कार्यकारी अध्यक्षको जिम्मेवारीपछि दाहालले बोलाए सचिवालय बैठक

बबिता शर्मा

काठमाडौँ — दुई अध्यक्षको जिम्मेवारी तयभएपछि सत्तारुढ नेकपाको पहिलो सचिवालय बैठक बस्ने भएको छ । बैठक बुधबार बिहान ९ बजे पार्टी मुख्यालय धुम्बाराहीमा बस्दैछ । बैठकको अध्यक्षता पुष्पकमल दाहालले गर्नेछन् । 

ZenTravel

अर्का अध्यक्ष एवं प्रधानमन्त्री केपी शर्मा ओली उपचारको शिलशिलामा अस्पतालमै रहेकाले उनी बैठकमा सहभागी हुने छैनन्। प्रधानमन्त्री ओलीसँग सहमति लिएर दाहालले सचिवालय बैठक बोलाएका हुन्। मंगलबार सचिवालयका अन्य नेताहरुसँग पनि दाहालले छलफल गरेका थिए।

मंसिर ४ को सचिवालय बैठकले कार्यकारी भूमिकासहित पार्टी सञ्चालनको जिम्मेवारी दिएपछि दाहालको अध्यक्षतामा बस्न थालेको यो पहिलो बैठक हो।

बुधबार बिहान पार्टी कार्यालयमा बैठक बस्न लागेको वरिष्ठ नेता माधवकुमार नेपालले जानकारी दिए।

बैठकमा प्रधानमन्त्रीको स्वास्थ्यलाभको कामना, उपनिर्वाचनको समीक्षा, स्थायी कमिटी, केन्द्रिय कमिटीको बैठक र नेता कार्यकर्तालाई सक्रिय बनाउने गरी सातै प्रदेशमा अभियान सञ्चालन लगाएतका एजेण्डामा छलफल हुने भएको छ। प्रधानमन्त्रीको स्वास्थ्य अवस्था र पार्टी सञ्चालनको जिम्मेवारीलाई मध्यनजर गर्दै अध्यक्ष दाहालले मंसिर २४ गतेलाई तय भएको आफ्नो चीन भ्रमण पनि स्थगित गरेका थिए।

मंसिर ४ गतेको बैठकले अध्यक्ष एवं प्रधानमन्त्री केपी शर्मा ओलीले सरकार सञ्चालन गर्ने र अध्यक्ष दाहालले कार्यकारी भूमिकासहित पार्टी सञ्चालन गर्ने निर्णय गरेको थियो।

पार्टी एकताको लामो समयपछि पार्टी र सरकारको भूमिकालाई प्रभावकारी बनाउन अध्यक्षद्वयको कार्यविभाजन टुङ्गो लगाएपछि जिम्मेवारीलाई लिएर हुने गरेको ओली र दाहालबीचको विवाद पनि टुंगिएको थियो।

अध्यक्ष ओली प्रधानमन्त्रीका हैसियतमा सरकारको काममा केन्दित हुने र अर्का अध्यक्ष दाहाल कार्यकारी भूमिकासहित पार्टी सञ्चालनमा केन्दित हुने नेकपाको निर्णयसँगै दाहालले सक्रियता बढाएका थिए। उनी उपनिर्वाचनको प्रचारमा धेरै ठाँउ पुगेका थिए।

यसअघि प्रधानमन्त्री ओली उपचारका लागि सिंगापुरमा रहेका बेला अर्थात भदौ ९ गते पनि दाहालको अध्यक्षतामा सचिवालय बैठक बसेको थियो। पार्टी कार्यालयमा बसेको उक्त बैठकले सांगठनिक एकीकरणका केही काम टुङ्गायको थियो भने नेताकार्यकर्तालाई लागू हुने गरेर अनुशासनका सम्बन्धमा महत्वपूर्ण निर्णय गरेको थियो।


प्रकाशित : मंसिर १७, २०७६ २०:४७
ADVERTISEMENT
ADVERTISEMENT
प्रतिक्रिया
पठाउनुहोस्

बागलुङ दुर्घटना : घुम्तीमा नमोडिँदा खस्यो जिप

१४ को मृत्यु
प्रकाश बराल

बागलुङ — कुलपूजाका लागि हिँडेका यात्रुले खचाखच जिप घुम्तीमा मोड्न नसकी दुर्घटना हुँदा १४ जनाको मृत्यु भएको छ । गुल्मीको इस्मा गाउँपालिकाबाट बागलुङको निसीखोला गाउँपालिकाको देवीस्थानतर्फ जाँदै गरेको ग१ज ५२१९ नम्बरको जिप बडिगाड गाउँपालिकाको भीमगिठेबाट मंगलबार बिहान साढे ९ बजे खोलामा खसेको थियो ।


दुर्घटनामा ३ जना घाइते भएका छन् भने एक जनालाई बडिगाड खोलाले बगाएको प्रहरीले जानकारी दिएको छ।

कार्की परिवारका सदस्य जिपमा सवार रहेको जिल्ला प्रहरीका नायब उपरीक्षक झवीन्द्रप्रसाद भट्टराईले जानकारी दिए। १८ जना यात्रु रहेको जिप बढी भार, तीव्र गति र स्टेयरिङको खराबीका कारण दुर्घटनामा परेको प्रहरीको प्रारम्भिक अनुमान छ। सडक छेउमा गाडिएका ४ पिल्लर भाँचेर जिप दुई सय मिटर तल खसेको थियो।

दुर्घटनालगत्तै इलाका प्रहरी कार्यालय बुर्तिवाङ, प्रहरी चौकी भीमगिठेका प्रहरी र स्थानीय उद्धारमा खटिएका थिए।

बडिगाड–४ स्थित खार प्रहरी चौकीले २४ जना चढेर आएको देखेपछि जिप रोकेको थियो। प्रहरीले ८ जनालाई झारेर अर्को जिपमा पठाएको थियो। ‘उनीहरू हिँडेको १० मिनेटमै जिप खोलामा खसेको खबर आयो,’ स्थानीय कमल पौडेलले भने, ‘प्रहरीको सक्रियताले थप ८ को जनाको ज्यान बच्यो।’ मृतकमध्ये ९ महिला, ४ पुरुष र एक बालिका छन्।

मृत्यु हुनेमा इस्मा गाउँपालिका–४ की ३० वर्षीया सूचना कार्की, ४० वर्षीया सीता कार्की, उनकी २ वर्षीया छोरी अनुशा, ६५ वर्षीय झवि कार्की, २५ वर्षीया मीना बस्नेत र ६५ वर्षीय धनबहादुर कार्की छन्। बागलुङ बडिगाड–५ की ५५ वर्षीया लक्ष्मी केसी, इस्मा–५ की वसुन्धरा कार्की, इस्मा–३ की २३ वर्षीया माया थापा, पश्चिम नवलपरासी बर्दघाट नगरपालिका–२ की ६० वर्षीया मुमा कार्की र सीता कार्कीको पनि मृत्यु भएको छ। कञ्चनपुरका ५५ वर्षीय धनबहादुर कार्की, इस्मा–४ का २५ वर्षीय चालक रेशम थापा र इस्मा–४ कै ४० वर्षीय महेन्द्र कार्कीको पनि दुर्घटनामा ज्यान गएको प्रहरीले जानकारी दिएको छ।

बर्दघाट–२ का १८ वर्षीय जीवन कार्की, इस्माका ८ वर्षीय हिमाल कार्की र २४ वर्षीय रेशमा कार्की घाइते भएका छन्। उनीहरूलाई नेपाली सेनाको हेलिकप्टरबाट उपचारका लागि काठमाडौं लगिएको छ। बडिगाडमै उनीहरूको प्राथमिक उपचार गराइएको थियो। बडिगाड खोलाले बगाएर १५ वर्षीय धनबहादुर कार्की बेपत्ता भएको प्रहरी उपरीक्षक नवराज भट्टले बताए। मृतक सबैको पोस्टमार्टम गरेर परिवारले मंगलबारै शव बुझिसकेका छन्।

दुर्घटनालगत्तै उद्धारका लागि घटनास्थलमा पुगे पनि अधिकांशको मृत्यु भइसकेको प्रत्यक्षदर्शीले बताए। जिप उल्टो परेको थियो। ‘भीर र खोलाको खोंचमा जिप फसेकाले शव निकाल्न धेरै गाह्रो भयो,’ उद्धारमा खटिएका स्थानीय दिनेश शर्माले भने, ‘शव क्षतविक्षत थिए।’ साँघुरो सडकमा धेरै घुम्ती भएकाले चालकले नियन्त्रणमा लिन नसकेको स्थानीयको भनाइ छ। घटनास्थल सदरमुकामदेखि ८० किमि पश्चिममा पर्छ।

प्रकाशित : मंसिर १७, २०७६ २०:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×