प्राधिकरणले स्वीकृत गर्‍यो रसुवाको एक र मकवानपुरका दुई स्थानमा एकिकृत बस्ती निर्माण गर्ने योजना

कान्तिपुर संवाददाता

काठमाडौँ — राष्ट्रिय पुनर्निर्माण प्राधिकरणले रसुवाको एउटा र मकवानपुरका दुईवटा एकीकृत वस्ती विकासको प्रारम्भिक योजना स्वीकृत गरेको छ । प्राधिकरणको कार्यकारी समिति बैठकले रसुवाको आमा छोदिङमो–२ को सानो हाकु टोलका ४६ विस्थापित घरधुरीलाई सोही गाउँपालिकाको पाङलिङमा प्राधिकरणको अनुदान रकमबाट जग्गा खरिद गरी ५१ घरधुरी एकीकृत वस्ती विकास गर्ने प्रारम्भिक योजना स्वीकृत गरेको हो ।

ZenTravel

त्यो प्रारम्भिक योजनामा थप ५ जग्गाधनी मिलाउने प्राधिकरणको योजना छ ।

Meroghar

त्यसैगरी, मकवानपुर जिल्लाका राक्सिराङ र कैशाल गाउँपालिकामा बन्ने एकीकृत वस्तीहरुका प्रारम्भिक योजना पनि प्रधिकरण कार्यकारी बैठकले स्वीकृत गरेको छ । राक्सिराङ–५ को चुरिडाँडाटोलका १० भूकम्प पीडित घरधुरीले मनहरी गाउँपालिका–६ को जोगीतालमा एकीकृत वस्ती विकास गर्ने योजना बैठकबाट स्वीकृत भएको हो । त्यस्तै, कैशाल–१० को न्याम्सेढुंगा टोलका १० भूकम्प पीडित घरधुरीलाई सोही वडाको वमलटारमा एकीकृत वस्ती विकास गरिनेछ ।

प्राधिकरणले एकीकृत वस्तीमा भौतिक पूर्वाधारका लागि अलग्गै प्रति घरधुरीका दरले रकम उपलब्ध गराउने प्राधिकरणको सूचना शाखाले जनाएको छ । प्राधिकरणले हिमाली जिल्लामा बन्ने एकीकृत वस्तीका लागि प्रति घर ५ लाख, पहाडी जिल्लामा बन्ने बस्तीका लागि प्रति घर ४ लाख र तराईका जिल्लामा बन्ने वस्तीका लागि प्रति घर ३ लाखका दरले एकमुष्ठ रकम उपलब्ध गराउँछ ।

कार्यालयमा आएका गुनासा सम्बोधन
प्राधिकरणले कार्यालयमा आएका गुनासालाई सम्बोधन गर्दै चार हजार ६ सय ४४ पुनर्निर्माण लाभग्राही थप गरेको छ । प्राधिकरण कार्यकारी समितिको बैठकले ४२ हजार ७ सय ४२ गुनासो सम्बोधन गर्दै छुट तथा पुनः जाँच सर्भेक्षणबाट प्राप्त गुनासो विश्लेषण गरी ती भूकम्प प्रभावितलाई लाभग्राही कायम गरेको हो ।

कार्यकारी समितिले ४ सय १० जनालाई संभावित लाभग्राही र २ हजार ६ सय ९ जनालाई प्रबलीकरण लाभग्राही कायम गरेको प्राधिकरणको सूचना शाखाले जानकारी दिएको छ । बैठकले ३५ हजार ७९ जनगुनासोकर्तालाई गैर लाभग्राही कायम गरेको छ ।

शाखाले छुट तथा पुनःजाँच सर्भेक्षण अन्तर्गत दर्ता भएका बाँकी गुनासोहरुको प्राधिकरण केन्द्रीय कार्यालयमा खटिएका चार दर्जन इञ्जिनियरले विश्लेषण गरिरहेको बताइएको छ ।

लाभग्राही कायम भएका भूकम्प प्रभावित घरधुरीले सम्बन्धित वडामार्फत् अनुदान सम्झौता गरी पहिलो किस्ताबापत ५० हजार रुपैयाँ प्राप्त गर्नेछन् ।

प्रकाशित : मंसिर १६, २०७६ १६:५९
ADVERTISEMENT
प्रतिक्रिया
पठाउनुहोस्
ADVERTISEMENT

तेक्वान्दोमा आयशा र सन्जिवकुमारको जोडीले जिते स्वर्ण

कान्तिपुर संवाददाता

काठमाडौँ — १३ औं साग खेल अन्तर्गत तेक्वान्दोको पोम्सेतर्फ युगल जोडीतर्फ २९ वर्ष माथिको उमेर समुहमा नेपालकी आयशा शाक्य र सन्जिवकुमार ओझाको जोडीले स्वर्ण जितेका छन् । उनीहरुको जोडीले कुल ८.१६० अंक प्राप्त गर्दै स्वर्ण निश्चित गरेका हुन् ।

यस्तै रजत पदक हात पारेका मेहरुन निशा र शाहबाज अहमदको जोडीले ७.८६० अंक प्राप्त गरे भने कास्य पदक विजेता बंगलादेशका दीपु चक्मा र मौसुमेको जोडीले ७.८५० अंक हासिल गरे ।

कराँतेका मण्डेकाजी श्रेष्ठसँगै यो सागमा दुईवटा पदक जित्ने आयशा दोस्रो खेलाडी भएकी छिन् । उनले यसअघि आफ्नो एकल प्रतिस्पर्धामा पनि स्वर्ण जितेकी थिइन् ।

प्रकाशित : मंसिर १६, २०७६ १६:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×