जाडोका कारण जनकपुरका विद्यालयहरु पाँच दिन बन्द हुने

उपमहानगरका शिक्षा, युवा तथा खेलकुद महाशाखाका उपसचिव मेहीलाल यादवले अत्याधिक जाडोका कारण बालबालिकाको स्वास्थ्यमा प्रतिकूल असर पर्न सक्ने भएकोले विद्यालय बन्द गर्ने निर्णय गरिएको जानकारी दिए । पालिकाको शैक्षिक क्यालेण्डरमा पुस २७ देखि माघ ३ गतेसम्म जाडो विदा दिने उल्लेख छ । तर जाडाे अत्याधीक बढेकाले अहिल्यै विद्यालय बन्द गर्ने निर्णय उपमहानगरे गरेकाे हाे ।

जाडो हुस्सु तथा पश्चिमा हावाका कारण धनुषाको जनजीवन अस्तव्य बनेको छ । भने जाडोजन्य रोगीहरुको संख्या ह्वात्तै बढेको छ ।

जाडोबाट हुने क्षति न्युनिकरण गर्न जिल्ला प्रशासन कार्यालय धनुषाले शीतलहर पूर्व तयारी तथा प्रतिकार योजना– २०७६ लागू गरेको छ । प्रमुख जिल्ला अधिकारी प्रदीपराज कणेलले सो योजनाअन्तर्गत जिल्लाका १८ वटै स्थानीय तहलाई कम्तीमा एक न्यानो लुगा बाड्ने, धूनी लगाउने तथा स्वास्थ्य संस्थाहरुलाई सतर्क रहन निर्देशन दिइएको जानकारी दिए ।

प्रादेशिक अस्पताल जनकपुरका स्त्री रोग विशेषज्ञ डा.रामनरेश पण्डितले जाडो बढेसँगै प्रादेशिक अस्पतालसंगै निजी अस्पताल तथा क्लिनिकहरुमा रुघाखोकी, दम, कोल्ड डायरिया तथा वाथ रोगका विरामीहरुको संख्या ह्वातै बढेको जानकारी दिए ।

‘अचेल सरकारी तथा निजी अस्पतालसँगै क्लिनिकहरुमा जाडोजन्य रोगीको संख्या अत्याधिक बढेको छ । बालबालिकाहरुमा कोल्ड डायरिया, निमोनिया तथा बृद्धबृद्धाहरुमा वाथ तथा निमोनियाको प्रकोप देखिएको छ,’ डा. पण्डितले भने ।