प्रदेश-५ को भ्रमण वर्ष शुभारम्भ बाँकेबाट - समाचार - कान्तिपुर समाचार
कान्तिपुर वेबसाईट
AdvertisementAdvertisement

प्रदेश-५ को भ्रमण वर्ष शुभारम्भ बाँकेबाट 

मधु शाही

बाँके — प्रदेश नं ५ ले पर्यटन भ्रमण वर्ष २०२० को शुभारम्भ बाँकेबाट सुरु गरेको छ । मुख्यमन्त्री शंकर पोख्रेलले मंगलबार राति १२ बजे नेपालगन्जस्थित सिद्धार्थ होटलमा पर्यटन भ्रमण वर्ष २०२० को व्यानर खोलेर शुभारम्भ गरेका गरेका हुन् । 

भ्रमण वर्षको औपचारिक उद्घाटन बर्दिया राष्ट्रिय निकुन्जको ठाकुरबाबामा भएको छ । मुख्यमन्त्री पोख्रेलले बुधबार बिहानै बाँकेको राष्ट्रिय निकुन्जमा हात्ती सफारी गरे । बाँके सबैभन्दा कान्छो राष्ट्रिय निकुन्ज हो ।


बाँके राष्ट्रिय निकुन्जमा पर्यटन वर्षलाई लक्षित गरी ‘खड्गवार हात्तिसार’ सञ्चालन गरिएको छ । मुख्यमन्त्री पोख्रेलले बाँके राष्ट्रिय निकुन्जमा जंगल सफारी, होमस्टे, जंगल पद यात्रा, हात्ति सफारीलगायत प्राकृतिक दृश्यावलोकानका प्रशस्त सम्भावना रहेको बताए ।बाँके जिल्ला भारतको सीमासँग जोडिएकाले भारतीय पर्यटक प्रशस्त बढाउन सकिने पोख्रेलले बताए । ‘आन्तरिक पर्यटक नबढेसम्म बाह्य पर्यटक आउने सम्भावना कम हुन्छ,’ पोख्रेलले भने, ‘तसर्थ यो वर्ष आन्तरिक पर्यटक भित्र्याउनमै बढि जोड दिनुपर्छ ।’



परिवार सहित बेलाबखत घुमफिर गर्ने संस्कारको विकास गरेमा आन्तरिक पर्यटनमा टेवा पुग्ने पोख्रेलले बताए ।

जिल्ला पर्यटन प्रवर्द्धन समिति बाँकेले यस वर्ष २० हजार बढि भारतीय पर्यटक भित्र्याउने योजना बनाएको छ ।


जिल्ला समन्वयन समिति प्रमुख अजय श्रीवास्तवले पर्यटन भ्रमण वर्ष उधारोमा चलाउनु परेको बताए । उनले प्रदेश सरकारले ४ लाख रुपैया बाँकेका लागि पर्यटन प्रवर्द्धन गर्न दिने भनेपनि अहिलेसम्म बजेट नआएको बताए । ‘एक त बजेट अत्यन्त थोरै छ, त्यसमा पनि खातामा पैसा नआउँदा हामीले आफैंले उधारोमा काम चलाएका छौं,’ श्रीवास्तवले भने, ‘बजेट नहुँदा सोचेअनुसार काम गर्न सकिएको छैन् ।’


प्रकाशित : पुस १६, २०७६ १४:२६
प्रतिक्रिया
पठाउनुहोस्

पर्यटनमन्त्रीको जिल्लामा खोजीखोजी विदेशीलाई सम्मान

आनन्द गौतम

ताप्लेजुङ — नेपाल भ्रमण वर्ष २०२० को पहिलो दिन ताप्लेजुङ आएका विदेशी पर्यटकलाई सम्मान गरिएको छ ।  संस्कृति पर्यटन तथा नागरिक उड्डयन मन्त्री योगेश भट्टराईको जिल्लामा आएका विदेशीलाई खोजीखोजी सम्मान गरिएको थियो ।


हिमालयन गाइड्स एक्सपिडिसनबाट आएका दुई जनालाई मेवाखोला हिल रिसोर्ट र ताप्लेजुङ गेस्ट हाउसमा बसेका पाँच जनालाई सम्मान गरिएको छ ।

त्यस्तै सुकेटार विमानस्थलमा विमानबाट आएका पाहुनालाई समेत फूलमाला र खादा लगाएर सम्मान गरिएको थियो । स्वागतका लागि जिल्ला समन्वय समिति प्रमुख घनेन्द्र मादेन, नगरपालिका प्रमुख छत्रपति प्याकुरेल, प्रमुख जिल्ला अधिकारी डोरेन्द्र निरौलालगायतको टोली बिहानैदेखि सक्रिय भएको थियो ।

प्रजिअ निरौलाका अनुसार भ्रमण वर्षको पहिलो साँझ सदरमुकाम फुङलिङमा दीपावलीलगायतको कार्यक्रम छ । भ्रमण वर्षको अघिल्लो दिन सदरमुकाम फुङलिङको वीरेन्द्रचोकमा भ्रमण वर्षको लोगो बनाएर बेलुका दीपावली गरिएको थियो । बुधबार साँझ उद्योग वाणिज्य संघको आह्वानमा दीपावली गर्न लागिएको हो ।


हेलिकप्टरबाट आएका भारतीय नागरिकसहितलाई पाथीभरा मन्दिरमा समेत स्वागत गरिएको छ । पुरुषलाई नेपाली टोपी र महिलालाई दोसल्ला ओढाएर सम्मान गरिएको माथिल्लो फेदी अस्थायी प्रहरी चौकीका इञ्चार्ज धनराज तुम्बापोले बताए ।

वर्षमा ३ लाख तीर्थयात्री आउने पाथीभरामा यो वर्ष अधिक भारतीय नागरिक भित्र्याउने लक्ष्य राखिएको छ । यसका लागि सिक्किम, मणिपुर, दार्जिलिङ, सिलिगुडी, कोलकातासम्म प्रचार गरिएको छ ।

प्रकाशित : पुस १६, २०७६ १४:१५
पूरा पढ्नुहोस्
प्रतिक्रिया
पठाउनुहोस्
×