लोकतन्त्रको आवरणमा लुटतन्त्र चल्यो : कमल थापा- समाचार - कान्तिपुर समाचार

लोकतन्त्रको आवरणमा लुटतन्त्र चल्यो : कमल थापा

चित्रांग थापा

महेन्द्रनगर — राष्ट्रिय प्रजातन्त्र पार्टीका अध्यक्ष कमल थापाले देशमा लोकतन्त्रको नाममा लुटतन्त्र चलेको बताएका छन् । प्रमुख राजनीतिक दलका प्रमुख नेता, केही व्यापारी तथा कर्मचारीको त्रिकोणात्मक गठबन्धनमा मुलुकमा अर्बौ रकमको भ्रष्टाचार भइरहेको उनले आरोप लगाए ।

उनले सत्तारुढ नेकपासँंगै प्रमुख प्रतिपक्षी कांग्रेसको पनि कुनै न कुनै रुपमा भ्रष्टाचारमा संलग्नता रहेको देखिने बताए ।

‘एनसेलको कर छली, वाइड बडी जहाज खरिद, ३३ क्विण्टल सुन तस्करी संगठित भ्रष्टाचारका ज्वलन्त उदाहरण हुन्,’ आइतबार महेन्द्रनगरमा पत्रकार भेटघाटमा बोल्दै थापाले भने, ‘पछिल्लो घटनामा नेपाल ट्रस्टको सम्पति एक व्यापारिक घरानालाई सुम्पने कार्य र भूमाफियाले सार्वजनिक जग्गा कब्जा गर्ने कामले नेपालमा नीतिगत र संस्थागत रुपमा भ्रष्टाचारलाई प्रोत्साहित गर्ने काम भइरहेको प्रष्ट हुन्छ ।’


‘दुई तिहाई बहुमतको बलियो सरकार गठन भएको अढाइ बर्ष हुनलाग्दा समेत नेपाली जनताले सकारात्मक अनुभुति गर्न पाएका छैनन्,’ उनले भने । उनले पछिल्लो समयमा भएका धर्म परिवर्तनले सामाजिक संरचना नै खल्बल्याउन थालेको पनि दावी गरे ।


नेपालले ठूलो आर्थिक सहयोग पाउनेगरी अमेरिकासग हुन लागेको सम्झौता एमसीसीलाई राजनीतिक पूर्वाग्रहका कारण खतरामा पार्न खोजिएको पनि उनले बताए । ‘पूर्वाधार विकासका लागि आउन लागेको ठूलो सहयोगलाई धरापमा पार्न विवाद सिर्जना गर्न खोजिएको छ,’ उनले भने ‘जसरी अरुण तेस्रोलाई धरासयी पारियो एमसीसी पनि त्यस्तै हुने त होइन भन्ने शंका उत्पन्न भएको छ ।’


उनले कालापानी, लिम्पियाधुरा र लिपुलेक नेपालको अखण्ड भूमि भएकोले भारतद्वारा अतिक्रमित भूमि फिर्ता गराउने बिषयमा राष्ट्रिय सहमतिसमेत कायम भएको अवसरलाई सरकारले सदुपयोग गर्नु पर्ने बताए ।

प्रकाशित : पुस २०, २०७६ १७:४७
प्रतिक्रिया
पठाउनुहोस्

महाकाली उद्गमस्थलबाटै सीमा हो : देउवा

चित्रांग थापा

(महेन्द्रनगर) — कांग्रेस सभापति एवं पूर्व प्रधानमन्त्री शेरबहादुर देउवाले महाकाली नदी उद्गमस्थलबाटै सीमा नदी भएकोले भारतले जारी गरेको नयाँ नक्सामा राखिएको कालापानी लगायतको क्षेत्र नेपाली भूभाग भएको बताएका छन् ।

‘महाकाली पूर्वको उत्तरपश्चिम सीमान्त क्षेत्रको भूभाग नेपाल भारत र चीनको त्रिदेशिय सीमानाकाका रुपमा रहेको छ,’ शनिबार महेन्द्रनगरमा प्रेस यूनियन कञ्चनपुरले आयोजना गरेको पत्रकार सम्मेलनमा देउवाले भने, ‘महाकाली नदी पूर्वको भूभाग नेपाली भूमि हो । उनले आफ्नो पार्टीको कालापानी बारेको धारण सधै स्पष्ट रहेको दाबी गरे ।

पूर्वप्रधानमन्त्री देउवाले महाकाली सन्धीले पनि महाकाली नदी सीमा नदी भएको र महाकालीको पानीमा नेपाल र भारतको बराबर हक भएको समेत पुष्टि गरेको उल्लेख गरे । ‘पञ्चेश्वर परियोजना बनेपछि महाकालीको पानीमा दुवै देशको आधा–आधा हिस्सा लाग्नेछ’ उनले भने ।

कालापानीमा विस २०१८ देखि नै भारतीय सुरक्षाकर्मी बस्दै आएको प्रसंग उल्लेख गर्दै देउवाले कालापानी नेपालकै भूभाग भएको यथार्थ स्थापित गर्न कुटनैतिक पहल आवश्यक भएको बताए । हालै भएको सर्वपक्षीय बैठकमा सरकारलाई यो विषयमा आवश्यक पहल गर्न कांग्रेस लगायत सबै दलको साथ र सर्मथन रहेको उनले बताए । ‘सरकार राष्ट्रियताको नारा लगाएर ठूला कुरा गर्छ तर काम गर्दैन,’ उनले भने, ‘सरकार भने लम्पसारवादको नीतिमा रहेको छ ।’

निर्मला पन्तका बलात्कारी र हत्यारा हालसम्म पक्राउ पर्न नसकेको बारेमा सञ्चारकर्मीको प्रश्नमा देउवाले सरकार आफैले हत्यारा लुकाउन खोजेको आरोप लगाए । ‘सारा संसार भरी निर्मलाको घटना बारे चर्चा र चासो भइरहेको अवस्थामा सरकार भने बलात्कारी र हत्यारालाइ बचाउन लागेको छ’ उनले भने, ‘हामी कदापि हत्यारालाई उम्कन दिने छैनौ संसदमा यो विषयलाइ अझ बढी जोडका साथ उठाउने छौ ।’

विश्वविद्यालयका पदाधिकारी नियुक्तिमा कांग्रेसले भागबण्डा खोजिरहेको सम्वन्धि प्रश्नमा देउवाले देश कुनै एक पार्टीको मात्र नभएकोले महत्वपूर्ण कुराहरुमा मिलेर जानु पर्छ भन्ने आशयले विश्वविद्यालयका पदाधिकारी नियुक्तिमा एकलौटी नहोस् भन्ने कांग्रेसको धारणा आफूले सरकार समक्ष राख्दै आएको बताए ।

प्रकाशित : कार्तिक ३०, २०७६ २०:०५
पूरा पढ्नुहोस्
प्रतिक्रिया
पठाउनुहोस्
×