मौसमका कारण ३७ आन्तरिक उडान रद्द, ४ अन्तर्राष्ट्रिय उडान डाइभर्ट- समाचार - कान्तिपुर समाचार

मौसमका कारण ३७ आन्तरिक उडान रद्द, ४ अन्तर्राष्ट्रिय उडान डाइभर्ट

सुरज कुँवर

काठमाडौँ — लगातारको वर्षाका कारण शुक्रबार त्रिभुवन अन्तर्राष्ट्रिय विमानस्थलमा अवतरण हुनुपर्ने चारवटा अन्तर्राष्ट्रिय उडान अन्यत्रै डाभइर्ट भएका छन् भने कम्तीमा ३७ वटा आन्तरिक उडान रद्द भएका छन् ।

विमानस्थलका प्रवक्ता देवचन्द्रलाल कर्णका अनुसार, थाइल्याण्डको राजधानी बैंककबाट आएको थाई एयर काठमाडौंमा अवतरण हुन नसकेर बंगलादेशको राजधानी ढाका फर्किएको थियो । थाईको टीजी–३१९ उडान नम्बरको जहाजले काठमाडौं विमानस्थलमा अवतरणकालागि दुईपटक प्रयास गरेको थियो । दुवैपटक मिस्ड एप्रोच (ओभरसुट) गरेपछि बंगलादेशको राजधानी ढाका फर्किएको थियो । उक्त विमान साँझ ढाकाबाट फेरि बैंककतर्फ नै फर्किएको थियो ।


त्यसैगरी बैंककबाटै आएको थाई लायनको अर्को विमान नेपालको सीमानाभित्र आएर भारतको कोलकत्ता फर्किएको थियो । उता तिब्बतको ल्हासाबाट काठमाडौं आउन तयार रहेको तिब्बत एयरको जहाजले काठमाडौंको मौसम सुधार नभएपछि उतै उडान रद्द गरेको थियो । त्यस्तै दिल्लीबाट आएको इन्डीगो एयरको जहाज पनि नेपाली सीमानाभित्र नआई दिल्लीमै फर्किएको थियो । शुक्रबार साँझ ७ बजेर १० मिनेटसम्मको जानकारी अनुसार, यी चारवटै एयरलायन्स फेरि फर्केर आएनन् । शुक्रबार रातीसम्मका लागि ४६ वटा अन्तर्राष्ट्रिय उडानको तालिका थियो ।


आन्तरिक उडानतर्फ काठमाडौंबाट पहाडि भेग लगायतका स्थानका लागि तय भएका ३७ वटा उडान स्थगित भए । विमानस्थलका अनुसार, शुक्रबार काठमाडौंबाट लुक्लाका लागि ६ वटा र पर्वतीय उडानका ६ वटा गरी १२ वटा उडान भएनन् ।


मौसमकै कारण भद्रपुरमा एउटा, पोखरामा ८, तुम्लिङटारमा ३, भरतपुरमा ४, सीमरामा ४ तथा सुर्खेतमा एक उडान भएनन् । काठमाडौंबाट पोखराका लागि उडेको बुद्ध एयरको जहाज त्यता अवतरण हुन नसकेर भैरहवा पुगेको थियो ।

प्रकाशित : माघ ३, २०७६ १९:५७
प्रतिक्रिया
पठाउनुहोस्

धरौटी बुझाएर छुटे लगत्तै चन्द समूहका दुई नेता पुनः पक्राउ

दुर्गालाल केसी

दाङ — धरौटी बुझाएर छुटे लगत्तै नेत्रविक्रम चन्द समूहका दुई नेताहरुलाई प्रहरीले पुनः पक्राउ गरेको छ । चन्द समूहको भातृ संगठन दलित मुक्ति मोर्चाका जिल्ला अध्यक्ष सुरज परियार र नेता विष्णुबहादुर रावतलाई दाङ देउखुरी जिल्ला अदालतमा आज धरौटी बुझाएर निस्कने क्रममा प्रहरीले पुनः पक्राउ गरेर हिरासतमा राखेको हो ।

उनीहरुलाई पुनः अर्को मुद्दामा कारबाही गर्ने उदेश्यले पक्राउ गरिएको हो । गत असोज ३० गते पार्टीका मध्य कमाण्ड ईन्चार्ज बिरजन्जसहित २१ जना चन्द समूहका नेताहरुलाई राजपुरको मगराइनाबाट प्रहरीले पक्राउ गरेको थियो ।अदालतले उनीहरूलाई जनही १५ हजार धरौटीमा छोड्न आदेश दिएको थियो । तर फेरि पक्राउ पर्ने देखिएपछि उनीहरु सबै कारागार जाने निधो गरेका थिए । त्यसकाे केही दिन पहिले ४ जना नेताहरु धरौटी तिरेर निस्कने क्रममा प्रहरीले लछारपछार गर्दै पुनः नियन्त्रणमा लिएर कपिलबस्तु पुर्याएको थियो ।

प्रकाशित : माघ ३, २०७६ १९:२५
पूरा पढ्नुहोस्
प्रतिक्रिया
पठाउनुहोस्
×