पुनर्निर्माणको म्याद थप गर्ने कि नगर्ने सम्बन्धमा कार्यदल
काठमाडौँ — पाँच वर्षभित्र पुनर्निर्माणको काम नसकिएपछि म्याद थप गर्ने/नगर्ने भन्ने विषयमा निर्क्यौल गर्न कार्यदल गठन गरिएको छ ।
राष्ट्रिय पुनर्निर्माण प्राधिकरणको समय ०७७ पुस १२ मा सकिन लागेपनि पुनर्निर्माण सम्बन्धी ऐन, २०७२ मा सरकारले आवश्यक ठाने म्याद एक वर्ष थप्न गर्न सक्ने प्रावधान छ । तर पुनर्निमाणको काम भने अझै सकिएको छैन । बाँकी रहेको समयमा काम सकिने अवस्था छैन ।
पुनर्निर्माणको काम नसकिएकाले म्याद थप गर्ने/नगर्ने भन्ने सम्बन्धमा सिफारिस गर्न सोमबार कार्यदल गठन गरिएको छ । बालुवाटारमा भएको राष्ट्रिय पुनर्निर्माण प्राधिकरण निर्देशक समितिको बैठकले कार्यदल गठन गरेको हो ।
राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीको संयोजकत्वमा गठित कार्यदलमा अर्थ, गृह, सहरी विकास, संस्कृति पर्यटन तथा नागरिक उड्डयन मन्त्रालय, राष्ट्रिय योजना आयोग र प्राधिकरणका सचिव रहने छन् । ‘समग्रमा पुनर्निर्माणको काम सन्तोषजनक छ,’ कार्यकारी अधिकृत ज्ञवालीले भने, ‘यो कार्यदलले स्रोतको व्यवस्थापन, रकम र समग्र पुनर्निर्माणको अवस्थाकाबारेमा अध्ययन गरी प्रतिवेदन तयार पार्ने छ ।’ यसैको आधारमा समय थप गर्ने/नगर्ने निष्कर्ष निक्लिने छ ।
कार्यदलको प्रतिवेदन निर्देशक समितिको अर्को बैठकमा पेस गरिने छ । कार्यदललाई पुनर्निर्माणको वर्तमान अवस्था, आगामी कार्ययोजना, वित्तीय व्यवस्थापनको अध्ययन गरी प्राधिकरणको म्याद थप गर्ने/नगर्ने सम्बन्धमा सिफारिस गर्ने जिम्मेवारी दिइएको हो ।
‘म्याद थप गर्ने/नगर्ने सम्बन्धमा अहिल्यै केही निर्णय भइसकेको छैन,’ अधिकृत ज्ञवालीले भने, ‘प्रतिवेदन तयार भएपछि थाहा हुने छ ।’ उनका अनुसार समग्र रुपमा पुनर्निर्माणको काम ८३ प्रतिशत सकिएको छ । सबैभन्दा राम्रो प्रगति निजी आवासमा रहेको छ । निजी आवास पुनर्निर्माण अन्तर्गत ६२ प्रतिशत पूरा भएको छ । २५ प्रतिशत पुनर्निर्माण जारी रहेको र १७ प्रतिशत पुनर्निर्माण सुरु हुन बाँकी छ ।
बैठकमा प्रधानमन्त्री केपी शर्मा ओलीले आर्थिक अवस्था, राजनीतिक संकट, नाकाबन्दीलाई पार गर्दै मुलुक संघीयताको नयाँ संरचनामा गएको अवस्थामा पुनर्निर्माणमा ८३ प्रतिशत उपलब्धी हुनु असाधारण प्रगतिको संज्ञा दिए । त्यस्तै प्रधानमन्त्री ओलीले पुनर्निर्माणका बाँकी काम उपलब्ध बजेटबाट चाँडो सम्पन्न गर्न र स्रोतका सिमामा रहेर वास्तविक योजना बनाइ काम गर्न निर्देशन दिए ।
प्रमुख कार्यकारी अधिकृत ज्ञवालीले उहाँले चालु आर्थिक वर्षको १ सय ४१ अर्ब रुपैयाँ बजेटमध्ये ३८ अर्ब रुपैयाँ बराबरको बजेटको स्रोत सुनिश्चित नभएको बताए ।
प्रकाशित : पुस २८, २०७६ २०:३०