चन्द समूहका जिल्ला नेताले गरे काठमाडौं प्रशासनसमक्ष आत्मसमर्पण- समाचार - कान्तिपुर समाचार

चन्द समूहका जिल्ला नेताले गरे काठमाडौं प्रशासनसमक्ष आत्मसमर्पण

कान्तिपुर संवाददाता

काठमाडौँ — प्रतिबन्धित नेत्रविक्रम चन्द समूहका एकजना कार्यकर्ताले जिल्ला प्रशासन कार्यालय काठमाडौंमा आत्मसमर्पण गरेका छन् ।

चन्द समूहमा संखुवासभा जिल्ला तहका नेता धनबहादुर विश्वकर्माले बिहीबार काठमाडौं प्रशासन समक्ष आत्मसमर्पण गरी स्वतन्त्र नागरिकका रुपमा रहने गरी निवेदन दिएका हुन् । काठमाडौंका सहायक प्रमुख जिल्ला अधिकारी जीवन आचार्यले विश्वकर्माले चन्द समूह परित्यागको निवेदन दिएको पुष्टि गरे ।


आचार्यले कान्तिपुरसँग भने, ‘उहाँले स्वतन्त्र नागरिकको हैसियतमा रहने गरी चन्द समूह परित्यागको घोषणासहित निवेदन दिनुभएको छ ।’ संखुवासभा मादीका विश्वकर्मा चन्द समूहमा रहेर संखुवासभासहित पूर्वका विभिन्न जिल्लामा सक्रिय थिए ।


विक प्रहरीको खोजी सूचिमा पनि थिए । सरकारले चन्द समूह परित्याग गरेर शान्तिपूर्ण जीवनयापन गर्नेलाई कारबाही नगरिने जनाइसकेको छ । सहायक प्रमुख जिल्ला अधिकारी आचार्यले शान्तिपूर्ण जीवनयापनका लागि विकले निवेदन दिएकोमा प्रशासनले स्वागत पनि गरेको बताए ।

प्रकाशित : माघ ९, २०७६ १७:३८
प्रतिक्रिया
पठाउनुहोस्

बलात्कार आरोपी ‘सिद्धबाबा’ भारततर्फ फरार

देवनारायण साह

मोरङ — अनुयायी एक महिलालाई बलात्कार गरेको मुद्दा खेपिरहेका सुनसरीको बराहक्षेत्र चतरास्थित रामानन्दाचार्य सेवापीठका संरक्षक ‘सिद्धबाबा’ भनिने ४५ वर्षीय कृष्णबहादुर गिरी आश्रम छाडेर बिहीबार भारतर्फ फरार भएका छन् ।

उच्च अदालत विराटनगरमा उनी विरुद्धको जबर्जस्ती करणी मुद्दामा बिहीबार सुनुवाई चलिरहेको बेला फारततर्फ फरार भएका हुन् । उच्च अदालतका मुख्य न्यायधीश तिलप्रसाद श्रेष्ठ र न्यायधीश हरिप्रसाद बगालेको इजलासमा उनको मुद्दाको सुनुवाई भइरहेको बेला सुरक्षा गार्डलाई जोगबनी नाकाबाट फर्काएर भागेको प्रहरी स्रोतले जनाएको छ ।

गिरी आफ्ना केही अनुयायीसहित ग १ च ८१५७ नम्बरको जीपमा भारतर्फ भागेका हुन्। सुनसरी जिल्ला अदालतबाट धरौटीमा छुटेपछि सुरक्षा चुनौती रहेको भन्दै सुरक्षा माग गरेपछि उनको सुरक्षाका लागि प्रहरी हवल्दार मुकेश साहलाई खटाइएको थियो ।

एकछिन जोगबनी पुगेर आउने भन्दै प्रहरी हवल्दार साहलाई नाकामा छाडेर गिरी भारततर्फ भागेका हुन् । प्रहरी नायब उपरीक्षक मानबहादुर राईले सिद्धबाबा भारत पुगेपछि प्रहरीको सम्पर्कमा नआएको स्वीकारे ।

प्रकाशित : माघ ९, २०७६ १७:३३
पूरा पढ्नुहोस्
प्रतिक्रिया
पठाउनुहोस्
×