बागलुङ दुर्घटना : बेपत्ताको शव भेटियो
बागलुङ — बडिगाडमा भएको जिप दुर्घटनापछि बेपत्ता रहेका एकजनाको बुधबार बिहान शव फेला परेको छ । गुल्मीको इस्मा गाउँपालिका–४ का ६५ वर्षीय धनबहादुर कार्कीको शव बुधबार घटनास्थलदेखि एक किलोमिटर तल खोला किनारमा भेटिएको प्रहरीले जनाएको छ । भीमगिठे बजार नजिकै बगरमा शव देखेपछि स्थानीयले प्रहरीलाई खबर गरेका हुन् ।
जिप खोलामा खसेपछि उद्धारमा खटिएका प्रहरीले एकजना बेपत्ता भएको पत्ता लगाएका थिए । शव पोस्टमार्टमका लागि पठाइएको प्रहरी नायब उपरीक्षक झविन्द्रप्रसाद भट्टराईले बताए । मंगलबार भएको दुर्घटनामा जिपमा सवार १४ जनाको मृत्यु भएको थियो । तीन घाइतेलाई उपचारार्थ सेनाको हेलिकप्टरबाट काठमाडौं पठाइएको थियो । मृतकहरूको घटनास्थलमै पोस्टमार्टम गरेर आफन्तलाई शव बुझाएपछि इस्मावासीले १२ जनाको सामूहिक दाहसंस्कार गरेका छन् । घटनामा मृत्यु भएका दुईजनाको शव भने जिल्ला बाहिरको भएकाले उतै पठाइएको हो ।