होचो व्यक्तिको कीर्तिमान बनाएका खगेन्द्र थापाको निधन

दीपक परियार, लालप्रसाद शर्मा

पोखरा — विश्वकै होचो व्यक्तिको कीर्तिमान बनाएका खगेन्द्र थापा मगरको निधन भएको छ । पोखराको मणिपाल शिक्षण अस्पतालमा उपचारका क्रममा शुक्रबार दिउँसो उनको निधन भएको हो । 


स्वास्थ्यमा समस्या आएपछि उनलाई बिहीबार अस्पतालको आईसीयूमा राखेर उपचार गरिएको थियो। निमोनियाका कारण उनको निधन भएको अस्पतालले जनाएको छ। उनलाई दिउँसो ३ बजे मृत घोषणा गरिएको खगेन्द्र थापा मगर प्रतिष्ठानका अध्यक्ष मीनबहादुर रानाले बताए। खगेन्द्रमा यसअघि स्वासप्रश्वास, हमोग्लोबिनको कमी, ह्वाइट ब्लड सेल बढी हुने समस्या देखिएको थियो।


बागलुङ धुल्लुवासकोटका खगेन्द्रले २०६७ असोज २८ मा विश्वकै होचो व्यक्तिको रुपमा ‘गिनिज बुक अफ वर्ल्ड रेकर्ड्स’ मा नाम लेखिएको थियो। उनको उचाई ५७ सेन्टिमिटर (२२.०४ इन्च) थियो। उनले १८ वर्षको उमेरमा गिनिज बुकमा नाम लेखाएका थिए। हाल उनी पोखराको सृजनाचोकमा बस्दै आएका थिए।


२०४९ असोज १८ मा जन्मिएका खगेन्द्रको जन्मदाँ तौल जम्मा ६ सय ग्राम थियो। निधनअघि उनको वजन ५.५ केजी थियो। प्रकाशित : माघ ३, २०७६ १७:४६

ADVERTISEMENT
प्रतिक्रिया
पठाउनुहोस्

कारबाहीको डरले हवल्दारले गरे आत्महत्या

‘म पनि विप्लव हुँ’ भन्दै फायरीङ गर्दै कार्यालयबाट अघिल्लो राति निस्केका प्रहरी हवल्दार कठायतले भोलिपल्ट बिहान कार्यालय परिसरमै आत्महत्या गरे । 
भीमबहादुर सिंह

जाजरकोट — गत आइतबार इलाका प्रहरी कार्यालय दल्लीका प्रहरी हवल्दार भोजबहादुर कठायतले आफैलाई कन्चटमा गोली हानेर आत्महत्या गरे । हवल्दार कठायतले कार्यालय परिसर पछाडि बिहान ७ बजे आफैले बोकेको पेस्तोलले कन्चटमा गोली हानेर आत्महत्या गरेका हुन् । स्वामीकार्तिक गाउँपालिका–४ बाजुरा घर भई पछिल्ला दुई–तीन महिनादेखि दल्लीमा कार्यरत ३५ वर्षीय प्रहरी हवल्दर कठायत सिभील घुमुवाको काम गर्दै आएका थिए । 

मृतक कठायत कार्यालयको नियमित कामको बहाना पारी गत शनिबार दिनभर कार्यालय बाहिर रहेका थिए। त्यसदिन बेलुकी ८ बजेसम्म उनी कार्यालयमा नफर्केपछि प्रहरी कर्मचारीले खोजी गर्ने क्रममा उनलाई नलगाड नगरपालिका–२ छेप्काबजारमा मदिराले लठ्ठ अवस्थामा फेला पारी कार्यालयमा लिएर गएका थिए। उनलाई प्रहरी चौकी इन्चार्ज प्रहरी नायव निरीक्षक टेकबहादुर देउवाले ‘किन जथाभावी घुमेको, रातिसम्म पनि कार्यालमा नआउने, यो क्षेत्रमा विप्लव समूहको बिगबिगी छ, ख्याल गर्नुपर्‍यो नि’ भनेर सम्झाएका थिए। तर मदिराले मात्तिएका कठायतले उल्टै इन्चार्ज लगायत प्रहरीलाई गाली गलौज गरेर ‘म पनि विप्लव हुँ’ भन्दै आफूले बोकेको पेस्तोलद्वारा चौकी परिसरमै दुईपटक हवाई फायरिङ गरेर कार्यालय छाडेर रातभर हराएका थिए। त्यसपछि कठायतलाई प्रहरीले रातभर खोज्दा पनि फेला पार्न सकेन।

हवल्दार कठायतले ‘म पनि विप्लव हुँ, मलाई विप्लव समूहले केही गर्दैन, बरु तिमीहरुलाई डर छ’ भनी धम्क्याई फायइरिङ गर्दै कार्यालयबाट बाहिर निस्केर रातभर बेपत्ता भएको एक प्रहरीले बताए। भोलिपल्ट बिहान दल्ली प्रहरी उनलाई खोजी गर्ने तयारीमा कार्यालयबाट निस्कनै लागेको बेलामा हवाल्दर कठायत कार्यालयमा टुप्लुक्क आइपुगे। उनी कसैसँग बोलेनन्। ड्युटीमा रहेका प्रहरी जवानले इन्जार्च देउवालाई कठायत कार्यालयमा आएको जानकारी गराउनसम्म पाएका के थिए, कठायतले चौकीमा प्रवेश गरेको ५ मिनेट बित्न नपाउँदै कार्यालय पछाडिको खाली ठाउँमा गएर आत्महत्या गरे

गोली पड्किएकाे आवाज सुनेर प्रहरी, स्थानीय लगायत आत्तिए। २ मिनेटमै प्रहरी हवल्दार कठायतले आफैलाई गोली हानी आत्महत्या गरेको भन्ने खबर आयो। पेस्तोल पड्केको आवाज आउने बित्तिकै तत्काल प्रहरी घटनास्थल पुग्यो तर कठायको मृत्यु भइसकेको थियो।

यसरी हवाल्दर कठायतले अघिल्लो राति ‘विप्लव हुँ’ भन्दै फायरिङ गरेको विषयमा आफूलाई कारबाही होला कि भन्ने डरले आत्महत्या गरेको प्रहरी निरीक्षक महेशकुमार आचार्य बताउँछन्। कठायतले आफैलाई गोली हानेर आत्महत्या गर्नुपर्ने अन्य कुनै कारण नभएको निरीक्षक आचार्यले बताए। अघिल्लो दिन राति ९ बजेतिर बन्दुक पड्केको आवाज आएको र भोलिपल्ट बिहान ७ बजे कार्यालयको पछाडि कठायतले पेस्तोलले आफैलाई हानेर लडेको देखेको स्थानीय ध्रुव सिंहले बताए।

प्रहरी कार्यालयबाट हराएको भनेर राति खोजेको पनि आफूले थाहा पाएको सिंहले बताए। मृतक कठायत पत्नी निशा खत्री कठायतले आत्महत्या नभएको भन्दै प्रहरी प्रशासनलाई छानबिनका लागि अनुरोध गरेपछि कर्णाली प्रदेश प्रहरी कार्यालयले उक्त घटनाको अनुसन्धान गर्न प्रहरी उपरीक्षक सञ्जीव शर्मा दास नेतृत्वमा ३ सदस्यीय छानबीन टोली गठन भएको थियो। टोलीले दल्लीमा पुगेर घटनाको अनुसन्धान पनि गरेको जाजरकोट प्रहरी प्रमुख प्रहरी नायव उपरीक्षक किशोर श्रेष्ठले बताए।

घटना पछि मृतक कठायतको शव ४ दिनसम्म जाजरकोट अस्पतालमा राखेर पोस्मार्टमका लागि नेपालगन्ज पठाइएको प्रमुख नायव उपरिक्षक श्रेष्ठले बताए। जाजरकोट अस्पतालमा हतियार प्रयोग गरी आत्महत्या भएको हुँदा पोस्टमार्टमका लागि उपकरण र विशेषज्ञ उपलब्ध नभएको भन्दै नेपालगञ्ज लानु परेको उनले बताए। कठायतको शव गत बिहीबार भेरी अञ्चल अस्पतालमा पोस्टमार्टम गरेर सदगदका आफन्तलाई बुझाइएको श्रेष्ठले बताए।

प्रकाशित : माघ ३, २०७६ १७:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×