्णय गरेको थियो । ‘नेपाल सरकारले घटनाको विस्तृत छानबिन गर्नुपर्छ र त्यसका लागि केन्द्र सरकारले आवश्यक पहल पनि गर्नुपर्छ,’ शुक्रबार मुख्यमन्त्री कार्यालयद्वारा जारी विज्ञप्तिलाई उद्धृत गर्दै पीटीआईले जनाएको थियो ।

हिटर बालेर सुतेकाहरू उठेनन्, किन एसी नराखेको ?

केरलाबाट काठमाडौं हुँदै पोखरा पुगेका उनीहरु माघ ६ गते साँझ दामनको एभरेस्ट पानोरमा रिसोर्टमा रात बिताउन पुगेका थिए । पन्ध्र जनाको संख्यामा त्यहाँ पुगेका ती भारतीय पर्यटकहरुले चारवटा कोठा बुक गरे पनि मृत्यु भएको दुइटै परिवार भने एउटै कोठामा सुत्न गएको थियो । बाँकी सात जना अन्य कोठामा सुते । अत्याधिक जाडोका कारण ग्यास हिटर बालिएको थियो र सबै झ्याल ढोका बन्द थियो । त्यही हिटर नै उनीहरुको मृत्युको कारण बन्यो ।

माघ ७ गते बिहान आठै जना बिहान बेहोस अवस्थामा फेला परेका थिए । उनीहरुलाई तत्काल हेलिकप्टरबाट काठमाडौं पुर्‍याइए पनि मृत घोषित गरिएको थियो । चिकित्सकले उनीहरुको मृत्यु अक्सिजनको अभाव हुन गई निस्सासिएर भएको जनाएका छन् ।

सम्बन्धित समाचार

दामन घटना छानबिन गर्न समिति गठन

दामनबाट उद्धार गरिएका ८ भारतीयको मृत्यु, मृतकमध्ये ४ नाबालक