सोमबार कोहलपुरका शैक्षिक संस्था बन्द, निषेधित क्षेत्र कायमै, प्रदर्शन भए पुनः कर्फ्यू
(बाँके) — बाँकेस्थित कोहलपुर नगरपालिका–११ की १२ वर्षिया प्रकृति चन्दलाई ट्रकले ठक्कर दिएपछि आइतबार तनावग्रस्त रहेको कोहलपुरका सबै विद्यालय सोमबार बन्द छन् । प्रहरी र विद्यार्थी बीच झडप हुँदा हिजो ४० भन्दा बढी घाइते भएपछि प्रशासनले कर्फ्यू नै लगाउनुपरेको थियो ।
अहिले स्थीति सामान्य छ । जिल्ला प्रशासन कार्यालय बाँकेका साहयक प्रमुख कृष्णकान्त उपाध्यायले भने, ‘अहिले पनि कोहलपुरमा घटना भएको स्थल वरिपरि निषेधित क्षेत्र घोषणा गरिएको छ । फेरी पनि प्रदर्शन भए कर्फ्यू लाग्न सक्छ ।
कोहलपुरका विद्यालयहरुले संयुक्त विज्ञप्ती जारी गर्दै सोमबार शैक्षिक संस्था बन्द गर्ने निर्णय गरेको हो । श्री त्रिभुवन नमुना माध्यमिक विद्यालयमा कक्षा ७ मा पढ्ने प्रकृतिको अहिले काठमाडौंको बीएन्डबी अस्पतालमा उपचार भइरहेको छ ।
प्याब्सन कोहलपुरका अध्यक्ष यम रावत, नेश्नल प्याब्सनका अध्यक्ष बेगप्रकाश चन्द, क्रिसा बाँकेका अध्यक्ष शिवप्रसाद डांगीले संयुक्त विज्ञप्ती जारी गर्दै शैक्षिक संस्था बन्द गरिएको जनाए ।
