योग शिक्षा गौरवपूर्ण परम्परा र सम्पदा : परराष्ट्रमन्त्री

कान्तिपुर संवाददाता

काठमाडौँ — परराष्ट्रमन्त्री प्रदीपकुमार ज्ञवालीले योग शिक्षा गौरवपूर्ण परम्परा र सम्पदा भएको बताएका छन् । राष्ट्रिय योग दिवसका अवसरमा बुधबार काठमाडौंमा आयोजित कार्यक्रममा मन्त्री ज्ञवालीले विज्ञान र प्रविधिको विकास नहुँदा योगको विकास भएको बताए । 

ZenTravel

मन्त्री ज्ञवालीले अग्रजहरुले योगका माध्यमबाट स्वस्थ जीवन बाँच्ने र धेरै महत्वपूर्ण सम्पदा तथा ज्ञानहरु हस्तान्तरण गरेर गएको बताए।

Meroghar

‘आधुनिक विज्ञान, प्रविधि नभएको बेला, आधुनिक मेडिकल विज्ञानको विकास भएको थिएन । जतिबेला डाइन्गोष्टिक र ट्रिटमेण्डका लागि अहिलेजस्तो सहज सुलभ प्रविधिहरु थिएनन्। हाम्रा अग्रजहरुले योगका माध्यमबाट स्वस्थ जीवन बाँच्ने र अरु धेरै महत्वपूर्ण सम्पदा र ज्ञानहरु हस्तान्तरण गरेर गए’, ज्ञवालीले भने, ‘विभिन्न किसिमका तनावलाई कम गर्न ध्यान प्रभावकारी हुन्छ। यो गौरवपूर्ण धरोहरलाई विद्यालय शिक्षासँगै जोडेर जीवनको अभिन्न अंग बनाउनुपर्छ।’

कार्यक्रममा स्वास्थ्य तथा जनसंख्यामन्त्री भानुभक्त ढकालले योगको माध्यमबाट मान्छेमा सकारात्मक भावना विकास हुने बताए। विश्वमा एकदिनमा दुर्घटनाबाट ८ जना र आत्महत्या गरेर १६ जनाको निधन हुने गरेको तथ्याङ्कले देखाएको बताउँदै उनले योग शिक्षाको माध्यमबाट यसलाई रोक्न सकिने बताए। ‘मान्छेमा योगको माध्यमबाट सकारात्मक भावना विकास गर्न सकियो भने आत्महत्या जस्ता घटनाहरु न्यूनिकरण गर्न सकिन्छ’, मन्त्री ढकालले भने।

शिक्षा, विज्ञान तथा प्रविधिमन्त्री गिरिराजमणि पोखरेलले योगलाई औषधि र उपचारको अर्थमा मात्रै नभएर जीवन पद्धतिको रुपमा बुझ्नुपर्ने बताए। योगलाई एक दिन कार्यक्रम गरी मनाएर मात्रै नपुग्ने भन्दै मन्त्री पोखरेलले यसलाई जनजनमा पुर्‍याउन अभियान नै चलाउनुपर्ने बताए। योग र प्राकृतिक चिकित्सालाई पाठ्यक्रममा समावेश गर्ने योजना सरकारको रहेको उनले बताए। एक हप्ताभित्र योग अभ्यासको पुस्तिका सार्वजनिक गर्ने तयारी रहेको पनि उनले बताए ।

कार्यक्रममा स्वामी आनन्द अरुणले विश्वमा राजनीतिक र धर्मका कारण झगडाहरु हुने गरेको उल्लेख गर्दै योग र साधनाको माध्यमबाट विश्वलाई एकताबद्ध गर्न सकिने बताए। उनले योगसम्बन्धी अध्ययन हुने राष्ट्रियस्तरको शिक्षालयको आवश्यकता औंल्याए। भ्रमण वर्ष घोषणाले मात्रै पर्यटक नआउने भएकोले योग, साधनाबाट लाखौं पर्यटक भित्र्याएर महिनौंसम्म नेपालमै राख्न सकिने उनको भनाइ थियो।

‘राष्ट्रिय एकताः योगको सान्दर्भिकता’ नारासहित शिक्षा, विज्ञान तथा प्रविधि मन्त्रालयको आयोजनामा योग दिवस मनाइएको हो।

प्रकाशित : माघ १, २०७६ १३:२६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कर तिर्दैनन् इँटा उद्योगहरु

हरिहरसिंह राठौर

धादिङ — जिल्लामा सबैभन्दा बढी उद्योग भएका धुनीबेंसी नगरपालिका लगायत पृथ्वीराजमार्गसँग जोडिएका साना ठूला उद्योगहरुले स्थानीय तथा प्रदेश सरकारलाई प्रदूषण कर तिर्न अटेर गरिरहेका छन् । 

न्यूनतम कर तिर्न र नवीकरण गर्न बारम्बार गरेको लिखित तथा मौखिक आग्रहलाई कुनै उद्योगीले नटेरेको स्थानीय तहले गुनासो गरेका छन् । धुनीबेंसी नगरपालिकाका प्रमुख बालकृष्ण आचार्यले भने,- ‘नौविसेस्थित केएल दुगडले सञ्चालन गरेको युनाइटेड सिमेन्टलाई प्रदेश सरकारले प्रतिबोरा अढाई रुपैयाँ र नगरपालिकाले प्रतिबोरा ५० पैसा गरी ३ रुपैयाँ वातावरणीय कर भुक्तान गर्न पत्राचार गरेको डेढ वर्ष भयो तर कुनै उत्तर दिएन र कर पनि तिरेन ।’ उक्त नगरपालिकामा ३ वटा सिमेन्ट, २ वटा औषधि कारखाना, २७ वटा इँटा उद्योगहरु सञ्चालनमा छन् ।

त्यस्तै करिब सय रिसोर्ट र होटल, कुखुरा र बाख्रा फर्महरुलाई वातावरणीय मापदण्ड पालना गर्न र सामाजिक उत्तरदायित्व वहन गर्न नगरपालिका र वाग्मती प्रदेश सरकारले पटक-पटक पत्राचार गरेका थिए । प्रमुख आचार्यका अनुसार २०७२ को भूकम्पलगत्तै काठमाडौंबाट विस्थापित भएर नौबिसे ईलाकामा आएका २९ वटा इँटा उद्योगले सामान्य कर तिर्न पनि मानेनन् । कृषियोग्य नौबिसे फाँटलाई उद्योगमा बालिने कोइलाको धुवाँले प्रदूषित बनाएको उजुरी परेपछि नगरपालिकाले मापदण्डमा चलाउन र प्रति इँटा २५ पैसा वातावरणीय कर तिर्न पत्राचार गरेको थियो ।
नगरपालिकाले श्रम ऐनअनुसार मजदुरका पारिश्रमिक, बीमा, सामाजिक सुरक्षा कोष, उद्योगहरुको सामाजिक लेखा परीक्षण लगायत सर्त पालना गर्न समेत पत्राचार गरेको थियो । तर, उद्योगहरुले कार्यरत मजदुरहरुको नामावलीसमेत उपलब्ध गराएका छैनन् । ‘हरेक उद्योगमा कम्तीमा ३ सयदेखि ६ सयसम्म मजदुरहरु काम गर्छन् तर श्रम ऐन लागू भएको छैन, कारबाही गर्ने स्पष्ट कानुन पनि छैन, बैंक ऋृण स्वीकृत गराउने बेला मात्रै नगरमा सम्पर्क राख्छन् अन्यथा कुनै सम्पर्क गर्दैनन', नगरप्रमुख आचार्य भन्छन्, 'अब कर नतिर्ने उद्योगलाई नवीकरण नगर्ने बाहेक उपाय छैन ।’

जिल्लाका नौबिसे, थाक्रे, गजुरी, छत्रेदेउराली, जीवनपुर, नीलकण्ठमा सञ्चालित ४२ वटा इँटा उद्योगहरुले करोडौं भ्याट छली गरिरहेको पाइएको छ । निलकण्ठ नगरपालिका– ८ ससाहमा रहेको महारुप इँटा उद्योगले करोडौंको भ्याट छलीगरिरहँदा समेत सरोकारवाला निकाय मौन छ । उनीहरुले प्रति इँटा ७ देखि रुपैयाँको भ्याट बिल काट्ने गरेको भए पनि ग्राहहरुले प्रति इँटा १३ रुपैयाँ मूल्य पर्छ । ‘एक वर्षमा हामीले २५ लाखभन्दा धेरै इँटा बेचिसकेका छौं,’ भट्ट सञ्चालकमध्येका एक बद्री कोइरालाले भने, ‘जिल्लाका सबैतिर बिल दिने एउटै तरिका भएकोले यो विषयमा बोल्न मिल्दैन ।’

एक वर्षको अवधिमा १७ उद्योग दर्ता
पछिल्लो एक वर्षमा घरेलु तथा साना उद्योग विकास समिति धादिङमा १७ वटा इँटा उद्योग दर्ता भएका छन् । धुनीबेंसी नगरपालिकामा मात्रै स्वीकृति लिएका २९ मध्ये २७ वटा इँटा उद्योगहरु सञ्चालनमा छन् । यस क्षेत्रमा सञ्चालनमा रहेका इँटा उद्योगले करिब १५ सय किसानका ५ हजार रोपनी खेतीयोग्य जग्गा ओगेटेको छ ।

घरेलु तथा साना उद्योग विकास समिति धादिङका अनुसार जिल्लामा ३० वटा इँटा उद्योगले मात्रै सञ्चालन अनुमति लिएका छन् ।

प्रकाशित : माघ १, २०७६ १३:१८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×