प्रधानमन्त्रीलाई मिर्गौला प्रत्यारोपण गर्न २ देखि ४ महिना लाग्न सक्ने

डाक्टरहरू भन्छन्– कमजोर मिर्गौलाले शल्यक्रिया, संक्रमण आदि जटिलता झेलेकाले नियमित डायलसिसमा जानुपर्ने हुन सक्छ
अतुल मिश्र

काठमाडौँ — प्रधानमन्त्री केपी शर्मा ओलीको मिर्गौला प्रत्यारोपण दुईदेखि चार महिनापछि सर्ने भएको छ । अघिल्लो मंगलबार आकस्मिक रूपमा एपेन्डिसाइटिसको शल्यक्रिया गर्नुपरेकाले मिर्गौला प्रत्यारोपणको समय धकेलिएको डाक्टरहरूले बताएका छन् । ‘मिर्गौला प्रत्यारोपण गर्न शल्यक्रिया गरिएको ठाउँको घाउ निको हुनुपर्छ । संक्रमण पूर्ण नियन्त्रणमा हुनुपर्छ । अहिलेकै स्थितिमा जोखिम हुन्छ,’ वरिष्ठ मिर्गौला रोग विशेषज्ञ डा. ऋषि काफ्लेले भने ।

एपेन्डिसाइटिससहित पेरिटोनाइटिस (पेटको संक्रमण) समेत देखिएपछि ८ दिनअघि मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा प्रधानमन्त्रीको शल्यक्रिया गरिएको हो। स्वास्थ्यमा निरन्तर राम्रो सुधार भए दुईदेखि चार महिनापछि प्रधानमन्त्रीको मिर्गौला प्रत्यारोपण गर्न सकिने डा. काफ्लेको भनाइ छ।

यसअघि गत शुक्रबार प्रधानमन्त्रीकी निजी चिकित्सक डा. दिव्यासिंह शाहले पत्रकार सम्मेलनमा प्रधानमन्त्रीको मिर्गौला प्रत्यारोपणमा हतार गर्नुपर्ने अवस्था नरहेको बताएकी थिइन्। अनुकूल समय पारेर प्रत्यारोपण गरिने उनको भनाइ थियो।

मिर्गौला प्रत्यारोपणका क्रममा अर्को मिर्गौला राख्न सक्ने ठाउँ ठीक हुनुपर्ने डा. काफ्ले बताउँछन्। ‘पेटको संक्रमणले प्रधानमन्त्रीको आन्द्रा वरिपरिको झिल्लीमा कस्तो प्रभाव पारेको छ,’ उनले भने, ‘त्यसले शल्यक्रियाको जटिलतासमेत निर्धारण गर्छ।’

पछिल्लो समय डाक्टरहरूले प्रधानमन्त्रीको छिटोछिटो डायलसिस गरिरहेका छन्। आइतबारसम्म ६ दिनमा ४ पटक डायलसिस गरेका थिए। प्रधानमन्त्री ग्रान्डी हस्पिटलमा रहेका बेला भने २६ दिनमा ४ पटक डायलसिस गरिएको थियो।

जटिल शल्यक्रिया, संक्रमण, शरीरमा फोहोर बढी जम्मा हुनु आदि कारणले प्रधानमन्त्री ओलीका मिर्गौलामा परेको भार घटाउन डायलसिस गरिरहनुपरेको डाक्टरहरूको भनाइ छ। ‘अहिलेको जटिल शारीरिक समस्याले मिर्गौला कमजोर नपारेको भए फाट्टफुट्ट गरिएको डायलसिसले काम गर्थ्यो,’ डा. काफ्लेले भने।

पछिल्लो शल्यक्रिया गर्नुअघिकै अवस्थामा प्रधानमन्त्रीको मिर्गौला रहिरहेमा डायलसिसको संख्या घटाउन सकिने डाक्टरहरू बताउँछन्। अन्यथा निरन्तर डायलसिसमा जानुपर्ने स्थिति आउने उनीहरूको भनाइ छ।

पत्रकार सम्मेलनमा गत शुक्रबार डा. रमेशसिंह भण्डारीले प्रधानमन्त्री अस्पताल आउँदा धेरै बिरामी रहेको र शल्यक्रियापछि संक्रमणको असर पेट र रगतमा समेत परेको बताएका थिए। तर पछिल्लो समय प्रधानमन्त्रीको स्वास्थ्यमा सोचेभन्दा बढी राम्रो सुधार देखिएको उनको भनाइ छ।

प्रकाशित : मंसिर १७, २०७६ २१:४४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

गढीमाईमा साढे ८ हजारको बलि

कान्तिपुर संवाददाता

बारा — गढीमाई मन्दिरमा मंगलबार साढे ८ हजार* पाडाको बलि दिइएको छ । हरेक ५ वर्षमा लाग्ने गढीमाई मेलामा अघिल्लोपटक करिब ५ हजार पाडाको बलि चढाइएको थियो । महागढीमाई नगरपालिका–१ बरियारपुरस्थित मन्दिरमा तान्त्रिक विधिअनुसार पञ्चबलि दिएर पूजा गरिएको हो । मन्दिरमा ब्रह्मस्थान र गढीमाईलाई रंगशालामा जम्मा गरिएका पाडा बलि चढाइएको थियो ।


पूजा समितिका सदस्य र प्रत्यक्षदर्शीले यसपालि साढे ८ हजारभन्दा बढी पाडाको बलि दिइएको अनुमान गरे पनि मेला व्यवस्थापन समितिले संख्या सार्वजनिक गरेको छैन। समितिका पदाधिकारीले सबै रसिद संकलन भइसकेपछि संख्या यकिन हुने बताए। २५ वर्षदेखि मार हान्दै आएका आदर्शकोतवाल गाउँपालिका–६ टेढाकट्टी गाउँका ५५ वर्षीय महेन्द्र मण्डलले यसपालि पाडाको बलि बढेको बताए। बरियारपुरका स्थानीय विजय स्वर्णकारले गढीमाईप्रति विश्वास र आस्था बढेकाले धेरै राँगाको बलि दिइएको बताए। पशुअधिकारकर्मीको बलि विरोधी अभियान र सर्वोच्च अदालतको बलि निरुत्साह गर्ने आदेशविपरीत धार्मिक आस्थाका कारण बलि बढेको स्थानीयको स्थानीयको बुझाइ छ।

पाँच वर्ष अघिको मेलामा भारतीय अदालतको फैसलाका कारण त्यहाँबाट आउने पाडाको संख्या घटेको थियो। यसपालि नाकामा कडाइ नहुँदा बलि बढेको स्थानीयले बताए। गढीमाई मेलामा भारतबाट ७० प्रतिशत पाडा आउने गरेको छ।

बलि व्यवस्थापन उपसमितिका सचिव भुवनेश्वर पासवानले रंगशालामा जम्मा गरिएको पशुको हिसाब मूल समितिलाई जानकारी गराइसकेको बताए। ‘हाम्रो जिम्मा बलिका लागि ल्याइएकापाडा व्यवस्थापन गर्नुपर्ने थियो,’ उनले भने, ‘हामीले इमान्दारीसाथ काम पूरा गरेर हिसाब किताब मूल समितिलाई जिम्मा लगाइदियौं।’ पाडा बलि दिने, नदिने सम्पूर्ण जिम्मेवारी मूल समितिको भएको उनले जिकिर गरे। आफूलाई पनि रंगशालामा जम्मा गरिएको पाडाको संख्या थाहा नभएको उनले दाबी गरे।

बलि दिँदाको भिडियो र तस्बिर खिच्न सञ्चारकर्मीलाई पूजा व्यवस्थापन उपसमितिले रोक लगाएको थियो। बलिका लागि मार हान्न यसपालि गढीमाई मेला मूल व्यवस्थापन समितिले कसैलाई अनुमति नदिएको महासचिव मोतीलाल कुशवाहाले बताए। झन्डै एक हजारको संख्यामा खुँडा लिएर मार हान्न युवा जमात ब्रह्मस्थानमा गढीमाईको आशीर्वाद लिन आइपुगेका थिए। २०३६ सालदेखि मेला व्यवस्थापन मूल समितिसँग अनुमति लिएर मार हान्दै आएका महागढीमाई नगरपालिका १ बरियापुरका ५५ वर्षीय चन्द्रप्रसाद साहले भने, ‘यसपालि मेला समितिले मार हान्न कसैलाई अनुमति दिएको छैन।’ गढीमाई मेलामा बलि दिइएका पशुको आधिकारिक तथ्यांक आफूकहाँ नआएको गढीमाई नगरपालिकाका प्रमुख उपेन्द्र यादवले जानकारी दिए।

बलि हेर्न जाँदा ५१ घाइते

पाडाको बलि हेर्न तारबार गरिएको रंगशालाको पर्खाल चढ्ने र झर्ने क्रममा ५१ जना दर्शनार्थी घाइते भएका छन्। प्रहरीलाई देखेर हतारमा हामफाल्दा तारले काटिएर उनीहरू घाइते भएको मेलामा सञ्चालित स्वास्थ्य शिविरका इन्चार्ज अजयकुमार सिंहले बताए। ‘घाइते भएकाहरू उपचार गराएर फर्केका छन्,’ उनले भने। बिरामी र घाइते भएर मंगलबार मध्याह्नसम्ममा २ हजार १ सय ६० जना दर्शनार्थी शिविरमा उपचार गराउन आएको उनले जानकारी दिए।
*अघिल्लो समाचारमा अपडेट गरिएको

प्रकाशित : मंसिर १७, २०७६ २१:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×