कांग्रेसमा समानान्तर बैठक

कुलचन्द न्यौपाने

काठमाडौँ — कांग्रेस सभापति शेरबहादुर देउवाले राष्ट्रिय सभा निर्वाचनसम्बन्धी एजेन्डा राखेर बिहीबार पार्टी केन्द्रीय कार्यालय सानेपामा दिउँसो २ बजे बोलाएको बैठकमा वरिष्ठ नेता रामचन्द्र पौडेल पक्ष उपस्थित भएन । बरु, पौडेल पक्षको बैठक महाराजगन्जस्थित महामन्त्री शशांक कोइराला निवासमा बस्यो । 

ZenTravel

Meroghar

सानेपामा बैठक अपराह्न ४ बजे बसेर दुई घण्टासम्म चलेको थियो भने पौडेल पक्षको ३ बजेदेखि साँझ साढे ७ बजेसम्म बैठक भयो । पूर्वमहामन्त्री कृष्णप्रसाद सिटौला पक्ष कुनै पनि बैठकमा सहभागी भएन । मुद्दामा पौडल पक्षसँगै रहे पनि आफ्नो समूहको अस्तित्व जोगाउन कुनै पनि बैठकमा सहभागी नभएको सिटौलानिकट सदस्यहरूको भनाइ छ ।
सिटौलाले मंगलबार पार्टी सभापति देउवालाई लिखित पत्र दिँदै पुस ११ गतेको कार्यसमितिको निर्णय अविलम्ब सच्याउन माग गरेका छन् । पौडेल पक्षले पनि उक्त निर्णय सच्याउनुपर्ने माग अघि सार्दै आएको छ । संस्थापनइतर पक्षको बहिष्कारका बीच पुस ११ मा केन्द्रीय कार्यसमिति बैठकले महाधिवेशनको कार्यतालिका घोषणा गर्नुका साथै क्रियाशील सदस्यतासम्बन्धी विधानमा केही प्रावधान निलम्बन गर्ने, विभागको संख्या बढाउने र तरुण दलको कार्यकाल थप ६ महिना बढाउने निर्णय गरेको थियो । पौडेल र सिटौला पक्षले राष्ट्रिय निर्वाचनको घोषणा र संसद्मा नियम निलम्बन गर्नसमेत प्रतिपक्षसँग परामर्श गरिने प्रचलन रहेको भन्दै पार्टीभित्र एकलौटी निर्णय गरेर महाधिवेशन कब्जा गर्ने नियत राखिएको टिप्पणी गर्दै आएका छन् ।
सभापति देउवाले पौडेल र सिटौला पक्षले उठाउँदै आएको मागमा छलफल गर्न तयार भएको प्रतिक्रिया दिए पनि बैठकको निर्णय सच्याउन भने तयार देखिएका छैनन् । बुधबार मोरङमा देउवाले निर्णय नसच्चिने उल्लेख गर्दै तोकिएकै मितिमा महाधिवेशन हुने बताएका थिए । उनले विभाग र नेविसंघ गठन गर्दा भागबन्डा मिलाउने आशय प्रकट गर्दै आएका छन् । त्यसका लागि उनले उपसभापति विमलेन्द्र निधिलाई जिम्मेवारी दिएका छन् । तर अघिल्लो निर्णय नसच्याएसम्म भागबन्डामा सहभागी नहुने पौडेल पक्षको अडान छ । पौडेल पक्षले विभाग र भ्रातृसंस्थाहरूको गठन तथा पुनर्गठन विधानविपरीत गर्न नदिन दबाब दिने भएको छ ।
बिहीबारको केन्द्रीय कार्यसमिति बैठकमा असन्तुष्ट पक्षले उठाएका विषयवस्तुमा खासै चर्चा भएन । बैठकमा अधिकतरले पार्टी हितविपरीत गतिविधि गर्ने र बोल्नेलाई अनुशासनको कारबाही हुनुपर्ने माग गरेका थिए । बालकृष्ण खाँण, मीन विश्वकर्मा, फरमुल्ला मन्सुर, भीष्म आङदम्बे, रमेश लेखक, हरि नेपाललगायतले बोलेका थिए । मन्सुरले पदाधिकारी बैठकमा पौडेल र सिटौलालाई के हैसियतमा बोलाउने भन्दै प्रश्न गरेका थिए । ‘उनीहरू (पौडेल र सिटौला) पनि केन्द्रीय सदस्य, हामी पनि केन्द्रीय सदस्य, पदाधिकारी बैठकमा पौडेल र सिटौलालाई बोलाउने हो भने हामीलाई पनि बोलाउनुपर्छ,’ उनले भनेका थिए ।

बैठकले राष्ट्रिय सभा सदस्य निर्वाचनका लागि उम्मेदवारको नाम सिफारिस गर्न प्रदेश १ मा ज्ञानेन्द्रबहादुर कार्की, २ मा आनन्द ढुंगाना, ३ मा सहमहामन्त्री प्र्रकाशशरण महत, गण्डकी प्रदेशमा गोपालमान श्रेष्ठ, ५ मा बालकृष्ण खाॅण, कर्णाली प्रदेशमा जीवनबहादुर शाही र सुदूरपश्चिम प्रदेशमा एनपी सावदलाई जिम्मेवारी दिइएको छ । सबै देउवानिकट हुन् । नाम सिफारिसका लागि बोलाउने बैठकमा पौडेल पक्ष उपस्थित नहुने भएको छ ।

कांग्रेसले नागरिक अधिकार हनन गर्नेगरी ल्याइएको भन्दै सूचना प्रविधि विधेयक तथा नेपाल विशेष सेवा गठन र सञ्चालनसम्बन्धी विधेयकको विरोधमा सरकारलाई ज्ञापनपत्र बुझाउने निर्णय गरेको छ । कांग्रेसले जिल्ला प्रशासन कार्यालयमार्फत पुस २८ गते ज्ञापनत्र बुझाउने निर्णय गरेको हो ।

प्रकाशित : पुस १८, २०७६ ०७:३९
प्रतिक्रिया
पठाउनुहोस्

कांग्रेस बैठक : पौडेल र सिटौला बाहिरिए

खेमराज पौडेलको सम्भावना
कुलचन्द न्यौपाने

काठमाडौँ — कास्कीमा कसलाई उम्मेदवार बनाउने भन्ने विषयले विवाद बढेपछि संस्थापन इतरपक्षीय नेताहरु उम्मेदवार चयन गर्ने जिम्मेवारी सभापति शेरबहादुर देउवालाई सुम्पेर बैठकबाटै बाहिरिएका छन् । चार निर्वाचन क्षेत्रका लागि उम्मेदवार चयन गर्न मंगलबार बिहानदेखि बसेको बैठकमा कास्कीको २ नम्बर क्षेत्रबाट कसलाई उम्मेदवार बनाउने भन्ने विषयमा मुख्य विवाद देखिएको हो ।


वरिष्ठ नेता रामचन्द्र पौडेल, महामन्त्री शशांक कोइराला, पूर्व महामन्त्री कृष्णप्रसाद सिटौला र कोषाध्यक्ष सीतादेवी यादव बैठकबाट बाहिरिएपछि सभापति देउवाले कास्की–२ मा खेमराज पौडेललाई उम्मेदवार बनाउने निर्णय लिएका छन्। तर, औपचारिक रुपमा अहिलेसम्म उनीसहित कसैको नाम पनि सार्वजनिक गरिएको छैन।

कास्कीमा वरिष्ठ नेता पौडेल र पूर्व महामन्त्री सिटौलाले देवराज चालिसेलाई उम्मेदवार बनाउनु पर्ने अडान राखेका थिए। उनी यसअघिका उम्मेदवार भएकाले उनैलाई दिनुपर्ने पौडेल र सिटौलाको अडान थियो। तर, सभापति देउवाले चालिसेलाई रोक्नका लागि सुरुमा धनराज गुरुङको नाम अघि सारेका थिए।

गुरुङको नाम अघि सारेपछि पौडेल समेत सकारात्मक देखिए। तर, देउवा गुरुङको नामबाट पछि हट्दै खेमराज पौडेलको पक्षमा उभिएपछि उनीहरु बैठबाट बाहिरिएका हुन्। विवाद बढेपछि गुरुङले पदाधिकारी बैठकमै गएर आफूलाई उम्मेदवार नबनाउन आग्रह गरेका थिए।

बैठकमा पौडेलले हार र जितको जिम्मेवार सभापतिले नै लिनेगरी जसलाई उम्मेदवार बनाउनु छ बनाउनुहोस् भन्दै बैठकबाट बाहिरिएका थिए। त्यसअघि सिटौलाले आन्तरिक शक्ति सन्तुलन र आम सहमति जुटाएर उम्मेदवार चयन गर्ने सभापति देउवालाई सुझाएका थिए। ‘कहाँ-कसलाई उम्मेदवार बनाउँदा चुनाव जित्न सकिन्छ भन्ने हामीहरुको धारणा तपाईंले सुनिसक्नु भएको छ। छलफल मात्रै गर्ने तर निर्णय नहुँदा पार्टीभित्रै अन्यौल खडा भयो,’ सिटौलाको भनाई थियो ,‘हामी सार्वजनिक रुपमा केही भन्दैनौं, तपाईले जसलाई निर्णय गर्नुछ गर्नुहोस। हामी बैठकमा बस्दैनौं।’

पदाधिकारी बैठकमा पौडेल र सिटौलासहित दश जना सहभागी थिए। संस्थापन इतरपक्षका चार जना बाहिरिएपछि पदाधिकारी बैठकमा संस्थापन पक्षीय ६ जना मात्रै सहभागी छन्। कास्कीमा पौडेलको नाममा टुंग्याएपनि बागलुङ, भक्तपुर र दाङको प्रदेश निर्वाचन क्षेत्रको उम्मेदवार भने अझै टुंगो लागिसकेको छैन।

प्रकाशित : कार्तिक २०, २०७६ १४:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×