काठमाडौँ — उपसभामुख शिवमाया तुम्बाहाङ्फेले संसदलाई बन्धक बनाएको नेकपाका नेताले आरोप लगाएका छन् । विपक्षी कांग्रेसले सत्तारुढ दलले संसदलाई बन्धक बनाएको आरोप लगाइरहेका बेला नेकपा स्थायी समिति सदस्य हरिबोल गजुरेलले भने त्यसको एकमात्र बाधक उपसभामुख तुम्बाहाङ्फे भएको बताएका हुन् ।

उपसभामुखबाट तुम्बाहाङ्फेले राजीनामा नदिएसम्म संसदको गतिरोध नहट्ने गजुरेलको भनाइ थियो ।

प्रतिनिधिसभा सदस्यसमेत रहेका उनले बिहीबार काठमाडौंमा आयोजित एक साक्षात्कार कार्यक्रममा भने, 'उपसभामुखले राजीनामा नदिएसम्म नेकपाले उम्मेदवारी दिन नपाउने भएकाले देश र जनतालाई निकास दिन पनि उहाँले पदबाट राजीनामा दिनुपर्छ ।'

तुम्बाहाङ्फेले राजीनामा नदिए पार्टीले त्यस विषयमा गम्भीर भएर छलफल गर्ने पनि गजुरेलको भनाइ थियो । नेकपाका अध्यक्षद्वय केपी शर्मा ओली र पुष्पकमल दाहालले उपसभामुखबाट राजीनामा गर्न तुम्बाहाङ्फेलाई आग्रह गरेको र सो बमोजिम नभए पार्टी अर्कै किसिमले अगाडि बढ्ने गजुरेलको भनाइ थियो ।

सभामुख को हुने भन्ने बहसको विषय भएको र पुरानो सहमतिअनुसार नै चयन हुने गजुरेलको भनाइ थियो । विगतमा सभामुख माओवादी पक्षले पाएको र अब पनि सोही पक्षबाट सभामुख बन्ने उनको संकेत थियो । नेकपाबाट उपसभामुख बनेकी तुम्बाहाङ्फेले राजीनामा नदिँदासम्म सभामुख कसलाई बनाउने भन्ने बहस गर्नुको कुनै अर्थ नहुने पनि गजुरेलको तर्क थियो ।

नेकपा सचिवालय बैठकले उपसभामुखलाई पदबाट राजीनामा गर्न औपचारिक निर्णय गरेको थियो । तर, तुम्बाहाङ्फेले भने आफूले राजीनामा गरेको खण्डमा संसद रिक्त हुने तर्क गर्दै आएकी छन् ।