नक्कली भ्याट बिल प्रकरणमा न्यायाधिकरणकै फैसला सदर, कर र जरिवाना अर्बभन्दा बढी

यो फैसलाले सर्वोच्चमा विचाराधीन नक्कली भ्याट बिल प्रकरणमा मुछिएका झन्डै डेढ सय मुद्दालाई दिशानिर्देश गर्नेछ । ‘नक्कली भ्याट बिल प्रयोग गरेकाले भ्याटसहित त्यसमा जरिवाना पनि तिराउनुपर्छ अनि सामान किनेको भनेर खर्च कट्टाको दाबीसमेत गर्न मिल्दैन भन्ने सरकारी पक्षको दाबी थियो, जुन सर्वोच्चबाट सदर भएको छ,’ मुद्दामा बहस गरेका नायब महान्यायाधिवक्ता नारायणप्रसाद पौडेलले कान्तिपुरसँग भने, ‘अरुण इन्टरकन्टिनेन्टल भन्ने कम्पनीको हकमा आयकरको मुद्दामा राजस्व न्यायाधिकरणले हाम्रो मागदाबी स्वीकार गरेको थिएन । त्यो मुद्दामा समेत सर्वोच्चबाट सरकारको पक्षमा फैसला भएको छ ।’

राजस्वसम्बन्धी मुद्दाको बहस गरेका सहन्यायाधिवक्ता हरिशंकर ज्ञवालीका अनुसार सर्वोच्चको फैसलाबाट राज्यलाई एक अर्बभन्दा बढी राजस्व प्राप्त हुनेछ । भाटभटेनीले नै तिर्नुपर्ने राजस्व र जरिवाना अर्बको हाराहारीमा छ । उनले भने, ‘यति नै भनेर किटान गर्न अलि कठिन छ । हरेक कम्पनीको छुट्टाछुट्टै आर्थिक वर्षको मुद्दा फरकफरक भएकाले जरिवानासमेत जोडेर हिसाब निकाल्नुपर्छ । सहजै एक अर्बभन्दा बढी राजस्व संकलन हुन्छ ।’

नक्कली बिलमार्फत भ्याट र आयकर छलेको आरोपमा भएको संशोधित कर र जरिवानामाथि सर्वोच्चबाटै ‘न्यायिक परीक्षण’ भई अधिकांश मुद्दामा राजस्व न्यायाधिकरणको फैसला सदर भएको हो । अरुण इन्टरकन्टिनेन्टलको एउटा मुद्दामा भने न्यायाधिकरणको फैसला बदर भई कर लाग्ने निर्णय भएको छ ।

नक्कली भ्याट बिल प्रकरणमा जोडिएका कम्पनीहरू मुख्य रूपमा आयकर र मूल्य अभिवृद्धि करको विवादमा मुछिएका हुन् । सोमबार भाटभटेनी डिपार्टमेन्ट स्टोर, एआईटी इन्टरनेसनल, महेश बानियाँ, शंकर अक्सिजन ग्यास र अरुण इन्टरकन्टिनेन्टलका मुद्दा टुंगिएका हुन् ।

नक्कली भ्याट बिलको प्रयोग बढेको सूचना सार्वजनिक भएपछि ०६७ पुस ८ मा आन्तरिक राजस्व विभागले छानबिन समिति गठन गरेको थियो । विभागका तत्कालीन उपमहानिर्देशक लक्ष्मण अर्यालको संयोजकत्वमा गठित समितिले ३ अर्ब २५ करोड रुपैयाँको कर छली भएको प्रारम्भिक नतिजा निकालेको थियो । पछि अनुसन्धान हुँदै जाँदा ५ सय १८ वटा व्यापारिक फर्मले नक्कली भ्याट बिल बनाई कर छलेको घटनामा ३ अर्ब ७ करोड रुपैयाँ भ्याट, ३ अर्ब ३३ करोड रुपैयाँ आयकर र २० करोड ५० लाख रुपैयाँ अन्तःशुल्क निर्धारण गरिएको थियो । यसबाट कुल ६ अर्ब ५९ करोड रुपैयाँ कर निर्धारण भयो । त्यतिबेलाका मुद्दामध्ये ५ वटाको सोमबार फैसला भएको हो ।

मुद्दाको धरातल के थियो ? थप जान्न हेर्नुहोस् :

नक्कली भ्याट बिलका मुद्दा सुनुवाइ हुँदै, आज यी कम्पनीहरुका हुनेछन् सुनुवाइ